1 KORINDUT 14
14
Eeko logorak unde eeppiyareegerak ambinom yoragagerak wone
1Ti kenok, nabuwa-kabuwa eeko logorak wone ti, kinengga lolo punuk, eeko logonip o. ”Ala eyabu eeko logorak unde eeppinanuwok lak ao,” yinuk, yogo logonet, at nen kiniki nggaganogo yokkirage kagak yorogo logorak inom aret unde eeppinagawak nduk, yogo logonip o. 2It aakumi inoone lalin yogo menggaarak nogo ti, it aakumi konengga'lek iigak yogo menggaarak me, aakumi inaruk koneniyak nduk yorogwe lek o. Ata, Aberiniki inikime lik yi unggwage kenok, wone kote mendek yogo menggaarak me, at Ala aruk koneniyak nduk, yogo menggaarak o. 3Ndi, it aap Ala wone yorogo menggaarak nogo nen perak, iniki kole eerogo piigwi, inaruk wakwi, iniki eyak wappiigwi, eeko logowak nduk, yorogo menggaarak. 4It aap wone lalin yogo menggaarak nogo ti, it inalik inake iniki eyak wakkologo logowok nduk, yogo menggaarak kwe, it aap ninogoba Ala wone yorogo menggaarak nogo perak, Ala apuri mendek abok iniki kole eerogo piyaawak nduk, yorogo menggaarak.
5Kit abok nen wone lalin negen wappunuk, yorogo logorak ti, an nen op aret mbake kwe, an nen, ”Ao,” mbake ambi ti, kit abok nen Ala wone yorogo logobagip lak, ”Ao,” mbake minggirak. Ndi, inoone lalin yogo menggaarak nogo ti, it Ala apuri kuwak eeko menggaarak abok iniki kole aruwak nduk, ”Togop yigi,” yinuk, yoroorak ambi lek kagak, yogo menggaarak ti, meek kwe, it Ala wone konenggwi iigak yorogo menggaarak ti perak iya o. 6Togop me, noreewi o. An kinowagam wage logominggirik, Ala nen paganogo yo'nege kagak, yokkirage, wone ambi liirogon kineenu eeppinagage, Ala wone yokkirage, wone mamunggirage, eeka'lek logonet, we noone lalin aret wappunuk, yokkiroorak mban kinowagam wage neenok, ”Yi nano eeppinanikit nduk wagarak?” nombarumunggup lek a?
7Ti ndak-ndak luu'ngget inom, nggawiiwak luu'ngget inom, eeko logonet, oone abe lek kagak we lobale mban eeke kenok, aakumi nen, ”Ti mendek ari,” yinuk, nonggop negen liippuurak mbakop? 8It aakumi wim namburuwok nduk, kuum yogo mengga kwak, mbuti luu'ngget oone abe nggwok negen eeka'lek kenok, nonggop togon it aap wim namburiyak mendek inawuri lombok kuwak eeri woraagun mbakop? 9Ti kokwak, kit kinoone we lalin yogo monggotak nogo liirogon yorogwe lek kenok, kit yogwe nogo taani nen, ”Togop yigi,” yinuk, lik togon konenugun mbakop? Kit yogo monggotak ti, kit kineenggo'lek kagak, we aanom warogo nineenu mbaruwak agan nugwi kiigi o. 10Ndi, o nggween paga yime it aakumi inoone alitak lombok ambik yogo menggaarak kwe, wone yogwe konenggulik mendek yime ambi wonage mondok lek o. 11It wone yogwe iigak, an konengga'lek kenok, it nen, ”Yi aap nggiru nen ari,” nombakwi, ndi, nogo ndak-ndak an kunduk nen, ”It aap nggiru nen yogwe,” inombake, eerugun o. 12Kit nen, ”Ala eyabu eeko logowok nduk, ambi unde eeppanuwak lak ao,” yinuk, mbakwi kiinok, Ala apuri kuwak eeko menggaarak nogo, iniki kole eeppiyoorak nogo mendek unde eeppinagawak nduk, yogo logonip o.
13-14An lalin negen ambi inoone wappunuk, tamban eeke kenok, niniki nen abet aret eerigin kwe, ”Ngge nduk yagarak,” an kobak logonet, eerigin me, aap ambit-ambi lalin negen ambi inoone wappunuk, ari menggerak nogo nen, ari logominggirik, aakumi kobak ogwe iyo, ”Ti togop nduk yagi o,” yinuk, yorage logowak nduk, tamban eeke logowak o. 15Togop kenok, an tamban nonggop eeke logi? An tamban eeke kenok, niniki kobak logonet, lalin negen ambi inoone wappunuk, eerigin lek o. Niniki nen abeppunuk, aakumi inoone paga aret eeke logogin o. Ndi, ndawi ari kenok, aakumi inoone lalin negen wappunuk kobak logonet ari logogin lek mban. An niniki koombunuk nen aakumi inoone yogo menggaarak nogo paga kin aret ari logogin o. 16Ala alut eeko logonet, kiniki abe'naga'lek kagak, lalin negen ambi inoone wappunuk, tamban eekwi kiinok, it aakumi ando kinom kuwak eeppunuk, tamban eekwi nogo kat ari it kobak ariyak me, nonggop togon, ”At abet aret yigi o,” yinuk, ”Amin,” yugun mbakop? 17Kit nen Ala mondok iya tit wogoppugwi kwe, it ando kobak iigak, lalin negen ambi inoone wappunuk, yogwe me, kit nen ambi obeelom eeppiyamunggup lek aret kiigi o.
18Ala wogoppogo logonet, kit ambitak lalin negen ambi inoone wappunuk, yogo monggotak kwe, an perak iya negen ari minggirak me, ”Ala wa,” yinuk, yoge minggirak. 19Ala apuri kuwak eerak inenggela'me logonet, an lalin negen ambi inoone wappunuk, ari neenok, koneniyak lek me, an lalin negen ambi inoone wappunuk, noone nggorek mban yoroorak neebi o. Ata, it liippuwak nduk, it inoone paga wone kuwagaluk yoroorak ti perak, op aret mbake minggirak.
20Noreewi o. Kit kiniki koonggwi nogo ti, it wologwe-mbuulogwe iniki koonggo menggaarak pogom, kit kiniki togop koonggo logogup o. Ata, it aap iniki warak koonggo menggaarak pogom koonggo logonip o. Ndi, maluk eeriyak eekkinake kero, elege awo ngget ndarak maluk ineenggo'lek menggaarak nogo pogom kit togop aret logonip o.
21Nit ninogoba Ala nen ari logonet,
”An nen it aakumi nggiru mendek iniki nggaganogo
yorage neegak, it inoone alik mendek paga an
napuri yi, yoraawak nduk, nappiya woraminggirak
kwe, noone yorogwe nogo it liirogon inaruk
konenugun lek o,”
yinuk, yereegerak liiru mbanak wonage me, 22ti kenok, it aakumi wone lalin yogwe nogo, it abet mbakwi mendek inake lek o. It iniki abet mbaka'lek mendek nen liippatinuk, abet mbaruwak nduk, yogo menggaarak kagi o. Ndi, nogo ndak-ndak it Ala wone yorogo logowak nduk, unde eeppiyareegerak nogo ti, it abet mbaka'lek inake lek o. Ata, Ala apuri abet mbakwi mendek liippatuwak nduk aret yorogo menggaarak.
23Ti kenok, it Ala apuri abet mbakwi mendek abok ambit me kuwak eeppunuk, it abok nen lalin negen inoone alitik-alitak wappunuk, yogwe iinok, it aakumi wee'lek Ala wone abet mbaka'lek mendek nogo wogo logomenggaarik, it nen, ”Aap yi, kumili negen agan nugwi kiraap,” yinuk, yokkiraagun lek mbakop? 24-25Yokkiraagun aret kwe, kit abok aret Ala wone yogwe me, wogwe iinok perak, kit Ala wone yogo logonet, wone it inikime kote kumaarak menggerak abok aret paganogo tena'me yogwe konenggo logomenggaarik, ”Wone ti, nit niinok, yo'nirogwe iigo o,” yinuk, iniki ndoguk togon wakkologo logonet, Ala abu'me tebe yinuk, Ala wogoppogo logonet, ”Ao, Ala inom abet aret wonogwe iigo o,” yinuk, yugun lek mbakop? Lek o. Yogo logogun aret o.
It Ala apuri kuwak eeppunuk, eeko logorak wone
26Ti kenok, nit nonggop eeruwi o, noreewi. Kit kuwak eeppunuk, aap ambit nen ndawi tiyeniyak mbake kenok tiyengge, ambi nen wone ambi mamuniroorak mbake kenok mamunirage, ambi Ala nen paganogo yoge kagak, yoroorak mbake kenok yorage, ambi lalin negen ambi inoone wappunuk, yoroorak mbake kenok yorage, ambi, ”Togop yigi o,” yinuk, abut laganogo yoroorak mbake kenok yorage, yi eeriyak ndi eeriyak ti abok aret eeko logonet, it Ala apuri iniki nu'lek eerogo piyoorak kenok mban eeko logonip o. 27Ti kenok, kinoone lalin yogwe nogo ti, kit kineebe ambik nen yuurak lek o. Kineebe mbere kenagan kenok mban yogo logonet, peebi-aa'nduk yogwe kiigak, at ambi nen wone ari kenok, at ambi nen, ”Yogop yigi,” yinuk, abut laganogo yokkiragak eeko logowak o. 28It aap Ala apuri kuwak eeppunuk lalin negen ambi inoone wappunuk, yogo menggaarak nogo, ”Yogop yigi o,” yinuk, abut laganogo yokkiroorak ineebe lek i nok ti, kinoone lek, puk aret logonet, kinikime nen mban yikkologwe, Ala yogwi, eeko logonu o. 29It aap Ala wone liippunuk yorogo menggaarak nogo ineebe mbere-kenagan nen aret wone yokkirogo logowak o. Ndi, yokkirogwe iigak, it ando nen wone yokkirogwe nogo, ”Wone ti, Ala wone aret yo'nirogwe a, alik wone yo'nirogwe a?” yinuk, liippiigo logowak o. 30It yokkirogwe iigak aap alik ambi kwi'ndak wonage me, Aberiniki inikime lik ari logonet, paganogo yoge kagak yuurak mbake kenok, aa'nduk ari logomenggerak nogo puk age kagak yokkiroorak op aret o. 31Kit abok aret mamunggologwe, abok aret kiniki eyak wat-wat yogwe, eekkolaabagip nduk, Ala wone peebi-aa'nduk ndegen-ndegen yogo logorak ti obeelom aret.
32-33At Ala nen nit abet mbakwi Ala apuri nogo kuwak eeppunuk, wone nalop-kalop yogo logorak ti mbakeelik o. Ata, niniki lambunik ale'nggen logonet, Ala wone at ambi ari konen-konen yogo logorak mbake menggerak me, it Ala wone yorogo menggaarak nogo yoroorak aganake kenok, tebeppunuk logonuk, at aa'nduk yorage nogo puk age kagak, yoroorak mbake nogo peebi yoragak eeko logorak op aret o. 34At Ala nen ari logonet, ”It kumi ti, inoone yuurak lek o. Aap inabu'me tebe yinuk, inoone konenggo logowak o,” yinuk, Muta yoreegerak liiru mbanak nogo ndak-ndak, it Ala apuri yi awi ndi awi kuwak eeppunuk, eeko mengga kwak, kit togon kuwak eeppunuk logonet, it kumi ti, inoone lek puk logowak o. 35Ala apuri kuwak aago inenggela'me nen kumi nen wone yorogwe iinok inenggali eeppatukwak me, wone ambi it kobak eekwi iinok, nggwok paga kin wogiyoorak lek o. Iname na'nuk, inogonggelomini mbabok kin wogiigwi iinok, yoroorak op o.
36Togop me, Ala wone unde nit aret me nduk, yogo ogotik ya? Kit mban kinake yokkiragagerak me nduk, yogo ogotik? 37Ti lek o. Kit ambi nen, ”An Ala wone yorage logowak nduk, unde eeppaneegerak kagi,” yinuk, mbake, ndi, ambi nen, ”An eeke logowak nduk, Aberiniki nen ndogop wo'nireegerak kagi,” yinuk, mbake, eekwi nogo nen, ”Wone yi ti, ninowe endagembogut oone Pawulut yoge kagak mbanniragagerak kogo o,” yinuk, kiniki liippinip o. 38Aap ambi nen an wone yogondak liiru mbanggirage yi, ”Woorak neebi o,” yinuk, taganogo mbo pege kenok, kit nen togon at oone taganogo mbo pinip o.
39Ti kenok noreewi o. Kit nen, ”Ala nen paganogo yo'nirage kagak, yorogo logorak unde eeppinanuwak lak ao,” yinuk, mbako logonet, it aap inoone lalin yorogwe nogo, ”Mage o,” yinuk, yoraagup o. 40Kit yi eekak ndi eekak eeko logonet, mondok liirogon mot-mot mban eeko logonip o.
Currently Selected:
1 KORINDUT 14: WNO
Highlight
Copy
Compare
Share
Want to have your highlights saved across all your devices? Sign up or sign in
