1 TETALONIKA 2
2
Pawulut o Tetalonika logonet, eeke nagagerak wone
1Noreewi o. Nit we aanom warogo kiya woroolik nogo ti, kit kineenu aret o. 2Nit o Pilipi wonogwe niigak, aaninggin-paaninggin ninoba pinanugwi, miyuk-meya eerogo pinanugwi, eereegwaarak kineenu nogo kwe, kagak, Ala nen yo'niragagerak wone obeelom wone nogo it apit aret, ”Nineebi o,” yogwe iigak, Ala ninom kunik me, ninagabiti mbaka'lek yokkirogo nogogurak nogo o. 3Nit kinaruk wako logonet, yokkirogo monggoorak nogo nit nineenggo'lek logonet yokkirogwe, nit ambi kolaawok nduk yokkirogwe, kinambokan laganuwok nduk, pilit wone yokkirogwe, eerulik o. 4At Ala nen ninabut mbambunuk, obeelom wone unde eeppinaneegerak nogo ndak-ndak aret yokkirogo monggoorak o Kit kinikilom mbarubagip nduk yokkirogwe lek o. Ata, at Ala nen niniki lombonninake menggerak nogo, inikilom mbaruwak nduk, yokkirogo monggoorak. 5Niniki laakot logonet, ninoone yokkirogo logolik ti, kineenu aret o. Kit kinageerok ambi kolaawok nduk, ninoone ai-ao yogwe ti, at Ala eenu me, yulik mban. 6Ndi, Keritut ayonggo nugu logowok nduk mippinaneegerak me, ninoone omaawi yokkiroorak op aret kwe, kit inom, it aakumi alik inom, nit ninendage nggwok eeppinanuwak nduk, woroolik o. 7Ata, kwe ambi at aagaluk abuwa nen ogome lamoppunuk oone yanggorogon yoge minggi kwak, nit kinenggela'me logonet, togop aret ninoone yanggorogon aret yokkirogo nogogurak nogo o. 8Kinabuwa lombok mbako logonet, kit niniki kunik eekkinabeegurak me, obeelom wone ti mban yokkiroorak ti mbarulik o. Ata, kinake lombok kambuurak kenok perak, op aret mbareegurak. 9Noreewi o. Nit eerit mban nogo logonet, ndeyak eerogo pinaneegerak nogo ti, kiniki abe'nip o. Ala nen yo'niragagerak wone obeelom wone nogo yokkirogo logonet, kit mban ambinom aaninggin kinoba pinagagukwak, ando nit nen liingge inom, oonikiya inom, eekko'net nogo nogogurak nogo o.
10Nit kit abet mbareegutak nogo kinenggela'me logonet, Ala wone liippunuk eekwi, ndi, maluk eeka'lek abu obeelom eereegurak paga kinoone ambi ninoba pinanega'lek wonogwe, eerit nogogurak nogo ti, Ala kunduk, kit kunduk, abu aret niyareegutak o. 11-12Ala mondok tiyanak logonet, ”Kit tiyappinagakit nduk, nabu'me woraanip o,” yinuk, ayonggo pinagareegerak iniki mbake ndak-ndak eeko logobagip nduk, aap ambi apuri kenok yorage nogo kokwak, nit togop aret kit kinaruk wakwi, kiniki eyak wappinagagwi, kini wuppinagagwi, eeko nogogurak nogo kineenu aret o.
13Togop me, Ala wone yokkirogogurak konenggo logonet, ”Yi we aakumi inoone lek o. Yi Ala wone nit abet mbakwi ninikime koonninake menggerak wone abet aret o,” yinuk, waganeegutak me, nit puk aga'lek kulinik-kalinik, ”Ala wa,” yogo monggoorak. 14-15Noreewi o. It aap Yakuri nogo nen it Ala wone yorogo menggaarak nogo inookwi, ninowe Yetut warogo pugwi, ndi, nit kunduk mugogo nappinanugwi, eeko nogogwaarak nogo nen it Ala apuri Yetut Keritut inom kunik logonet, o Yureya yi awi ndi awi kuwak eeko menggaarak nogo piyaginabit nogogwaarak nogo ndak-ndak, it kinowe-kinawot nen kit togop aret eeppinagagwi iigak kinogogumbuk logonet, waganeegutak me, it inogogumbuk logonet, waganggo nogogwaarak ndak-ndak kit togop aret waganggwi kiigi o. It aakumi Yakuri eereegwaarak nogo ti, it aakumi abok ineebi mbako logonet, inom ogoorak wonogwe me, Ala kunduk inikilom inombakeelik mondok eebi inombake menggerak o. 16It aakumi endekem mendek Ala nen inagap ndariyak wone, ”Kit yorogo logorak lek o,” yinuk, nombambinanogo menggaarak me, it maluk ambi nabek mban eerit wogoga, wogoga, peebi irip paga maluk nggwok eekwi iinok, Ala anini inoba piige menggerak nogo ndak-ndak, yogondak aakumi konenggwi iyo nduk, nombambiigwi me, Ala anini mondok inoba wonage o.
Pawulut nen ne ambi paga pegiya noorak mbareegerak wone
17Ndi, noreewi o. Nit perak, niniki kinoba aberak mban wonogwe kwe, ne ambit iluk nineebe alitak wonogogurak me, mbet-mbet pekkiya woroorak, ”Ao,” lombok mbareegurak. 18Noreewi ninom pekkiya woroorak mbakwi, ndi, an nalik ne ambi paga lek o. Ata, kulinik-kalinik pekkiya woroorak mbake, eereegurak kwe, Ibilit nen non mbanogo pinanege kenok, wonogo ogoorik o. 19Nit niniki luunik inom, nit niniki ale'nggen mbakwi inom, obeelom eekwi niinok, nggare-nggare mendaarak negen makoota yippanege kenok, wogoppatiyak nogo inom ti, tamuni mbakop? Lek o. Nit ninowe Yetut wage kenok eeppinaniyak nogo ti, kit abet mba'nuk eerit nugwi paga aret o. 20Nit tiyappinanugwi, niniki ale'nggen mbakwi, eeriyak ti, kit kineebe paga aret o.
Currently Selected:
1 TETALONIKA 2: WNO
Highlight
Copy
Compare
Share
Want to have your highlights saved across all your devices? Sign up or sign in
