1 KORINDUT 5
5
Ala apuri maluk eereegwaarak me, yoragagerak wone
1Noreewi o. Kit kinenggela'me kumi ugun eeginabit nogwe konenggirak me, ambi yokkira o. Aap ambi nen at ogoba akwe kagak ndinggerak konengge nagarik, yokkiragi. Wologo wae. It aakumi Ala wone konenggulik mendek nen kit eekotak ti, it ndak-ndak abu eekulik kwe, eekotak o. 2Kit Ala apuri nen aap nogo maluk eekerak paga kiniki wakkologo logonet, kinenggela'me nen nggiginogo wumbuurak op aret kagak, ”Yi iya eekerak lek o,” yinuk, taganogo punuk, wogoppatit nugwi kiigi o. 3Ndi, an nogo, an neebe o nda yime neegak kwe, niniki kinom aret wonage me, neebe ninom kinenggela'me wonage negen logonet, aap eekerak ti, muk owak loonogo pigirak me, 4wumbubagip nduk, ninowe Yetut nen yo'nege kenok, yokkiragi o. Ti kenok, ne ambi paga kit Ala apuri kuwak eekwi me, neebe kinom wonage lek kwe, niniki kinom aret kuwak eekwi me, aap ti yogo logonet, 5”Ninowe Yetut woroorak eyom paga kiniki agap ndaruwak nen, yogondak keebe maluk eeppagage logowak nduk, ninowe Yetut awone kili'niragagerak nogo paga keebe apit aret Ibilit eenggi paga pagago o,” yinuk, yogo logomonggotik, mondok endekem wumbunu o.
6Kit wogoppakwi ti maluk aret o. Kom ambi mboro age logonet, agi-ogu taati apit mboro age menggerak nogo kineenggo'lek mbakop? 7Kom ando abe nogo kwit agan lagangge logowak nduk, mboro agaatak kenok, kinogo wumbogo mengga kwak, aap kinenggela'me maluk eekerak nogo kit apit time eeka'lek neenu aret kwe, eekwi kiyo, aap nogo waganogo wumbubagip nduk, yokkiragi o. Wam ndomba warogo Patika lako nogogwaarak nogo pogom at Keritut nit ninake wareegwaarak me, nit laago noorak abu pipuk eerak wonage o. 8Pipuk eerak wonage me, laago nonggo logonet, kom mboro agaatak mendek larak nogo pogom, nit maan mendek abu maluk lombok nenggen-nanggen eeko nogogurak nogo kwak eeko logonet, nonggo logorak mage o. Ata, kom abe larak pogom niniki abu obeelom kikak naka'lek logonet, nonggo logowok o.
9An aa'nduk liiru mbanggirage logonet, ”It aap iniki kumi paga mban luunik logonet, eeginabit nugwi nogo kinom lambunik logogup o,” yinuk, mbanggiragagirak nogo ti, 10it Ala wone konenggulik mendek nen iniki kumi paga mban luunik logonet, eeginabit nugu menggaarak mendek inom, uugwe-ugwe mbako menggaarak mendek inom, inageerok nggwok aruwak nduk, aakumi inambokan laganggo menggaarak mendek inom, kuguwak amuli kunggo menggaarak mendek inom, kinom lambunik logorak lek nduk, liiru mbanggiroolik o. Aap ti mendek kinom lambunik logorak lek nduk, liiru mbanggiranetak en, o nggween paga yime aakumi ti mendek mban wonogwe me, kit nggeeme logonetak mbakop? 11An liiru mbanggiragagirak nogo ti, it nen, ”Nit abok Ala apuri aret o,” yinuk, ”Ninoreewi o,” yokkirogo logonet, ti'nuk, kumi paga mban iniki luunik logonet, eeginabit nugwi, uugwe-ugwe mbakwi, kuguwak amili kunggwi, aakumi inabok mbanggwi, amburu ndonggorogon nonggo nagaatik, kumili negen agan nugwi, yogoot waganggwi, eekwi iinok ti, ”Kinom lambunik logorak lek o. Mbi makkirogwe iinok kunduk, noorak abu lek o,” nduk, mbanggiragagirak.
12-13It endekem mendek inowak looninaburak nogo ti, an nobaalombok lek o. Ala nen mban inawone amburu mbanogo inowak loongge kaagun. Togop kwe, ”Aap ambi maluk eeke nogo kinenggela'me nen waganogo wumbinip o,” yinuk, liiru mbanak ndak-ndak it kinom kuwak eeko monggotak mendek ambi nen maluk eeke kenok, kit nen at owak looniyak lek mbakop? Lek o. Abu owak looniyak aret o.
Currently Selected:
1 KORINDUT 5: WNO
Highlight
Copy
Compare
Share
Want to have your highlights saved across all your devices? Sign up or sign in
