2 PETERUT 3
3
Yetut woroorak wone
1-2Nowe-nawot o. Kit an niniki kunik me, liiru ambi aa'nduk mbanggiragagirak nogo ndak-ndak, yogondak ambi yi inom aret mbanggiragi o. Kit wone alik yogwe lek, obeelom wone kenok mban abet mba'nuk mugurok nogwe me, it maan aa'nduk Ala nen aap at oone yorogo logowak nduk, leenogo piyareegerak wone yorogo nogogwaarak nogo inom, ninowe endagembogut ninagap ndaka awone lengganak aap nappiigak mendek nen yokkirogo nogogwaarak nogo inom, kit abeko logobagik nduk, liiru yi mbanggiragi o. 3-4Kiniki aberak logobagik nduk, wone aa'nduk lombok yi aret yokkira o. Peebi o age yobok paga it aakumi iniki nen nengge kenok mugurok nogo menggaarak nogo nen, wogo logomenggaarik, ”O yi, maan Ala nen wakkagagerak kuli nen, nok, yogondak kuli alik aga'lek itok menggerak kagak, ninombomini nen, O yi lek eeri woraagin o, yogwe iigak, kambit nogogwaarak me, Woraagin, yereegerak nogo, eebe wage lek, ngge?” yinuk, kinagi'ndok kanggo logonet, miyuk-meya eerogo pinagagwi iyaamunggup o. 5Ti yogwe nogo ti, Ala oone 6paga nen mbogut wakkage, nggween wakkage, eeke logonet, niyo mban wonage mbareegi, at Ala nen, ”Nggween aruwak o,” ari mbareegi nggween aret age, ti'nuk, peebi mayu nappi wagagerak nogo paga niyo yenggenit lagangge logonet, o wakkagagerak nogo maluk eerogo pege, eereegerak nogo ineenu logonet kwe, taganogo punuk mbo pogo menggaarak kwe, 7yogondak mbogut-nggween ninigen kogo monggoorak yi nogo ti, peebi it aakumi maluk eeko menggaarak inawone amburu mbanogo inowak leembunuk, ineebe lek eerogo piyoorak eyom nogo paga, o yi kani puwak nduk, at oone paga porogo wonage wone nogo kobak logonet agan nugwi me, peebi age yobok paga eeke kaagun o.
8Ti agan nogo logomenggaarak kwe, noreewi o. Kit an niniki kunik me, wone ambit iluk yi yokkiraagin nogo, kobak eerogo mbo pugup o. Nit nen o ne ambit wege mbakwi nogo, at ninogoba Ala nen 1000 tahun aret mbake, ndi, nit nen 1000 tahun mbakwi nogo, at nen o ne ambit wege mbake, eeke menggerak. 9Togop mbake menggerak me, ”An peebi woraagin o,” yinuk, yereegerak nogo, it aakumi ando nen, ”Mbet-mbet waga'lek me, pilit yereegerak kwa?” yinuk, mbakwi nogo kwak, kit togop mbako logogup o. Ata, ”Ala nen, Aakumi maluk eeppiyoorak ti neebi o, mba'nuk, nit yi aakumi ndi aakumi abok aret niniki koonogo punuk, ninomaluk mbo puwak nduk, iniki yanggoppunuk, to'ninake wonage o,” yinuk, mbako logonip.
10At ninowe endagembogut woroorak nogo ti, ”Tiyom woraagin,” mbaka'lek me, aap yogoot wagangga nogo pogom abera'lek me woraagin o. Ndi, wage kenok, mbogut-nggween yi lek age logonet, mbogut telanggage, tut-laaluguragan mbogut paga menggerak inom, yi mendek ndi mendek nggween paga menggaarak inom, abok aret kani nanet nage, eeke kaamunggup o. 11-12Yi mendek ndi mendek abok togop aret lek arigin me, nit ninobaabut nonggop logonet eerit nogo logowok mbakop? Lek o. Ninowe wage eyom mbogut-nggween kani nanet nage, ndi, tut-laaluguragan kani eyak mondok aganggen alik nen amburu tigi-tigi wungge logonet lek eeppege, eerigin me, ”Ninowe mbet-mbet woraawak o,” yinuk, tokkogo logonet, nineebe apit Ala mban wogo'nuk ninobaabut mondok koonak logonet ninowe mugurok nogo logowok o. 13At Ala nen, ”Mbogut-nggween ngget mendek ogobakkigirogo punuk, aakumi obeelom eeko menggaarak kenok mban time logowak nduk, unde eeppinagagin o,” yinuk, abok yo'niragagerak nogo unde eeppinanuwak nduk, tokkogo ogoorik o.
14Togop me, noreewi o. Kit an niniki kunik me, wone ambi yokkira o. Nit o ti unde eeppinanuwak nduk tokkogwe me, maluk kinoba lenggenak lek, kiniki abu obeelom Ala kinom kiniki ambit lambunik wonage me kiya woraawak nduk, kulinik-kalinik kiniki ndegenggologo logonip o. 15-16At ninore niniki kunik Pawulut nogo nen an wone yokkiragarak yi nogo abok aret yi mbuku ndi mbuku liiru mbangge logonet, wone ando taberak negen mbangge menggerak. Ndi, it aakumi Ala wone awo liippega'lek mendek, iniki kole aga'lek nogo nen, ineebe lek eerogo patuwok nduk, Ala yereegerak wone liiru mbanak ando abut laganogo yorogo logonet, Pawulut liiru taberak negen mbangge menggerak nogo togop aret abut laganogo yorogo menggaarak nineenu kwe, Ala nen at iniki nggaganogo yoge kagak liiru mbanggiragagerak nogo ndak-ndak, ”Ninowe mbet-mbet waga'lek kenok ti, nit abok ninagap ndaruwak nduk to'niige me, niniki ndegenggologo logorak nanonggwaan aret o,” yinuk kiniki kwippunuk logonip o.
17Nowe-nawot kit perak, wone yokkiragarak nogo ti, abu kineenu aret me, it Ala wone taganogo punuk inoone ugun koombunuk yokkirogo menggaarak nogo nen nomongginakwi iinok, muguren nogo logonet, kit wone abet mba'nuk mondok nu'lek obeelom wonogwe kwe, maluk eekkolookwak, mondok kinaket paga logonip o. 18Ninogoba Ala iniki kunik nen eeppinanege menggerak nogo ambinom eeppinagage, ndi, at ninowe endagembogut ninagap ndaka Yetut Keritut eebe kineenu aret kwe, ambinom kineenu age, eerubagip nduk, yokkiragi o. Ndi, ”Yogondak nen, nok, mondok logorak kuli at eebe mondok tiyanak aret logogin o,” yinuk, an Peterut nen abu ti aret yokkiragi o. Wa! Amin.
Currently Selected:
2 PETERUT 3: WNO
Highlight
Copy
Compare
Share
Want to have your highlights saved across all your devices? Sign up or sign in
