IMAMAT 6

1 # Bil. 5:5-8 Manetualain fe seluk Musa nakanenetek-kala nde ia. 2-3Hataholi esa, muse ana tunu-hotu tutunu-hohotuk, metema nasala-nasingo neu Manetualain, nanahu ana ta nau fe falik nonoo hataholin-na buan, fo ana fen pe'da lalain, do ana tipu-dai hataholi, namanako bua-lo'an, do ana helen-na bua manamopok, tehu nalelesi nenik soo-supak. 4-5Hataholi masalak ndia, muse bae basa hata, fo ana hapun tunga enok ta malole fa. Nai lelek hapu salan-na soona, muse ana bae nakatema buas sila-la leo bua lamatuak neu, ma ana popo-tama seluk baba'ek lima neme buas sila-la belin-na mai. 6Soaneu tutunu-hohotuk bae hutak-ka, hataholi ndia muse neni bi'ilopo mane esa, do bi'ihii mane esa, ta lu'u-la'ak fa, ma puku belin-na sama no belik fo nanapakek nai Manetualain Lalaa Teman-na. 7Imam-ma tunu-hotun soaneu hataholi ndia, soona neukose, Manetualain fe do'o do ampon neu hataholi ndia.

Tutunu-hohotu nanatunuk

8 Manetualain nadenu Musa 9fe Harun no anan-nala nakanenetek-kala nde ia, la'eneu tutunu-hohotuk fo tunu la'iesak-kana. Imam-ma, muse pe'da tutunu-hohotu nanatunuk ndia neu mei tunu-hotuk lain fo neme ndia, le'odae katemak esa, ma ha'i tutunu-hohotuk-ka muse pila nahele. 10Lelek tutunu-hohotuk ndia putun, fo ana da'di afu soona, imam-ma pake lopo ei keke'uk, ma ba'du manalu tema abalutu, fo muse ana hulu-na afu maminak ndia neme mei tunu-hotuk lain mai, fo pe'dan neu mei tunu-hotuk-ka boboan-na. 11Basa ndia soona, muse ana nggati heni bua papaken-na, fo neni afu ndia leo mamana ofu-a deak neu, leo mamanak fo nanahele hehelik soaneu afu ndia so. 12-13Tunga-tunga fafain-na, imam-ma muse tao ai ha'i leo mei tunu-hotuk lain neu, ana tao tutunu-hohotu nanatunuk leo lain neu, ma ana tunu bana tutunu-hohotu mole-dame-a, minan-na. Ta bole mate ha'i manai mei tunu-hotuk lain fa.

Tutunu-hohotu nana'ak

14Nakanenetek la'eneu tutunu-hohotu nana'ak ba'eneu Manetualain nde ia. Harun tititi-nonosin esa, muse neni tutunu-hohotuk ndia leo mei tunu-hotuk-ka matan-na neu. 15Muse ana ho'in-na ha'desopuk sopuanak nafanggetek esa, no mina ma boomenin-na lala'en-na, fo ana tunun nai mei tunu-hotuk lain, fo da'di leo ta'du-tana, nae ana fe la'iesak tutunu-hohotuk ndia leo Manetualain neu so. Tutunu-hohotuk ndia, boon-na nandaa no Manetualain dalen-na. 16-17Muse ana tao ha'desopu lenak-ka da'di loti fo ta pake laluteik fa, fo imam-mala la'an nai mamanak fo nanahele hehelik, fo nde: nai Manetualain Lalaa Teman-na so'dan-na. Fo Manetualain fe basa imam-mala baba'en neme tutunu-hohotu nana'ak-ka mai-a, nde ndia. Nana'ak ndia malalao-malalafuk nanseli, sama leo tutunu-hohotuk fo sala-singok hapu do'o do ampon, ma tutunu-hohotuk bae hutak-ka. 18Losa dodoon-na, basa touk fo Harun tititi-nonosin-nala, bole la'a loti ndia; ndia nde da'di sila baba'e mahelen-na, neme nana'ak fo nanatunu-hotuk soaneu Manetualain. Hataholi fe'ek koila'e nana'ak nanatunu-hotu basak ndia soona, neukose ana hapu soe, nanahu nana'ak ndia malalao-malalafun-na.

19 Manetualain fe seluk Musa nakanenetek-kala nde ia, 20la'eneu tutunu-hohotuk nai lelek ndo ei Harun tititi-nonosin esa. Nai faik ndo ein-na, ana muse tunu-hotu ha'desopu gandum kilo esa, soaneu Manetualain. Muse tunu-hotu ha'desopu gandum ndia seli, nai fai fafain-na, ma seli nai fai le'donoson-na. 21Ha'desopuk ndia, muse nanasese'dok nenik mina, boema tunun nai mamana tutunuk lain, fo basa soona, kaka'dan, fo tunu-hotun da'di leo tutunu-hohotu nana'ak. Tutunu-hohotuk ndia, boon-na nandaa no Manetualain dalen-na. 22Basa Harun tititi-nonosin fo nanandoo eik da'di Imam Matuaina losa dodoon-na, muse ana tunu-hotu tutunu-hohotuk ndia. Muse tunu la'iesak-kana, soaneu tunu-hotuk ba'eneu Manetualain. 23Basa tutunu-hohotu nana'ak, fo imam-ma tunu-hotun, muse tunu la'iesak-kana, ta bole na'a faaanak boen.

Tutunu-hohotuk fo sala-singok hapu do'o do ampon

24 Manetualain nadenu Musa 25fe Harun no anan-nala nakanenetek-kala nde ia, la'eneu tutunu-hohotuk sala-singok nanafe do'o do ampon. Bana soaneu tutunu-hohotuk sala-singok hapu do'o do ampon-na, muse do'don nai mamanak do'do bana, soaneu tutunu-hohotu nanatunuk-ka. Tutunu-hohotuk ndia, malalao-malalafuk nanseli 26Imam-ma muse tunu-hotu tutunu-hohotuk ndia, fo muse na'an nai mamanak fo nanahele hehelik, fo nde nai Manetualain Lalaa Teman-na, so'dan-na. 27Su'di see, do su'di beek boe, fo ana koila'e bana ndia paan-na soona, neukose ana hapu soe, nanahu paa ndia malalao-malalafun be'i-balakain-na. Metema, bana ndia daan-na la'e ba'du esa soona, muse safe ba'du ndia nai mamanak fo nanahele hehelik. 28Muse fepa ba'e uledae fo paken soaneu nasu nenik paa tutunu-hohotuk ndia. Metema pake ule liti soona, muse lose ulek ndia, boema safe balisin nenik oe. 29Basa touk manai imam-mala teidale-bobongin dalek-ka, bole la'a paa tutunu-hohotu malalao-malalafuk nanseli ndia. 30Tehu bana soaneu feta sala-singok manafe doo do ampon-na, ho'i-la daan-na seli, fo lenin leo Kama Malalao-malalafuk dale neu, muse tunu naputu la'iesak-kana, fo ta bole na'a fan.

Currently Selected:

IMAMAT 6: twu

Highlight

Copy

Compare