BILANGAN 9
9
Feta Paskah ka dua
1 #
Kel. 12:1-13
Nai hataholi Yahudi-la bula ka esan-na, nai teu ka dua-na dalek, fo ndia te leoina Israel-la la'oela Masir so, Manetualain kokolak no Musa neme moo solokaek Sinai-a. Manetualain nafa'da nae, 2-3“Nai bulak ia fain 14, fo nai lelek le'do-a mulai tenak soona, hataholi Israel-la muse tao feta Paskah tunga nakanenetek fo nananaketu basak so.” 4Boema, Musa nadenu leoina Israel-la tao feta Paskah. 5Ala taon nai moo solokaek Sinai-a, la'e le'donosok, fo nai hataholi Yahudi-la, bula ka esan-na, fain 14. Ala tao basa-basan lala'en-na nandaa no Manetualain paletan neu Musa.
6Tehu bei hapu hataholi manggenggeok nai sila dalek, nanahu ala koila'e mamates so, de nai faik ndia, sila ta bole tunga feta Paskah fa. Hataholi sila leu leo Musa no Harun leu, 7de lafa'da lae, “Ami ia, hataholi manggenggeok, nanahu ami koila'e mamates so. Tehu tao le'e de, muse ta'da fe'e ami, nalosa ami ta hapu fe tunu-hotuk neu Manetualain, sama-sama moo ami tolanoom-mala fa?”
8Boema Musa nataa nae, “Mahani losa au hapu natutu'duk neme Manetualain mai dei.”
9 Manetualain nadenu Musa 10nafa'da leoina Israel-la nae, “Metema nai emi do nai emi tititi-nonosim dale, hapu hataholi naggenggeo nanahu ana koila'e mamates so, do bei nai leleo-lala'o dame doo dalek soona, ndia boeo muse tunga feta Paskah ba'eneu Manetualain. 11Tehu muse tao feta ndia, nai bula manamaik-ka, fo nai hataholi Yahudi-la bula ka dua-na fain sanahulu haa le'odaen-na. Tao feta faik ndia nenik mi'a paa bi'ilopo Paskah, ma mi'a loti fo ta pake laluteik fa, ma aidoo makahe'duk. 12#Kel. 12:46; Yoh. 19:36 Boso mi'a ela nana'ak sila-la faaanak boen, losa balahaa fafaik, ma boso helu la'di bana nanatunu-hotuk fe Au-a ndia duin esa boen. Tao feta Paskah ndia nandaa no nakanenetek lala'en-na.
13Nasafalin-na, hataholi manggenggeo ta ka, ma ta nai leleo-lala'o dame doo dalek boen, tehu ana ta tunga feta Paskah fa soona, Au ta sipok-kana da'di Au anang so'on, nanahu ana ta tunu-hotu tutunu-hohotuk fe Au, nai faik fo nananaketuk-ka. Hataholi ndia, muse lu'a-lepa aon sala-singon.
14Metema nai emi dalek, hapu hataholi nusa dea esa ana nau tunga feta Paskah soona, muse ana tunga basa nakanenetek ma nakeketuk-kala. Nakeketuk sila-la, la'e basa hataholi lala'en-na, nau hataholi Israel, do hataholi nusa dea boe.”
Ko'as fo manamasa'ak
(Kel. 40:34-38)
15-16Nai faik fo Manetualain Lalaa Teman-na nananapadedeik-ka, ko'as-sa mai, de ana poti-na Lalaa Temak ndia. Ko'as ndia nai Lalaa Temak lain, nai fai le'odaen-na losa fafaik, fo meten soona, sama leo ha'i-a. 17Metema ko'as ndia kae soona, hataholi Israel-la ofeheni sila lalaa ofun-na, fo ala la'o. Ma ko'as ndia kona nai bee soona, ala ofu seluk nai mamanak ndia. 18No Manetualain paletan-na, de leoina Israel ndia ofe heni lalaa ofun-na, ma no Manetualain paletan-na boe, lapadedeik falik-kana. Lelek ko'as ndia bei nai Manetualain Lalaa Teman lain soona, ala leo lahele leme mamanak ndia. 19Metema ko'as ndia dook-ka nai Lalaa Temak ndia lain soona, hataholi Israel-la tunga Manetualain nakaneneten-nala, de ala ta la'o leme mamanak ndia mai fa. 20Tehu nasi'a ko'as ndia nai Lalaa Temak ndia lain ka'da faik de'ubee mesan. Leomae leobeek boe, Manetualain paletan-na nde naketu, ala leo lahele nai mamanak esa, do ala la'o. 21Nasi'a ko'as ndia nahele nai Lalaa Temak ndia lain, ka'da neme le'donoso losa fafaik, de lelek nai fafaik fo ko'as ndia kae, soona sila boeo la'o leona. Su'di faihi'da fo ko'as ndia kae, nau lele'dok do le'odaek boe, ala la'o leona. 22Nai lelek ko'as ndia bei nai Manetualain Lalaa Teman lain, fafa'kama faik dua dalen-na, bulak esa, teuk esa, do teuk esa lenak, nai lelek ndia boe, hataholi Israel-la leo lahele leme mamanak ndia. Fo metema, ko'as ndia kae soona, besak-ka ala la'o. 23Ala leo nai mamanak esa, do ala la'o leo mamana fe'ek leu boeo, nandaa no Manetualain paletan fo Ana fen tunga Musa.
Currently Selected:
BILANGAN 9: twu
Highlight
Copy
Compare
Share
Want to have your highlights saved across all your devices? Sign up or sign in
