2 TIMOTIYUT 2
2
Keritut Yetut awot yigin unde abe logorak yoreegerak wone
1Naput kat perak, Keritut Yetut ninom kunik me, Ala iniki kunik en omaawi eekkake kagak, nu'lek logonet, eerit nage logot o. 2Aakumi apit inenggaanom paga yi wone ndi wone yokkereegirak koneneegindak nogo, it aap abe mamumbunuk aakumi liirogon mamuniroorak op iigendak kenok, unde logowak nduk, mamunirage logot.
3Maluk eeppanugwi iigak, nogogumbuk logonet wagangge minggirak nogo kokwak, kat Keritut Yetut awot yigin unde abe kwak logonet, nimbirak ndak-ndak waganggo logowok o. 4Aap ambi nen, ”Nowe wim mamunnegerak inikilom nombaruwak o,” yinuk, yi mendek ndi mendek eeriyak mbo punuk, wim eeriyak mban iniki luunik logonet eerit nage menggerak nogo o. 5Ndi, aap ambi, ”Ta nduk onggo kolaaminggi?” yinuk, wakkogo logonet, ”Ndogop eeru o,” yinuk, wone yugu nogo ndak-ndak eekeelik kenok, onggo kolageelik o. 6Aap yabu eenggi omaawi eeke logominggirik, anggen iyaalok yugu nogo nggwok mbanggoloorak op o. 7An yokkege yi nogo ti, yi wone ndi wone yelok kaanok nduk, ninogoba nen keenu eeppagagin me, liippege logot o.
8At Ala nen Ndawut ombooluk Yetut Keritut kambunuk nogo menggam nen mippereegerak wone nogo ti, an obeelom wone yorage minggirak ndak-ndak aret me, abeke logot o. 9An wone ti aret yorage neenok, maluk eeppanegak mban eerit wogoga, wogoga irip paga, ”Aap abu maluk eeka o,” yinuk, keele maarogo mambiigo menggam mambaneegwaarak kwe, Ala wone perak, keele maariyak meek me, wiganinuk nage agaarik o. 10Togop me, it aakumi Ala miirinabeegerak iniki Keritut Yetut oba panggombunuk, abet mbakwi iinok, inagap ndappunuk mondok-mondok inom tiyanak logowak nduk, maluk eeppanugwi iigak, it inake nogogumbuk logonet wagange minggirak.
11”Nit at ninom kambeegurak kenok, at ninom nineenik
arugun o.
12Maluk eeppinanugwi iigak, ninogogumbuk logonet,
waganggwi kenok, at ninom tiyanak logonet,
aakumi inarum logogun o.
Nit nen at mbo pugwi niinok, at kunduk nit mbo
pinanigin o.
13Nit yogootak kagak alik eekwi kwe, at yegetak perak,
alik ageelik yegetak ndak-ndak aret eeke menggerak o,”
yinuk, yogo menggaarak nogo ti mondok abet aret o.
Ala eyabu eerit nogo logonet, eeko logorak wone
14Wone yokkege yi nogo ti, aakumi nen abeko logowak nduk, yorage logot o. Wone mbuuluk yugu kagak wone wakwi nogo paga obeelom eekkologwe lek it konenggwi nogo iniki mi'nage me, ”Togop eerugup o,” yinuk, Ala enggaanom paga koone omaawi paga yorage logonok nduk, yokkigi o. 15Aap ambi yabu abe eeke logonet, agabiti mbakeelik nogo pogom, kat Ala ari menggerak wone mamunirage logonet, kiniki nen koonogo alik inom nabenogo yoraga'lek at oone mban liirogon yorage keenok, Ala nen inikilom kombaruwak nduk liippunuk, eeke logot o. 16Wone liirak lek amburu puk-puk agan nugwi paga obeelom eekkoloorak lek maluk eeriyak mban ee'ninaburak me, mbo puurak aret o. 17It aap inawin maaluget ambit me kungge nagaatik, ineebe paga nggwok wigangge menggerak nogo pogom it aap ti inoone togop aret wiganinuk nugu menggaarak. Wone ti agan nugu menggaarak nogo ti, aap Kimeneyut Piletut imbirak nen inom agan nugu menggaarak. 18It aap ti, Ala ari menggerak wone nogo mbo punuk, ”Aakumi kambunuk nogo menggam nen muk ineenik agago mippiyareegerak o,” yinuk, yogo logonet, it abet mbareegwaarak nogo ando iniki abut laganggo menggaarak kwe, 19o wurik ili agago liiru mbanogo pugu mengga kwak, Ala eeriyak kooneegerak nogo mondok logogin mbaruwak nduk, ari logonet,
”An napuri kenok ti, neenu aret minggirak o.
Ndi, yi aakumi ndi aakumi abok aret, An Ala aput
aret o, yogwe iinok, it maluk eekwi nogo mbo pogo logowak o,”
yinuk, yereegerak me, it aap ti togop aret eeko menggaarak kwe, Ala nen, ”Eeriyak,” kooneegerak ti, o eyak wurabak nu'lek minggi kwak, mondok nu'lek aret logogin o.
20O nggwok wurik inikime ti, togolowak mbuti emas inom, mbuti perak inom, ti mendek mban ogobakkigirik menggerak lek o. Ata, ando eyo mendek inom, ando nggween mendek inom, ogobakkigirik menggerak. Togolowak abe kigirikwe kenok ti, alik ambi eeriyak nduk, leenak menggerak. Ndi, maluk negen kenok perak, we ugun eekak yuurak nduk menggerak. 21Togop aret menggerak me, aap ambit-ambi togolowak koorak mondok obeelom wonage kokwak, at omaluk mbo pege kenok, at ogoba nen yi mendek ndi mendek obeelom iya lombok eeke logowak nduk, ogoba ake mondok leenak aret menggerak. 22Wologwe tawe iniki nengge nogo kokwak, kat togop eekkake kero, mbo punuk mbagangge logot o. Abe kenok mban eekwi inom, iniki abet mbakwi inom, aakumi iniki kunik aganakwi inom, iniki ambit lambunik wonogwe inom, it aakumi iniki abe paga, ”Ninogoba Ala aret o,” yinuk, yogwe nogo, kinom nen eekwi ti mendek mban mugurok nage logot o. 23Aap wi negen wone aan wonet nugwi paga ndugwi pugwi nogo kat keenu me, mbo pege logot o. 24Kat ninowe ayeloman aret kenok, ndugwi pegak eeriyak ti mage o. Ata, yi aakumi ndi aakumi abok aret koone yanggorogon yorage, wone mamunirage, maluk eeppagagwi kwe, onggo yoraga'lek puk wonage, eeke logot o. 25It kinom ogoorak logonet, wone alik agan nugwi nogo, mbo punuk, abe wone ineenu aruwak nduk, Ala nen eeppiyoorak kagak eerukwak, koone yanggorogon mamunirage logot o. 26Ala nen togop eeppiige kenok, Ibilit mbake menggerak eeko logowak nduk, keele maarogo piyareegerak kagak, iniki warak a'nuk, keele nogo piinggo'nok wundi wogo logogun o.
Currently Selected:
2 TIMOTIYUT 2: WNO
Highlight
Copy
Compare
Share
Want to have your highlights saved across all your devices? Sign up or sign in
