1 PETERUT 2
2
Yugum o mabin pugu nu'lek ti, Yetut Keritut aret wone
1Ti kenok, kit pilit wone yogo monggotak inom, kinikime nen laakot mbako logonet, eeko monggotak inom, ”An iya kat iya,” yogo monggotak inom, aakumi miyuk-meya eerogo piigo monggotak inom, yi maluk ndi maluk abok aret mbo pinip o. 2-3At Ala nen obeelom eeppinanege kit eekkinake nogo muk liippogotak kenok, elege awo ngget ndarak yilak abu nen le yogonok yilak mili lenggena'lek wogoragaatak nonggo logonet, tawe ogo mengga kwak, kit kiniki kole aago wonogwe kiinok, Ala nen kinagap ndaruwak nduk, abe wone ti mban, ”Ao,” yinuk, waganggo logonip o.
4At Yetut nogo yugum pogom eenik menggerak me, yugum nogo obeelom aret kagak aakumi nen meek kenok, mbo nappereegwaarak kwe, Ala nen perak, ”Obeelom aret kagak eekwi o,” yinuk, leenogo pereegerak me, at ninowe endagembogut nogo abu'me mban kuwak eeko logonip o. 5-6Ala nen ari logonet,
”Yugum onggo nggwok ambi put Tiyon paga mabin negen
mippiminggirak me,
aakumi nen iniki at oba panggombugwi iinok,
inenggali arugun lek o,”
yinuk, yereegerak liiru mbanak wonage me, it aap Ala unde nen Ala awi wurik me Ala ake wam warogo pogo mengga kwak, kit togop aret Ala unde logonet, Yetut Keritut eereegerak paga Ala inikilom mbake menggerak mendek aakumi inake eeko logobagip nduk, yugum obaga lu'luk eerogo o wuko mengga kwak, Ala nen kit kineebe nogo paga at awi wukkolage me, kineebe kinalitak lombok at wogogo logonip o. 7-8Ti kenok, yugum onggo nggwok nogo ti, kit abet mbakwi nogo kinake aret mippereegerak kwe,
”It yugum o wuko menggaarak nogo nen o wuko logonet,
yugum ambi mbo pereegwaarak kwe,
yugum ogowa ndoonnaga o,”
ndi, ambi,
”Aakumi nen, Yugum yi nineebi o, yinuk, mbo pugwi iinok,
iniyogobit lik togon ngginnarugun o,”
yinuk, yereegerak liiru mbanak nogo ti, it aakumi iniki abet mbaka'lek mendek nogo nen, Ala wone wappunuk eerit naga'lek kenok, iniyogobit lik togon nggin nogwe nogo aret nduk yereegerak kogo o. It togop eeko logowok nduk, Ala nen aret kooneegerak kwe, 9kit perak, at Ala nen o apit me wonogwe nogo mbo punuk, o eya iya lombok kenok, wiigo menggam nogome logobagip nduk kinayonggo pege nagagirik, at eerubok eeke menggerak mendek paganogo yorogo logobagip nduk, ”Kit an mendek aret o,” yinuk, miirogo pinagage, ”Kinendagembogut an neebe unde logorak kit aret o,” yinuk, mippinagage, ”Kit an napuri maluk eeka'lek an nake leenak obeelom mban logomunggup o,” yinuk, leenogo pinagage, ndi, ”Kit an napuri lombok aret o,” yinuk, eekkinake, eereegerak o. 10Kit maan aa'nduk nen Ala apuri lek aret wonogogutak kwe, yogondak perak, at apuri eekkinabeegerak wonogwe, ndi, kit aa'nduk Ala nen kinabuwa mbake nagagerak nogo kineenggo'lek wonogogutak kwe, yogondak perak, at Ala kinabuwa nen obeelom eeppinagage nogo liippugwi, eeko ogotik o.
Ala ayeloman logonet, eeko logorak wone
11Nowe-nawot o. Kit aap nggiru negen nggween paga yi awi ndi awi mbaganit nogogutak nogo, ninom niniki kunik me wone ambi yokkira o. Kit kiniki nen nengge mugurok noorak kineebi mbakwi kiigak, nikkiren nage nogo, mugurok noorak ti mage o. 12It aap endekem iniki abet mbaka'lek mendek nogo nen, ”It maluk eekwi o,” yinuk, kinabok mbaniyak nduk eerumenggaarak kwe, obeelom mban eekwi liippinagago logomenggaarik, Yetut wage eyom paga Ala wogoppuwak nduk, inenggela'me logonet, kiniki mondok liippunuk eeko logonip o.
13-14”Ninowe endagembogut oone meek eerogo pukwak me,” yinuk, aap endagembogut aakumi kinarum menggerak Kaitat nogo inom, ndi, it aakumi obeelom eekwi nogo wogoppiigwi, maluk eekwi nogo aaninggin inoba piigwi, eeko logowak nduk, nggubereno pogom mippiigo menggaarak ineebe nogo inom, it wone unde menggaarak nogo nen abok aret wone lengganogo yokkirogwe iinok, ”E o,” yinuk, eeko logonip o. 15At Ala nen it wone lengganogo yokkirogwe nogo ndak-ndak eerit namonggotak paga, it aakumi iniki lek we ugun agan nogo menggaarak nogo inoone taganogo piigo logorak kinombareegerak me, kinogobamini nogo nen wone lengganogo yokkirogwe iinok, ”E o,” yinuk, konenggo logonip o. 16Kit aakumi inayeloman nogo kokwak lek o. Kit it aakumi we ugun wondet aago nugu menggaarak nogo ndak-ndak aret wonogwe me, ”An wondet eerogo paneegerak me, ugun maluk eerit nage logokit o,” yinuk, kiniki teeluk logorak ti mage o. Ata, ”An Ala ayeloman aret o,” yinuk, at yokkirage kenok mban eerit nogo logonip. 17It abet mbakwi kenok kiniki kunik aganakwi, it wee'lek mendek abok aret inabuwa mbakwi, aap iyo'nggok iinok inayuk wukwi, ndi, Ala kenok kinagabiti mbakwi, eeko logonip o.
At Keritut andi-pandi eeppereegwaarak nogo, nit niniki wakkagak eeko logorak wone
18Kit aakumi inayeloman yi, it kinogobamini inoone yanggorogon yokkirogo logonet, obeelom eeppinagagwi iinok inoone konenggwi, ndi, inanini nen mbekkirogwe iinok kineebi inombakwi, eeriyak ti mage o. Ata, mbekkirogwe, obeelom eeppinagagwi, eekwi iigak kwe, kagak, inoone konembunuk eeko logonip o. 19Kit maluk eeka'lek kiigak, andi-pandi eerogo kinoba pinagagwi iinok, ”Ala nen togop eeppinaniyak mbakerak me, op aret eeppinanugwi kagi,” mba'nuk, waganggwi kiinok, Ala ale'nggen kinoba pinagage kaamunggup o. 20Kit maluk eerumonggotak paga kinookwi iigak, kinoone lek puk wonogwe kiinok, aakumi nen kinaane'lek mbaniyak op mbakop? Lek o. Maluk eekotak paga kinookwi me, ”Op aret waka,” mbarugun kwe, obeelom eerit nogwe paga kinookwi iigak, kinoone lek logonet waganggwi kiinok perak, Ala kinabuwa mba'nuk, ale'nggen kinoba pinagage kaamunggup o. 21-23Keritut andi-pandi eerogo pereegwaarak nogo ti, at andi-pandi oba pugwi iigak, maluk eeke, ”An togop eerulik o,” yinuk, aane'le mbanggolage, ti eerulik o. It nen miyuk-meya eerogo pugwi iigak, at nen onggo miyuk-meya eerogo piige, wakwi iigak at wone onggo yorage, ti eerulik mban. Ata, iniki at ogoba Ala oba panggombunuk, ”Nogoba wone abe mban owak loongge menggerak nogo nen nawone mbanigin o,” yinuk, iniki kwi'ndak logonet, waganeegerak nogo ti, nit ninake aret waganeegerak me, at eereegerak nogo kokwak, nit togop ndak-ndak eeko logowak nduk, Ala nen ninayonggo pereegerak. 24It aakumi kanggaatak yabu eekulik nogo kwak, nit aa'nduk maluk eeko nogogurak nogo, yogondak ambinom eeka'lek obeelom mban eerit nogo logowak nduk, iniki Ala oba panggombunuk, at eyo karo-karo paga kangge logonet, nit ninomaluk abok aret waganeegerak me, at agabolo nibit-nobak eerogo wareegwaarak nogo paga nit obeelom ee'ninabeegerak. 25Kit aa'nduk ndomba kobak aago negen ugun nugu nogogutak kwe, yogondak nen at kinarum menggerak nggembala nogo abu'me logobagip nduk, ka wogogutak me, obeelom aret ndegengginake wonage o.
Currently Selected:
1 PETERUT 2: WNO
Highlight
Copy
Compare
Share
Want to have your highlights saved across all your devices? Sign up or sign in
