NGGALATIYA 4
4
1Wone yokkiragarak nogo ando ambi yi yokkira o. Aap ambi nen, ”An nageerok yi, napuluk tawe age kenok, unde eeppikit,” mbaketak nogo, apuluk ageerok aret kwe, apuluk nogo tawe aga'lek kenok, tokkage kagak aakumi inabu'me inayeloman negen aret menggerak o. 2Ogoba nen, ”Tiyom paga unde eeppikit,” mbaketak nogo, awo panggoni waga'lek kagak, wulaga nogo ti, ogobamini inabu'me logonet, inoone liirogon konengge kagak, ageerok nogo ogoba nen aret unde menggerak. 3Nogo ndak-ndak nit togon tawe aga'lek wologwe-mbuulogwe negen ugun wonogwe niigak, it aakumi nggween paga mendek nen, ”Yogop eeriyak ndogop eeriyak,” iniki koonogo inapuri yoranet wundi wogo menggaarak wone nogo mendek mban konembunuk, eeko logowok nduk, keele maarak negen aret wonogogurak kwe, 4-5wone lengganogo Muta yoreegerak nogo, nit eeko logowok nduk, keele maarak negen wonogwe nogo, ninonggo mbambunuk, wondet eerogo pinanege logominggirik, aap ambi apuluk maluk ngguungge minggi kwak, nit at apuri togop aret ngguunninabuwak nduk, Ala nen, ”Ndiyom paga napuluk nappi woraagin o,” yinuk, kooneegerak nogo aret panggoni wage mbareegi, kumi inaagalogwe ndaganako mengga kwak, kwe ambi nen aret ndareegerak. Ndake mbareegi, Muta wone lengganak eekwi nogo inom aret eerit nage nagagerak.
6Ndi, yogondak kit Ala apuri aret me, Ala Aberiniki nappi wagagerak nogo, kiniki me logonet, ”Kit kinogoba Ala aret o,” yinuk, yokkirage menggerak. 7Togop me noreewi o. Kit aakumi inayeloman kokwak wonogwe lek o. Kit Ala apuri aret ogotik. Ndi, Ala apuri aret me, ageerok unde eeppinagarak mbareegerak nogo kit aret o.
It Nggalatiya mendek eekwi paga Pawulut iniki aaninggin wonagagerak wone
8Kit aa'nduk Ala kineenggo'lek logonet, kugi abe mendek lek kagak, inayeloman a'nuk inabu'me logonet, inoone konembunuk, kuguwak ogobakkigippunuk alut eeko nogogutak kwe, 9yogondak perak, Ala kineenu ogwe, ndi, Ala nen kit togon kineebe eenu age, eeko nogogutik, kit nonggop nduk, wone abe yugu nogo mbo punuk, obeelom eekkinaburak lek kagak aanom warogo eeko nogogutak wone nogo, ambinom abu'me tebenak logowok mba'nuk, kiniyok paga yungguninuk wa nogo ogotik? 10”Ne yi paga yogop eeriyak mage o. Tut ti paga togop eeriyak mage o. O omarip paga kagak, o ame kagak, togop eeriyak mage o,” yinuk, yi eyom ndi eyom abok aret mage agago pit nogwe nogo, kit togon ndak-ndak liippunuk, eerit nugwi kiige nagagirik, 11an kinake eeke nagagirak nogo ti, ”We aanom warogo eeke nagagirak kulik?” mba'nuk, niniki aaninggin ee'nake o, noreewi.
12Kit wone, ”Yogop ee'nu, ndogop ee'nu,” yugu nogo, kineenggo'lek logonet, abet mba'nuk Ala apuri ogogutak nogo, an togon, wone ti mbo punuk, kit eereegutak nogo ndak-ndak abet mba'nuk Ala aput agagirak me, yogondak an eeke nogo kit ndak-ndak eeko logobagip nduk, yokkiragi. Kit nen an maluk eeppaneegutak kenok, yokkirage lek o. 13An andi ee'nake mbareegi, kinenggela'me ninom logonet, iyaalok togon obeelom wone yokkirage nagagirak nogo kineenu aret o. 14Andi ee'nabeegerak paga neebe abu maluk me, ”Anggon lombok ndegeniyak nineebi a,” yinuk, nogole nen mbo paniyak op aret kwe kagak, it yonggo mbogut paga nugu menggaarak melaikat mendek ndak-ndak me nduk, neebe wa'nako nogogutik, ndegennakwi, yi Keritut Yetut ndak-ndak me nduk, noone konenggwi, eeko logonet, 15kiniki ale'nggen ambik eekwi kiyareegirak kwe, yogondak nonggop aga o, noreewi? Nabuwa mbako logonet, ”Ninigen kilirogo wogoriyak op nen, wogoruwok lak ao,” nombakwi kiyareegirak kwe, 16yogondak kit eeko monggotak an paganogo yokkirage paga wim negen ogoorogo panugwi kiigi o.
17It aap ando nogo ti, kiniki nomongginabuwak nduk, iniki aganggen kerek togon kwaakkinabit wogwe kwe, ti paga obeelom eeppinagawak nduk, kinabuwa nen kiya wogwe lek o. Ata, ”Nit mban ninapuri logonet, ninoone konenggo logowak o,” yinuk, kiya wogo menggaarak. 18It abet aret kinabuwa nen obeelom eeppinagi wogwe iinok, ti op aret me, an neebe lek neegak mban wogoppiyoorak ti mage o. Ata, neebe kinenggela'me wonage neegak wogoppiyoorak togon op mban aret o, noreewi. 19Ai, napuri. Kumi elege enegen paganak yagan wako mengga kwak, kit Ala apuri arubagip nduk, an kinake yagan wake aret wonagagirak kwe, yogondak kit Keritut obaabut ndak-ndak arubagip nduk, ambinom yagan wake agarik o. 20An kinenggela'me logonet, kit eerit nugwi kiige logominggirik, noone yanggoorogon yokkiroorak, ”Ao,” mbake kwe, kit eekwi an kiiga'lek me, niniki piirik togon logonet, noone alik negen aret yokkirage yi abet aret o, napuri.
Kwe Agat Tara imbirak eereegwaarak wone
21Kit wone lengganak eeko logorak mbakwi nogo, Muta wone lengganogo yoreegerak mbanak ambi yokkiraakit mbakirak me, konenggo logonip o. 22At Abarakam apuri mbere ndaganabeegerak nogo ti, ambi kwe at ayeloman nogo nen ndake, ndi, ambi at akwe abe wogo nogo nen ndake, eereegerak liiru mbanak kogo monggoorak nogo. 23Kwe at ayeloman nogo nen ndareegerak nogo ti, it nggween paga nen ndaganako mengga kwak, ndareegerak. Ndi, at akwe lombok nen ndareegerak nogo perak, wone yugu paga nen aret ndareegerak. 24Wone yi nogo ti, wakkagak aret o. Kumi mbere yi nogo ti, wone mbere yugu nogo kokwak aret me, ambi puut Toritina paga nen yoreegerak wone nogo ti, kwe Agat kokwak aret. Kwe Agat Abarakam ayeloman logonet, aagalogwe ndaganabeegerak nogo inom Abarakam ayeloman tebenak wonogogwaarak nogo kokwak, it wone puut Toritina paga yoreegerak nogo waganggwi iinok, aakumi inayeloman kokwak tebenak aret menggaarak o. 25Ndi, puut Toritina o Arap wonage nogo ti, kwe Agat kokwak aret me, wakkogo logonet, kwe Agat aagalogwe inom Abarakam ayeloman tebenak wonogogwaarak nogo kokwak, puut Toritina paga, ”Yogop ee'nu, ndogop ee'nu,” wone yereegerak nogo, it o Yerutalem mendek nen awo eekwi me, aakumi inayeloman kwak wone ti abu'me tebenak wonogwe iigo o. 26Ndi, o Yerutalem agi mbogut paga nogo ti, at akwe abe wogo nogo kokwak me, at wone yugu abet mbareegerak paga aagaluk ndareegerak kokwak, nit kunduk, ”Yogop ee'nu, ndogop ee'nu,” yereegerak nogo eekwi paga lek o. Ata, abet mbakwi paga o Yerutalem agi mbogut paga mendek ogoorik o. 27Ala wone mbanak paga nen ari logonet,
”Kwe monogo negen pege nogo aagalogwe ambik ndake,
ndi, kwe inikilom mbake nogo, aagalogwe mbereeret ndake,
eerigin me,
kat kwe kaagaluk ndaka'lek wubili wonage yi, kiniki ale'nggen mbake,
ndi, elege enegen paganak andi yagan wakwi keenggo'lek
nogo, kiniki ale'nggen nen keyage wake, eeke logot o,”
yinuk, yereegerak nogo ti, nit abet mbakwi apit ninowogolo kwe Tara aret o.
28Ndi, noreewi o. Kwe Tara wone yugu abet mbareegerak paga Itak ndareegerak nogo kokwak, nit togon Ala wone yo'nirage abet mbakwi paga at apuri aret nda'ninake menggerak o. 29It nggween paga mendek nen ndaganako mengga kwak ndarak nogo nen, Aberiniki nen wone yoreegerak paga ndarak nogo, miyuk-meya eerogo tebenogo pit nage nagagerak nogo kokwak, yogondak ti ndak-ndak, it puut Toritina paga yereegerak eekwi nogo nen, nit abet mbakwi nogo miyuk-meya eerogo pinanugo menggaarak kwe, 30Ala wone liiru mbanak nogo ngge mbanak mbakop? Lek o. ”Kwe ayeloman aagaluk inom, kwe abe wogo aagaluk inom, inogoba eyate nogo imbirak koloorak lek me, kwe ayeloman aagaluk imbirak wumbiyoorak o,” yinuk, yereegerak liiru mbanak wonage me, 31nit kwe ayeloman nogo owowologwe lek o. Nit kwe abe wogo nogo owowologwe aret me, wone Toritina paga yereegerak nogo, nit eeriyak mondok lek aret o, noreewi.
Currently Selected:
NGGALATIYA 4: WNO
Highlight
Copy
Compare
Share
Want to have your highlights saved across all your devices? Sign up or sign in
