BILANGAN 27
27
Zelafehad anainan-nala
1Zelafehad anainan lima, fo nde: Mahla, Noa, Hogla, Milka ma Tirza. Zelafehad aman nde Hefer, ma Hefer aman nde Gilead. Gilead aman nde, Makhir, ma Makhir aman nde Manasye, ma Manasye aman nde Yusuf. 2Zelafehad ana ka liman sila-la, leu leo Musa no Imam Eleazar, boema basa mauli-malanga Israel-la lala'en-na, fo ndia te, bei lakabubua deka loo Manetualain Lalaa Teman-na lelesun-na. Ala lafa'da lae, 3“Ami amam maten neme moo solokaek-ka, tehu anatoun ta. Ana ta tunga Korah, fo manalena-la'ban Manetualain paletan-na ndia fa. Ami amam ndia maten, nanahu sala-singon mesan-na. 4Tehu tao le'e de, na'den-na muse mopon neme leoina Israel-la mai, ka'da hu kande, ana ta bongi anatouk fa do? Fe ami dae pusaka, sama-sama moo ami amam tolano ka'a-fa'din-nala.”
5Boema, Musa nanduku-nalosak dede'ak ndia neu Manetualain, 6de Manetualain nafa'da Musa nae, 7#Bil. 36:2 “Zelafehad anan sila-la kokolak dede'ak-ka, memang nandaa. Da'di, fes dae pusaka, sama-sama loo sila aman tolano ka'a-fa'din-nala. Muse fe Zelafehad baba'en ndia, leo anainan-nala neu. 8Mafa'da leoina Israel-la, mae metema touk esa maten, tehu anatoun ta, soona muse fe dae pusakan-na leo anainan-na neu. 9Metema anainan ta soona, fe dae pusakan-na leo tolano toun-na neu. 10Ma metema, tolano toun ta, soona muse emi fe pusakan ndia leo aman tolano toun-nala neu. 11Ma metema, aman tolano toun ta, soona muse emi fe pusakan ndia leo tia-lain mana dekak, nai leo-ingu-na dalek, fo ana taon da'di ndia pusakan.” Ndia nde muse da'di nakeketuk ba'eneu hataholi Israel-la, sama leo hata fo, Manetualain paletan neu Musa.
Yosua nggati Musa
(Ul. 31:1-8)
12 #
Ul. 3:23-27, 32:48-52 Manetualain nafa'da Musa nae, “Kae leo letek Abarim lain muu, fo lalana nusak fo, neukose Au fen neu hataholi Israel-la. 13O lalana basan, soona neukose o mate sama leo makahulun-na, o ka'am Harun boe, 14nana emi dua la'ban Au paletang-nga neme moo solokaek Zin-na. Lelek basa laun-na lala'en-na, bemumu loo Au neme Meriba, tehu emi ta nau matu'du Au koasang-nga nenik oe ndia, nai sila matan fa.” (Manada'dik ndia, ana da'di neme oemata Meriba nai Kades, fo nai moo solokaek Zin-na.)
15Boema Musa hule-haladoi nae, 16“Ou Manetualain, fo manafe maso'dak neu basa maso'dak lala'en-na, au dokodoe, fo matu'du hataholi esa, soaneu nauli-nalanga leoina ia; 17#1Raj. 22:17; Yesk. 34:5; Mat. 9:36; Mrk. 6:34 hataholi fo, ana bisa da'di malanga solda'du matuaina, nai lelek ala latee-latati. Boso po'ilotak O anam ia-la, sama leo bi'ilopo fo manafoon ta.”
18 #
Kel. 24:13
Boema, Manetualain nafa'da Musa nae, “Maloo Yosua, fo Nun anan-na. Ndia hataholi esa, bafa da'uk. Tao o limam-ma neu langan lain. 19Madenun fo napadeik neu Imam Eleazar-ra, ma basa hataholi Israel-la lala'en-na matan. O muse po'a-benga nai basa hataholi sila-la matan, mae Yosua nggati o. 20Fen o koasam-ma seli, fo ela hataholi Israel-la, ala tunga paletan-na. 21#Kel. 28:30; 1Sem. 14:41, 28:6 Yosua muse noke natutu'duk neme Imam Eleazar-ra mai, ma Eleazar muse natane Au hihii-nanaung nenik ana pake Urim ma Tumim. No enok ndia, hela-nole Yosua, ma basa leoina Israel-la lala'en-na, nai basa dede'ak lala'en fo latongo loon.” 22Musa tao-tungan sama leo Manetualain paleta neun-na. De nadenu Yosua napadeik neu Imam Eleazar-ra, ma basa hataholi Israel-la matan-na. 23#Ul. 31:23 Boema, ana tao liman-na neu Yosua langan lain, boema ana po'a-benga, nae mana nggati ndia, nde Yosua, sama leo Manetualain nafa'da neun.
Currently Selected:
BILANGAN 27: twu
Highlight
Copy
Compare
Share
Want to have your highlights saved across all your devices? Sign up or sign in
