1 TIMOTIYUT 5
5
Abet mbakwi iinok, yoroorak wone
1It aap inanggok iinok, koone omaawi paga mberiraagun o. Yi nogobamini kwak me nduk, iniki eyak wappiige logot o. It aap tawe ti, kat kawuri kwak, 2it kumi inanggok ti, kagalomini kokwak, ndi, kumi tawe ti, kat kiriwi kokwak me, kiniki maluk abeka'lek logonet, yorage logot o.
3It kumi togwe inaagalogwe inarum logorak lek iinok, liippiige logot o. 4Kumi togwe inaagalogwe inowologwe wonogwe iinok perak, it nogo nen Ala wone ndak-ndak eeruwak nduk, inagalo inowolo it nduk, yeenggwaarogo logowak o It ndegengginako nogogwaarak nogo onggo yogondak kit kinagalomini-kinogobamini ndegeninako logonip o. Togop eekwi kiinok, Ala inikilom mbake menggerak. 5Kwe ambi togwe aret kwe, aagalogwe nen yeenggwaaga'lek kenok, ”Ala nen yeenggwaanege logowak o,” yinuk, iniki Ala paga luunik logonet, ko'lu-kiime Ala nggino yoge, tamban eeke, eeke menggerak kenok, kwe ti, abe togwe aret o. 6It kumi ineenggi eekwi lek amburu warak mban na mbarit nugwi iinok ti, ineenik wonogwe kwe, kambak negen aret wonogwe o. 7Kumi togwe togop eekwi iinok, aakumi inoone inoba piyookwak, wone yi ti, kulinik-kalinik koone omaawi paga inaruk wake logot o. 8Aap ambit-ambi at owe-awot ndegeninakeelik ti, maluk aret kwe, at apuri lombok ndegeninaka'lek kenok perak, it aakumi abet mbaka'lek mendek ti we maluk mbuuluk negen kwe, aap ti perak, maluk mondok nggwok aret eeke o. At abet mbareegerak nogo ti, mbo pegerak wonage o.
9Kwe ambi nda'nagagerak kagak 60 tahun eeka'lek kenok, endage mbaniyak lek o. Ata, ogonggelo ambit wogo kagak togwe pugu kenok, 10”Yi obeelom ndi obeelom eeke menggerak,” yogwe iinok, aagalogwe liirogon tawe eeginaka kenok, aap nggiru inanoniya laka kenok, it abet mbakwi Ala apuri iniyok koorinaka kenok, it aakumi aaninggin inoba agaatak eyak wappiiga kenok, ndi, yi obeelom ndi obeelom eekwi abok aret, ”An unde o,” yinuk, eeke nagagerak kenok, endage mbaniyak op kwe, 11it kumi togwe awo ndugum iinok perak, inendage mbaniyak lek o.
It kumi ti, iniki nengge kenok, Keritut wone waganeegwaarak mbo punuk, aap alik koloorak koonugun me, inendage mbaniyak mage o. 12It aa'nduk mugurok noorak miireegwaarak nogo mbo pugwi nogo paga maluk aret eeppiyaagin o. 13Ooluk-ooluk nogo yit nogo logonet, ineenggi lebenak eekko'net nugu menggaarak. Ti mban eerit nugwi ti lek o. Ata, wone inambe irip paga wonok nugwi, ambi me wok yegak nugwi, eerit nugu logonet, wone yuurak lek nogo mendek kagak ugun agan nugu menggaarak. 14Togop me, it kumi ti nen ambi eerumenggaarak paga it ninom ogoorak nogo nen ninenggali wappinanukwak, it kumi ndugum me togwe piyamenggerak nogo inogonggelomini kologwe, inaagalogwe ndaganakwi, inamelak wogo eekwi, eeko logowak nduk, op aret mbake agarik o. 15Kumi ando perak, Ibilit mugurok nugu logowok nduk, muk iniyok paga yungguninuk nogo agaarik o. 16Kwe iniki abet mbake nogo ambi nen agalo togwe wonage kenok, it Ala apuri abunuk aaninggin inoba piyookwak me, at aagaluk nogo nen yeenggwaage logowak. Ndi, it kumi togwe aret kwe, inaagalogwe lek iinok perak, it Ala apuri nen yeenggwaarogo logowak o.
17-18Ala nen ari logonet, ”Sapi nen gandum mbato negen agabolo mbilanit nege logonet, ambi nengge kero, ambe keele maariyak mage o,” ndi, ambi, ”It aap yabu eekwi nogo yabu onggo ndak-ndak wogoroorak ti op o,” yinuk, yereegerak liiru mbanak wonage me, it aap Ala apuri unde menggaarak inendage tiyanak kwe, obeelom lombok inarum wonogwe me nduk, inendage ambinom tiyappuurak ti op aret o. It Ala wone tamban nggwok paga yorogwe, wone mamunirogwe, mondok nabenak mban eekwi iinok ti, abunuk ambinom inendage tiyappiigo logonet, liippiigo logowak o. 19Aap mbere ilik, kenagan a, nen, ”Togop eekerak o,” yinuk, yogwe lek iigak, at ambiret nen mban aap Ala apuri unde menggaarak ambi oone oba pege kenok, at oone koneniyak ti lek o. 20Aap ambit nen maluk mban eeke kenok, it aakumi abok inagabiti mbaruwak nduk, nggwok paga aruk wake logonu o.
21An nogo, Ala inom, Keritut Yetut inom, it mbogut paga yonggo nugu logowak nduk, leenogo piyareegerak melaikat nogo inom, abok inenggaanom paga an wone yi, abet aret yokkigi o. An wone yokkege yi, abok aret eeke logonet, kat kinom kunik kenok mbo piige, ndi, aakumi ugun kenok yorage, eeke logogun o. Ata, aakumi abok aret ineenu a'nuk, eeko logowak nduk, yorage logot o. 22Ala apuri unde logowak nduk, inanobak mbet-mbet tebeniyak mage o. It ambi maluk eekwi iinok, kat kinom nabenggoloorak ti mage mban o. Kat kiniki kiikak naka'lek mondok alik mbeenak logot o.
23Kaanogum andi eekkake, keebe kuluk-kuluk ndeyak eekkake, eeke menggerak me, kat niyo mban nengge logogun o. Ata, anggur amburu mbuuluk inom nenggak eeke logot o.
24It aap mippiyoorak nduk, inabut mbangge logonet, aap ando maluk eekaatak kenom age kenok, mbo piigo menggaarak kwe, it aap ando perak, inomaluk nobarak kagak, mippiigaatak me, peebi inomaluk kenom aret age menggerak. 25It obeelom eekwi ti, togop aret iigo monggoorak Ndi, it ando obeelom eekwi ambi nobarak wonage kenok, kumaarak togop mban logogin lek o. Kin arigin aret o.
Currently Selected:
1 TIMOTIYUT 5: WNO
Highlight
Copy
Compare
Share
Want to have your highlights saved across all your devices? Sign up or sign in
