1 KORINDUT 3
3
”Nit Ala ayeloman aret o,” yinuk, yoragagerak wone
1Noreewi o. An aa'nduk kiya wage nagagirik, it aakumi Aberiniki inom kunik wonogwe iinok, yorage minggirak nogo pogom, an nen kit togop yokkira woroolik o. Kit muk Keritut abet mbareegutak kwe, aakumi o nggween paga mendek mbakwi nogo pogom logonet, kiniki awo kole aga'lek elege ngget ndarak pogom wonogwe kiige nagagirik, yokkira wagagirak nogo o. 2-3Kinambi omaawi mendek noorak wokkiraakit mbareegirak kwe, kit kiniki kole aga'lek kiinok, we yilak amburu negen mban aret wokkiragagirak nogo o. Kinobaabut maan mendek nogo lek aga'lek awo aret wonage me, yogondak kunduk, omaawi mendek wokkiroorak meek mban kiigi o. Kinenggela'me, ”An iya, kat iya,” yogwe, wone wakwi, eekwi tit kwe, kinobaabut maan mendek aakumi nggween paga mendek eeko menggaarak ndak-ndak eeka'lek me nduk yogo ogotik? 4Kit nen yogo logonet, ”An nogoba Pawulut. An nogoba Apolot,” yinuk yogwe ti paga nen, it aakumi nggween paga mendek yogo mengga kwak kit ndak-ndak agan nugwi nogo lek a?
5An Pawulut kunduk, at Apolot kunduk, nit taani nduk, yogo ogotik? Lek o. At nimbirak ti, Ala ayeloman mban aret me, ninowe endagembogut nen eeriyak ninalitak lombok mban yo'nirage kenok, yokkira wogogurak paga kit abet mbareegutak nogo o. 6An nen awi yake, ndi, Apolot nen wola yege, eekwi niigak, Ala nen perak, awi mbilanuwak nduk eereegerak. 7Togop me, at awi yake inom, wola yege inom, ti iya lek o. Ata, at awi mbilanuwak nduk eeke menggerak Ala ti perak, mondok iya o. 8At awi yake inom, wola yege inom, ti imbirak ndak-ndak aret me, it nggwiirit-nggwaarit eeko logomenggaarak nogo, Ala nen it inalitak lombok onggo ndak-ndak wogoraagin o. 9Nit Ala ninom kunik logonet, eeko monggoorak me, Ala eyabu aago inom, awi wurik inom, ti kit kineebe aret ogotik o.
10Ndi, an eerit nage logokit nduk, Ala iniki kunik en unde eeppaneegerak nogo ndak-ndak eerit nage logonet, aap eenggi paalo aago o wuke minggi kwak, an o eyak liirogon wuppit nagagirak nogo paga it aap alik nen eebe aret wukwi me, it inalitak eebe wukwi nogo nen ugun-ugun wukwi iyo, an eyak wuppereegirak nogo paga mban iniki liippunuk, eebe aret wuko logowak o. 11O eyak nu'lek wurabak nogo ti, Yetut Keritut alik aret me, alik ambi inom wuraburak mondok lek o. 12O eyak wurabak ti paga wuko logonet, nit ando nen mbuti emas paga wukwi, ando nen mbuti perak paga wukwi, ando nen yebibit paga wukwi, ando nen eyo paga wukwi, ndi, ando nen iri'ngga-kale'ngga paga wukwi, eerit nogo logomonggoorak kwe, 13peebi Keritut wage logominggirik, nit ninalitak lombok wuko logomonggoorak nogo, ”Op eekoorak a, maluk eekoorak a?” nineenu aruwak nduk, kani paga wakkage kenok, abu kin aret age kaagun o. 14Nit o wuko logomonggoorak kani paga wakkamenggerak nogo nengga'lek kenok ti onggo kolaagun. 15Ndi, nengge kenok ti, nineebe kani nagun lek ninagap ndarigin aret kwe, onggo perak, kolaagun lek o.
16Kit Ala apuri kineebe lambuk togon ti, Ala awi wurik aret me, Aberiniki kinenggela'me kinom wonage nogo kineenggo'lek a? 17Ala awi wurik mondok obeelom alik mbeenak nogo ti, kit kineebe aret me, aap ambi nen Ala awi wurik nogo maluk eeppege kenok, onggo Ala nen aap ti, mondok lek eerogo pigin aret o.
18Kit nen yi eekak ndi eekak eeko logonet, ”An abu neenu,” mba'nuk, eekko'net nugwi paga kinambokan laganggologwe me, togop mbarugup o. It aakumi nggween paga mendek nen, ”Nit abok nineenu me, niniki warak aret o,” yinuk, mbakwi ndak-ndak, kit ambi togoti mbakwi kiinok, Ala nen kiniki warak kinombaruwak nduk, wi negen a'nuk, logonip o. 19It aakumi nggween paga mendek nen, ”Abok nineenu me, niniki warak aret o,” yinuk, mbakwi kwe, Ala nen iige logonet, ”Yi wi negen aret agan nugwi,” inombake menggerak. Aap ambi Ala nen yoge kagak ari logonet,
”It aakumi nen, Nit abok nineenu me, nit mban koonuwok o, yinuk, iniki ngget paga eeriyak ambi mondok li'luk koonogo punuk, eerit nogwe iigak, an nen melak togon non mbanogo piige kenok, inenggali ogo menggaarak o,”
20yinuk, ari, ndi, ambi ari logonet,
”It aakumi abok nineenu mbakak koonit nugwi nogo
we aanom warogo koonit nugwi an neenu aret minggirak o,”
yinuk, ari, yereegerak liiru mbanak wonage me, 21-22ti kenok, it aakumi iniki nen mban koombunuk, eerit nugwi nogo wogoppiyaagup o. An Pawulut inom, at Apolot inom, Kepat inom, yi mendek ndi mendek Ala nen wakkagagerak inom, nineenik wonogwe inom, kanggwi inom, yogondak wonage inom, peebi logorak nogo inom, yi mendek ndi mendek abok tigitogon ti, kit unde aret o. 23Ndi, kit kineebe ti, Keritut unde. Ndi, Keritut eebe ti, Ala unde aret o.
Currently Selected:
1 KORINDUT 3: WNO
Highlight
Copy
Compare
Share
Want to have your highlights saved across all your devices? Sign up or sign in
