BILANGAN 1
1
Leleke makasososak-ka la'eneu hataholi Israel-la dede'un-na
1 #
Bil. 26:1-51
Nai hataholi Yahudi-la bula ka dua-na fain esa, fo nai lelek hataholi Israel-la la'oela Masir boema, Manetualain kokolak no Musa neme Manetualain Lalaa Teman dale, nai Letek Sinai-a. Nae, 2“O ma Harun muse leke la'iesak hataholi Israe la dede'un-na, tunga esa-esak leo-ingu ma teidale-bobongin. Sulak-ma, basa touk fo, 3teun duahulu leo lain neu, boema nandaa da'di solda'du so. Muse sulak-kasa tunga esa-esak solda'dun. 4Moke mauli-malanga leo-ingu esa neme leo-la esa-esak mai, fo ala fali emi.” 5-16Hataholi nanahelek soaneu ala fali Musa no Harun, fo ala da'di mauli-malangan neu leo-la esa-esak, na'den-nala nde ia:
| Leo | Mauli-malangan |
|---|---|
| Ruben | Elizur, fo Syedeur anan-na |
| Simeon | Selumiel, fo Zurisyadai anan-na |
| Yehuda | Nahason, fo Aminadab anan-na |
| Isakhar | Netaneel, fo Zuar anan-na |
| Zebulon | Eliab, fo Helon anan-na |
| Efraim | Elisama, fo Amihud anan-na |
| Manasye | Gamaliel, fo Pedazur anan-na |
| Benyamin | Abidan, fo Gideoni anan-na |
| Dan | Ahiezer, fo Amisyadai anan-na |
| Gad | Elyasaf, fo Rehuel anan-na |
| Naftali | Ahira, fo Enan anan-na |
17No hataholi ka sanahulu duak sila-la tutulu-fafalin, de Musa ma Harun 18ladenu hataholi Israel-la lala'en-na lakabubua nai hataholi Yahudi-la bula ka dua-na fain esa, boema ala sulak teidale bobongik manai leo-la esa-esak dalek, tunga tutuik la'enue bei-ba'in-nala. Basa touk fo teun duahulu leo lain neu, na'den-nala nanasulak ma nanalekek, 19sama leo Manetualain paletan-na. Basa sila-la, Musa taon neme moo solokaek Sinai-a. 20-46Touk fo teun duahulu leo lain neu, fo landaa da'di solda'du, na'den-nala nanasulak tunga ndia leo-ingu ma teidale-bobongin, mulai neme Ruben, fo Yakob ana ulun-na, losa Naftali. Sila dede'un-na nde ia:
| Leo | Hataholi-a dede'un-na |
|---|---|
| Ruben | 46.500 |
| Simeon | 59.300 |
| Gad | 45.650 |
| Yehuda | 74.600 |
| Isakhar | 54.400 |
| Zebulon | 57.400 |
| Efraim | 40.500 |
| Manasye | 32.200 |
| Benyamin | 35.400 |
| Dan | 62.700 |
| Asyer | 41.500 |
| Naftali | 53.400 |
| Basan-basan lala'en-na, hataholi: | 603.550 |
47Hataholi Lewi-la, ta nanasulak lakabubua loo leo fe'ek-kala fa, 48nanahu Manetualain kokolak basa no Musa nae, 49“Nai lelek o sulak hataholi fo landaa da'di solda'du soona, boso sulak hataholi Lewi-la. 50Madenus fo ala ito-ato Au Lalaa Temang-nga no oe-isin lala'en-na. Sila bela-ba'un nde, ndolo Au Lalaa Teman-nga no oe-isin lala'en-na, boema ala ito-aton. Sila muse ofu nai boboa-kaisun. 51Metema emi lali mamanak soona, hataholi Lewi sila nde ofe heni Au Lalaa Temang-nga, ma ala pasak falik-kana nai mamanak fo nai bee, emi ofu. Fe'ek neme hataholi Lewi sila-la mai, su'di see fo ana deka no Lalaa Temak ndia soona, muse nanahuku nisak. 52Hataholi Israel fe'ek-kala, muse lapadedeik sila lalaa teman-na bubua-bubuak, fo esa-esak nai ndia bubuan dale, ma nai sila dedeon-na boboa-kaisun. 53Tehu hataholi Lewi-la, muse ofu okofeo-la Au Lalaa Temang-nga. Sila muse lanean, fo ela ta bole hataholi deka fan, nalosa ala tao-la Au amanasa, fo Au huku hataholi Israel-la.” 54Boema, hataholi Israel-la tao basa hata lala'en fo Manetualain paletan neu Musa.
Currently Selected:
BILANGAN 1: twu
Highlight
Copy
Compare
Share
Want to have your highlights saved across all your devices? Sign up or sign in
