2 KORINDUT 2
2
1Togop kenok, an kiya woroorak niniki kooneegirak nogo ti, kit eereegutak paga an niniki wakkolage nogo, lek aga'lek kagak kiya woroorak mbarulik o. Ata, niniki ale'nggen ee'nake kenok perak, kiya woroorak kooneegirak. 2”An niniki wakkolage neenok, eyak wappaniyak kit aret me, niniki puru agan kiya wage logominggirik, mbekkirage paga kit kunduk kiniki wakkologwe me, tamuni nen an niniki eyak wappanumengga? Lek me,” mba'nuk, niniki ale'nggen ee'nake kenok perak, kiya woroorak kooneegirak o. 3Liiru aa'nduk mbaneegirak nogo ti, an niniki ale'nggen wonage neenok, kit togon kiniki ale'nggen wonogwe abet aret mbake me, kiya wage logominggirik, kit obeelom eekwi paga niniki ale'nggen kinombariyak mendek maluk eekwi paga niniki wakkolookwak me nduk, puk age logonet, liiru mban aa'nduk mbaneegirak nogo. 4Kinabuwa nen niniki aaninggin ndugu agan unggwage logonet, niniki wakkolage, kinale ambik ari, eeke logonet, kit kinake liiru mbaneegirak nogo ti, kit kiniki puru yubagip nduk mbanggiroolik o. Ata, an aakumi inabuwa mbake minggirak kwe, kit perak, kinabuwa mondok nggwok lombok mbake minggirak kineenu arubagip nduk mbanggiragagirak o.
Aap ambi maluk eeke kenok, mbet-mbet mari eerogo puurak wone
5-6At aap maluk eereegerak paga nit niniki wakkologwe nogo ti, an nalik mban lek o. Nit apit maluk eeppinaneegerak me, niniki wakkologo ogoorik o. ”Nit abok aret maluk eeppinaneegerak o,” yinuk, kinoone kole ambinom mbeririyak ti mage o. Ata, kit aa'nduk kineebe apit nen maluk onggo eeppereegutak ti mban aret logowak nen teppinip. 7Ndi, yogondak aap nogo iniki wakkolage logonet, mbo pinaganuk mbaganukwak, eereegerak nogo mari eerogo mbo pogo logomonggotik, iniki eyak wappogo logonip o. 8At abuwa lombok mbako logonet, kiniki kunik eeko logobagip nduk, yokkiragi o. 9An liiru mbaneegirak nogo ti, yi eeriyak ndi eeriyak yokkirage neenok, ”E o,” yinuk, ”Ndak-ndak eekwi iyaamun ilik, mbo pugwi iyaamun a?” yinuk, kinabut mbaniyak nduk liiru mbaneegirak. 10-11It aakumi maluk eeppinagagwi nogo kit nen inomaluk mari eerogo mbo pugwi kiinok, an kunduk inomaluk mari agago mbo pege logogin o. Ibilit nen eeriyak koongge menggerak nineenu me, nit nen aap ambi omaluk paga aberak wonogwe niinok, Ibilit nen, ”Nanonggwan aga o,” yinuk, niniki nggagani wage menggerak me, maluk eeppaneegerak mari eerogo puurak, ”Ambi wonage ilik, lek a,” ti, liirogon an neenggo'lek kwe, ”Wonage negen aret,” mba'nuk, kinake aret Keritut enggaanom paga paganogo punuk mari eerogo mbo pereegirak.
Pawulut o Terowat logonet, iniki piirik wonagagerak wone
12An Keritut eeke nagagerak obeelom wone yoraakit nduk, o Terowat wage nagagirik, obeelom wone yorage logokit nduk, ”Ala nen tu koonogo paneegerak kagi,” mbareegirak kwe, 13ninawot Titut neya waga'lek mbareegi, niniki piirik logonet, it aakumi Terowat mendek keyage wappiinok, o Makendoniya yime aret wagagirak.
Ninowe Keritut ninom ndegen-ndegen aago mondok tiyanak nugu logorak wone
14Yime wagagirak wonage me, Ala nen mbo panulik o. It aap wim nambuppunuk, wiiraawak nduk, aap waka'ngget awuri inom ndegen-ndegen aago kombogonak wogo mengga kwak, nit ndak-ndak ninowe Keritut ninom ndegen-ndegen aago mondok tiyanak nugwi me, Ala mondok alut eeko logowok o. Obari obeelom wiganinuk nage minggi kwak, Keritut eeke menggerak obeelom wone nit paga nen wiganinuk nage logowak nduk, Ala nen eeppinanege menggerak. 15It aakumi inagap ndarak inom, inagap ndarak lek mendek lek eerogo piige inom, inenggela'me logonet, obari abe Keritut nen Ala ake kungge menggerak nogo pogom nit aret o. 16It aakumi lek eerogo piyaagin nogo nen obari nogo kogo nagaatik, ”Yi ninooke mendek aret me, abet mbaruwok o,” yinuk, yuurak op aret kwe kagak, mbo punuk kambit nogo menggaarak. Ndi, it inagap ndarak nogo nen perak, obari kogo nagaatik, ”Nineenik ee'ninaburak mendek yi aret kogo,” yinuk, waganggo menggaarak me, ineenik aret logogun o. Ala nen nit aakumi inenggela'me togop logorak kooneegerak kwe, nit nen eeriyak meek ee'ninake o, noreewi. 17It ando nen Ala wone yorogwe paga, ”Ambi kolaawok o,” yinuk, yokkirogo menggaarak kwe, nit perak, togop lek o. Yokkiraawok nduk, Ala nen nappinani wagagerak me, Keritut ayeloman logonet, at enegen niige kagak, we ale'nggen paga aret yokkirogo monggoorak.
Currently Selected:
2 KORINDUT 2: WNO
Highlight
Copy
Compare
Share
Want to have your highlights saved across all your devices? Sign up or sign in
