1 PETERUT 4
4
Ninobaabut alik ngget mendek eerogo pinaneegerak wone
1It aap andi yagan wako logonet, maluk eekulik me, at Keritut andi-pandi eerogo pugwi iigak, iniki kwi'ndak logonet wagangge nagagerak nogo kokwak, kit togop ndak-ndak waganggo logonip o. 2”Eeppanugwi nogo ti op aret o,” mbako logomonggotik, yogondak kuli nen nggween paga ya'i wonogo logonet, kiniki nen nengge nogo mban mugurok nogo logogup o. Ata, Ala iniki mbake nogo mban ndak-ndak eerit nogo logonip o. 3Kit kinobaabut aa'nduk nen it aakumi Ala wone konengga'lek logonet eeko mengga kwak, we ugun uugwe-ugwe mba'nuk eekwi, kiniki nen nengge kenok mugurok nugwi, amburu kumili aganake menggerak mendek ndonggorogon nenet nugwi, ndem unggwogo logonet kwaanggen wakwi, amburu ndonggok togon nenok kumili-kumili agan nogo logonet maluk eekwi, kuguwak amili kunggwi, eeko nogogutak nogo, yogondak ambinom eeka'lek kiinok, 4it aakumi Ala wone ineenggo'lek mendek nogo iniki mondok lek aret me, yi maluk ndi maluk eeriyak abok aret koombunuk, eerit nogo logonet, ”It yi ninom eerit nogwe lek yi, nano nduk puk wonogwe mbakop? Wi,” yinuk, kinomba'nuk, meek eerogo pinagagwi kwe, 5it aakumi maan kambeegwaarak inom, nineenik wonogwe inom, Ala nen nit abok ninawone amburu mbanogo ninowak looniyak nduk koonogo pereegerak me, it togon eeko logomenggaarak Ala enggaanom paganogo yorugun me, it eekwi nogo kit kinom eeriyak mage o. 6Ndi, it kambeegwaarak nogo ti, ”Aap maluk aret o,” yinuk, andi-pandi inoba piigwi iigak, kambeegwaarak kwe, at Ala mbake menggerak ndak-ndak inogoma mondok-mondok ineenik logowak nduk, obeelom wone yoragagerak nogo aberak logonet, kambeegwaarak.
Ala apuri nen eeko logorak wone
7O age yobok paga eeriyak abu koorok panggo yegerak me, kiniki kwi'ndak nu'lek logonet, tamban eeko logobagip nduk, kinaket paga logonet, tum wako logonip o. 8Aap ambi at ore imbirak iniki kunik wonage kenok, at maluk eeppege nogo onggo yoga'lek tebenogo punuk, imbirak iniki kunik menggaarak nogo kokwak, kit togop aret, ”Ninikikiniki kunik eeko logonip o,” yinuk, wone ambit ti aret yokkiragi o. 9Kinoreewi ambi kiya wogwe iinok, kineebi inombarugup. Ata, kiniki kunik paga kinambi magarogo logonip o. 10At Ala nen eeko logorak ninalitak lombok unde eeppinaneegerak me, ”Ala iniki kunik nen unde eeppaneegerak me, niniki kwippunuk eerikit o,” mba'nuk, kit mban-mban at ambi nen at ambi obeelom eeppegak eeko logonip o. 11Yi eekak ndi eekak eeko logonet, ninowe Yetut Keritut eereegerak paga at Ala omaawi ambik ayuk warak me, yi aakumi ndi aakumi abok at abu'me logonet, oone mondok-mondok konenggwi nogo, ”Abet o,” yinuk, tiyappogo logowak nduk, kit aap ambit nen Ala wone yoroorak mbake kenok, Ala ari menggerak wone nogo aret yorage, ndi, ambit nen aakumi yeenggwaarage logorak mbake kenok ti, Ala omaawi eeppege kagak yeenggwaaranet nege, eeko logonip o.
Ala apuri andi-pandi ninoba pinanugwi iigak eeko logorak wone
12Nowe-nawot. Kit an niniki kunik me, wone ambi yokkira o. Kit kinabut mbaniyak nduk, andi-pandi kinoba mondok alik negen eeppinagagwi ti, it aap nen eeppiigo menggaarak nogo mendek aret eeppinagagwi me, ”Yi nonggop eeppinanugwi? Iya,” yinuk, kiniki piirik logogup o. 13Kit andi-pandi kinoba pinagagwi nogo ti, at Keritut andi-pandi eeppugwi iigak, iniki kwi'ndak logonet waganeegerak nogo kokwak, peebi, at Keritut mondok tiyanak wage kinigen kogo logomonggotik, ”Nit togop aret tiyappinanigin o,” yinuk, kiniki ale'nggen mondok alik negen eekkinabigin me, ”Yogondak at eeppogo nogogwaarak ando aret eeppinanugwi me, op aret o,” yinuk, kiniki ale'nggen mbako logonip o. 14It aakumi nen, ”Kit Keritut oone waganggwi mendek aret o,” yinuk, miyuk-meya eerogo pinagagwi iinok, ”At Ala Aberiniki mondok tiyanak menggerak nit ninoba wuppinani wagagerak ninom wonogwe niinok, yo'nirogwe kagi,” yinuk, kiniki ale'nggen logonip. 15Kit nen aap wakwi, yogoot kiraakwi, maluk eekwi, aap ambi inawone mendek unde a'nuk mbanggwi, eekwi nogo paga andi-pandi eerogo kinoba pinagagwi iinok, kiniki ale'nggen mbarugup o. 16Ata, ”Kit Ala apuri mendek aret o,” yinuk, aaninggin kinoba pinagagwi iinok perak, kinagabiti lek logonet, ”Keritut endage paga eeppinanugwi me, op aret o,” mba'nuk, Ala mban, ”Wa,” yinuk, alut eeko logonip o.
17-18Maan at Ala nen ari logonet,
”It aakumi maluk eeka'lek obeelom mban eekwi nogo
inagap ndariyak eyom paga,
Nonggop togon ee'ninabiminggi? yinuk,
iniki piirik arugun me,
it an noone konengga'lek maluk mban eerit nogwe nogo perak,
nonggop togon eeginabigin mbakop?”
yinuk, yereegerak ndak-ndak, at Ala nen nit yi aap ndi aap abok aret ninawone mbanogo owak! oonninaburak eyom abu panggo yegerak me, nit Ala apuri aa'nduk ninawone mbambunuk, at oone yugu ndak-ndak eeka'lek logomonggoorak kenok, onggo mbuuluk wo'niraagin me, it Ala wone obeelom wone nogo mondok wagangga'lek iinok ti, teppiyaagin mbakop? Lek o. Mondok alik negen eeppiyaagin o. 19Ti kenok, kit andi-pandi eerogo pinagagwi nogo ti, at Ala iniki mbake nogo ndak-ndak eeppinagagwi me, kit liirogon obeelom mban eeko logonet, at kineebe ogobakkigikkinabeegerak nogo nen, ”Eerigin,” yegetak nogo, a'me liirogon aret eeke menggerak me, kiniki inom, kineebe inom, apit aret at unde logowak nduk, wogo'nuk logonip o.
Currently Selected:
1 PETERUT 4: WNO
Highlight
Copy
Compare
Share
Want to have your highlights saved across all your devices? Sign up or sign in
