1 TETALONIKA 4
4
Ala inikilom ninombaruwak nduk, eeko logorak wone
1Ndi, noreewi o. Wone irip paga iluk ambi yokkiroorak mbakoorak me yokkiraawi o. Ala inikilom kinombaruwak nduk, ”Nonggop eerit nogo logorak?” mamunggirogogurak nogo waganggo nogogutik, muk eerit nogwe aret kwe, ambinom mondok nggwok togon eerit nogo logobagip nduk, ninowe Yetut nen yo'nirage kenok lengganogo yokkirogo o. 2Ninowe Yetut nen, ”Yoret o,” yinuk, yo'nirage mbareegi, wone, ”Yogop ee'nu, ndogop ee'nu,” yinuk, lengganogo yokkirogo nogogurak ti, kineenu aret o. 3At Ala nen kit maluk eeka'lek mondok at ake leenak logorak mbake nogo ti, kit kumi ugun wurinabit noorak mage nduk, mbake menggerak o. 4-5It aakumi endekem mendek nogo nen Ala ineenggo'lek logonet, aganggen aganake kenok kumi ugun-ugun kologwe nogo kwak, kit togop kologo logorak mage o. Ata, kinendage op logorak nduk, ”Ala endage paga lambumbinanuwak o,” yinuk, maluk eeka'lek inabuwa mbako logonet, kologo logonu o. 6-7Nit maluk eerit nugu logowak nduk, at Ala nen mii'ninabulik o. Ata, maluk eeka'lek at ake leenak logowak nduk, mii'ninabeegerak me, nit aa'nduk ninoone omaawi paga yokkirogo nogogurak nogo ndak-ndak maluk togoti eekwi iinok, Ala nen onggo koonogo wo'nirage menggerak me, kinoreeluk ambi maluk eeppege logonet, at akwe kote wuriyak mage o. 8Togop me, aap ambi nen, ”Wone yi Ala nen yereegerak lek o. Aakumi nen aret yagaarak o,” yinuk, taganogo mbo pege kenok, at nen aakumi mbo piige ti lek o. Ata, at Aberiniki wo'nirage Ala nogo aret mbo pege menggerak o.
9Kinoreewi kinom kiniki kunik aganabit nugwi nogo ti, Ala nen muk mamunggiragagerak me, wone ti mendek ambi liiru mbanggiroorak lek aret kagi o. 10Kit kinoreewi abok o Makendoniya menggaarak nogo abet aret kiniki kunik aganakwi kwe, ambinom kiniki kunik aganako logobagip nduk, lengganogo yokkirogo o. 11-12It aakumi abet mbaka'lek mendek nen liirogon eerit nugwi kiinok, kinayuk wuko logowak nduk, at ambi eerit nage paga kiniki panggombegak eerit nagup o. Ata, kit kinendage op logobagip nduk, kiname liirogon logonet, kit kinobaalombok mban eerit nugwi, ndi, kineenggi omaawi logobagip nduk, nit aa'nduk kinaruk wareegurak nogo liirogon aret eekwi, eeko logobagip nduk, wone lengganogo yokkirogo o.
Ninowe woroorak wone
13Noreewi o. It aakumi kambunuk nonggop ogo menggaarak nogo, wone kineenggo'lek logorak ti, nineebi o. Aakumi ando iniki luunik ambi lek me, inore ambi kangge kenok iniki wakkologo mengga kwak, kit kiniki togop aret wakkolookwak, mbininogo yokkiraawi o. 14At Yetut kangge nagagirik, mi'nagagerak nogo nit abet mbakwi kenok, it aakumi Yetut inom kunik logonet, kambeegwaarak nogo at Ala nen ineenik agago mippiyaagin abet aret mbako logowok o.
15Ninowe wage kenok, it aakumi kambeegwaarak nogo wonogwe iigak, nit awo nineenik wonogwe nogo ninaa'nduk lagi nagun lek o. 16At ninowe lombok kuum ari, yonggo mbogut paga inowe nogo oone ari, Ala ambuti luu'ngget oone eeke, eeko logomenggaarik, ninowe mbogut paga nen wambi wage kagak, it aap Keritut kunik logonet, kambeegwaarak nogo, at Ala nen inaa'nduk mippiyaagin o. 17Mippiige logominggirik, ti'nuk, nit nineenik awo wonogwe nogo, it ninom ndugwi enggela'na oolo taati ninowe ninom lambunuwak nduk, wo'niren nagin o. Wo'niren nage kenok, ninowe ninom mondok-mondok logogun o. 18Wone ti, ninowe nen aret yo'niragagerak me, ti paga kiniki eyak wat-wat eeko logonip o.
Currently Selected:
1 TETALONIKA 4: WNO
Highlight
Copy
Compare
Share
Want to have your highlights saved across all your devices? Sign up or sign in
