BILANGAN 17
17
Harun aitete'en-na
1 Manetualain nafa'da Musa nae, 2“Madenu hataholi Israel-la, fo ala fe o aitete'ek sanahulu dua, fo leo esan-na, aitete'ek esa, soona mane leo-a nde muse fe matan ai tete'ek ndia. Sulak mane leo sila-la, esa-esak na'den-na neu ai tete'en-na, 3ma sulak Harun na'den-na, neu leo Lewi-a, ai tete'en-na. Mane leo-la esa-esak, muse hapu ai tete'ek esa. 4Soona, meni ai tete'ek sila-la, leo Au Lalaa Temang-nga neu, fo pe'das leu Peti Hehelu-balataak-ka matan-na, nai mamanak fo, Au biasa atongo o emi seku-seku. 5Hataholi fo Au helek-ka, neukose ai tete'en-na nanupu. No enok ndia, neukose Au ate'e hataholi fo bemumu loo emi tataas esa, haladoin-nala.”
6Musa nanduku-nalosak dede'ak ndia, neu hataholi Israel-la. Boema, basa sila mauli-malangan-nala, ala fe Musa ai tete'ek esa, soaneu mane leo esa. Basa-basan, ai tete'ek sanahulu dua, fo Harun ai tete'en-na, nai dalek boe. 7Boema, Musa pe'da ai tete'ek sila-la, nai Manetualain Lalaa Teman dale, fo nai Peti Hehelu-balataak-ka matan-na.
8 #
Ibr. 9:4
Balahaa, fo nai lelek Musa neu leo Manetualain Lalaa Teman dale neu, te nita Harun ai tete'en-na, fo nde leo Lewi-a ai tete'en-na, nanupu so. Ai tete'ek ndia napako, nabuna, de naboa ketapang boak, tehu boan-na lasik so! 9Musa ho'in-na basa ai tete'ek sila-la, de natu'dun neu hataholi Israel-la. Ala lita hata fo ana da'di so, boema mauli-malangan-nala, esa-esak ho'i falik ai tete'en-na. 10Basa boema, Manetualain nafa'da Musa nae, “Pe'da fali Harun ai tete'en-na, neu Peti Hehelu-balataak-ka matan-na. Muse pe'da ai tete'ek ndia, da'di leo nasanene'dak ba'eneu hataholi Israel fo, manalena-la'ban paleta sila-la, ma mae metema bemumu lakandoo soona neukose mates.” 11Musa tao tunga hata fo, Manetualain paleta neun.
12Boema, hataholi Israel-la, lafa'da Musa lae, “Metema leondiak soona, ami soe so! Neukose mopo-mate ami! 13Metema mate hataholi manadeka no Manetualain Lalaa Teman-na, soona ta hapu nama hehenak ba'eneu ami so'on!”
Currently Selected:
BILANGAN 17: twu
Highlight
Copy
Compare
Share
Want to have your highlights saved across all your devices? Sign up or sign in
