1 YAYA 5
5
Abet mbakwi paga nen it aap nggween paga mendek iniki koonggwi nogo tebenogo piigo logorak wone
1Kit nen, ”Yetut ti Keritut aret o,” yinuk, abet mbakwi kiinok, Ala nen aret ndakkinabeegerak me, kit at apuri aret ogotik o. Ndi, kinogoba Ala kiniki kunik mbakwi kenok ti, apuri ndarak nogo inom kiniki kunik eeginako logorak me, 2nit nonggop eekwi paga Ala apuri ninom niniki kunik wonogwe mbakop? Lek o. Ala nen, ”Yogop ee'nu, ndogop ee'nu,” wone yo'nirage nogo eeko logonet, ”Ala niniki kunik mbakwi ti paga at apuri ninom aret niniki kunik wonogwe kagi,” yinuk, mbako monggoorak. 3At Ala nen, ”Yogop ee'nu, ndogop ee'nu,” yinuk, wone yo'nirage menggerak nogo ti, aaninggin lek me, ndak-ndak aret eekwi kenok, ”Ala ninom abet aret niniki kunik wonogwe kagi,” yinuk, mbako logogun. 4Nit Ala apuri ndarak nogo nen it nggween paga mendek maluk eeriyak iniki koonggwi nogo, tebenogo piigo monggoorak Nit nonggop eekwi paga nen tebenogo piigwi mbakop? Lek o. Nit abet mbakwi paga it koonggwi nogo tebenogo piinok, nit tiyanak aret ogoorik. 5Taani nen it aap nggween paga mendek maluk eeriyak koonggwi nogo, tebenogo piigo menggaarak mbakop? Lek o. Nit nen, ”Yetut ti, Ala aput aret o,” yinuk, abet mbakwi nogo nen aret tebenogo piigo monggoorak.
”Yetut ti Keritut aret o,” yinuk, paganogo yorogo logorak wone
6Oone mbogut paga nen ari kagak, niyome wuppege kogogurak nogo inom, ndi, aakumi inake kangge logonet, amiya wangge kogogurak nogo inom, ti Yetut Keritut eebe aret o. Oone mbogut paga nen ari kagak niyome wuppege kogogurak nogo mban ti lek o. Ata, at amiya wangge nogo inom kogo nogogurik, ”Yi Yetut Keritut abet aret o,” yinuk, mbareegurak. Ndi, Aberiniki nogo ti, Ala ari menggerak ndak-ndak abet mban ari menggerak me, ”Yi Yetut Keritut abet aret o,” yinuk, inom aret paganogo yo'nirage menggerak. 7-8Ti kenok, Aberiniki nen yo'nirage inom, oone mbogut paga nen ari kagak niyome wuppege kogogurak nogo inom, ndi, amiya wangge ninigen kogogurak nogo inom, wone kenagan ti aret eereegerak kwe, alom ambit, ”Yetut ti Keritut aret o,” yinuk, nineenu aruwak nduk, eereegerak. 9Aakumi nen paganogo yo'nirogwe iinok ti, abet mba'nuk woorak op mbakwi kwe, Ala nen yo'nirage ti, ”Abet aret o,” yinuk, woorak meek mbakop? Lek o. Nit abet mbaruwak nduk Ala nen wone kenagan paga, ”Yetut ti, an naput aret o,” yinuk, yo'nirage ti mondok iya me, ”Yi abet aret o,” yinuk, waganggo logowok o. 10Nit niniki Ala aput oba panggombunuk, abet mbakwi kenok, ninikime nen, ”Yi Ala aput abet aret waganggirak kagi,” yinuk, mbako logogun o. Ndi, Ala abet mbaka'lek logonet, at Ala nen nit at aput niniki oba panggombunuk, abet mbaruwak nduk, paganogo yo'niragagerak nogo abet mbaka'lek me, Ala pilit pugungge menggerak negen agago pogo monggoorak. 11At Ala nen wone paganogo yo'niragagerak nogo yi aret o. Ala nen nineenik mondok-mondok logorak nduk, nabelan-kabelan wo'niragagerak me, at aput waganggwi niinok, nit mondok-mondok nineenik logogun o. 12Nit Ala aput waganggwi niinok, nineenik mondok aret logogun kwe, wagangga'lek niinok perak, nineenik logogun abu lek o.
Nit mondok-mondok nineenik logorak yo'niragagerak wone
13Kit kiniki Ala aput oba panggombunuk abet mbakwi nogo, Ala nen kineenik mondok-mondok logorak mendek unde eeppinagareegerak kineenu arubagip nduk, liiru yi mbanggiragi o. 14At Ala iniki koongge menggerak nogo ndak-ndak wo'niraawak nduk, nggino yogwi niinok, at aruk konembunuk, wo'nirage menggerak nineenu me, ninagabiti mbaka'lek logonet, at nggino yogo logowok o. 15Nit nen at nggino yogwi nogo, at abet aret aruk konengge menggerak nineenu me, wo'niraawak nduk, nggino yogwi nogo ti, ”Wo'niraagin aret,” yinuk, mbako logowok.
16Aap ambi nen, ”Ala aput Yetut ti, an abet mbariyak neebi o,” yinuk, maluk eeriyak iniki miippatinuk eerit nage kinigen kogo logomonggotik, at kani omoonu'me noorak nduk, eerit nage me, ake Ala yorubagip nduk, yokkirage ti lek o. Ata, kinore ambi, nit maluk perak togon eekwi niinok, Ala nen ninomaluk lek eerogo pinaniyak nogo mendek eeke kinigen kogwe kenok, Ala nen omaluk lek eerogo punuk, eenik mondok logorak mendek wogoruwak nduk, ”Ake Ala yogo logonip o,” yinuk, yokkiragi o. 17Nit obeelom eekwi lek ninggin-nanggin eeko monggoorak nogo abok aret endage maluk aret kwe, eeko monggoorak mbere wonage o. Ambi, Ala yogwi niinok, lek eerogo pinanigin me, kani omoonu'me nagun lek o. Ndi, ambi yi perak, maluk eeriyak mippatinuk nabenak mban eerit nogwe niinok, kani omoonu'me aret nagun o, yinuk, yokkiragi o, noreewi.
18Aap ambi Ala aput ndarak kenok, at maluk eekeelik ti, nineenu aret o. Ala aput Yetut nogo nen aap ti, liirogon aret porogo menggerak me, at maluk eeke menggerak Ibilit nogo nen aap ti, maluk eeppuurak mondok meek o.
19Yi aakumi ndi aakumi maluk eeko menggaarak nogo abok aret at maluk eeppinanege menggerak Ibilit nogo abu'me wonogwe nineenu kwe, nit perak, Ala abu'me wonogwe me, at apuri aret ogoorik o.
20At Ala aput wambi wage nagagirik, at mondok abet aret menggerak Ala nogo nit liippuwak nduk nineenu eeppinaneegerak o. Ndi, at mondok abet aret menggerak Ala aput Yetut Keritut imbirak ninom niniki ambit kunik aret ogoorik o. At Yetut Keritut ti, at mondok abet aret menggerak Ala nogo aret me, nineenik mondok logorak unde eeppinanege menggerak alom at aret o.
21Napuri o. Ala abet aret menggerak me, mbo punuk, obaane'me kugi ogut amulok ogobakkigirogo tiyappuurak mage o. Abu aret yokkiragi o. Napuri wa!
Currently Selected:
1 YAYA 5: WNO
Highlight
Copy
Compare
Share
Want to have your highlights saved across all your devices? Sign up or sign in
