IMAMAT 23
23
Fai malole-la
1 Manetualain fe Musa 2nakanenetek-kala la'eneu tao agama fai malolen-nala, fo muse nanapo'a-bengak da'di leo fai malole soaneu makaluku-makatele. 3#Kel. 20:8-10, 23:12, 31:14-15, 34:21, 35:2; Ul. 5:12-14 Hapu faik 6 soaneu naue-nale'di, tehu fai ka hitun-na, fai Sabat, de fai hahaeaok, fo faik ndia nanahele hehelik ba'eneu Manetualain. Nai faik ndia, emi muse makabubua, fo sene-do'ok, ma ta bole maue-male'di fa. 4Manetualain naketu fai-fai malole fo emi muse po'a-bengan nai faik nananaketuk-ka, nde sila.
Fai malole Paskah ma Loti Ta Pake Laluteik fa
(Bil. 28:16-25)
5 #
Kel. 12:1-13; Ul. 16:1-2 Tao fai malole Paskah soaneu fe ha'da-holomata neu Manetualain, mulai nai lelek le'do tenak, fo nai hataholi Yahudi-la bula ka esan-na, fain 14. 6#Kel. 12:14-20, 23:15, 34:18; Ul. 16:3-8 Balahaa, fo bulak-ka fain 15 soona, mulai tao fai malole Loti Ta Pake Laluteik-ka, ma nai faik hitu dalen-na, emi ta bole mi'a loti fo taon pake laluteik fa. 7-8Nai fai ka hituk sila-la dalek, emi muse tunu-hotu tutunu-hohotu nana'ak soaneu Manetualain. Nai feta ndia fai makasososan-na, ma fai ka hitun-na, emi muse makabubua, fo tao makaluku-makatele, ma ta bole tao ue-le'dis mabela fa.
9-10Metema, emi losa nusak fo Manetualain fen neu emi, fo emi ketu-kolu dae-a buna-boan soona, muse meni gandum puputu makasososak-ka leo imam-ma neu. 11Nai faik fo basa fai Sabat-ta, imam-ma muse tunu-hotu gandum ndia, da'di leo tutunu-hohotu natutu'duk neu Manetualain, fo ela Manetualain namahoko. 12Nai faik fo emi tunu-hotu gandum ndia, emi muse tunu-hotu soaneu tutunu-hohotu nanatunuk-ka, bi'ilopo maneanak esa teun esa boe, ma ta lu'u-la'ak fa. 13Tunu-hotu ha'desopuk nanasese'do mina setun kilo dua, soaneu tutunu-hohotu nanatunuk-ka. Tutunu-hohotuk ndia, boon-na nandaa no Manetualain dalen-na. Boeo tunu-hotu angol litel esa, sama-sama no tutunu-hohotuk ndia. 14Emi beita meni tunu-hotuk ndia leo Manetualain neu fa te, ta bole mi'a gandum beuk ndia faaanak boen, nau mamatak do nanadalak do nanatunuk da'di loti so boe. Basa emi tititi-nonosim-mala, muse tunga nakanenetek ndia losa dodoon-na.
Feta keketu-kokoluk
(Bil. 28:26-31)
15 #
Kel. 23:16, 34:22; Ul. 16:9-12 Mulai neme faik fo basa fai Sabat-ta, fo nai lelek emi tunu-hotu gandum puputu makasososak-ka soaneu Manetualain-na, emi muse leke mamaso katemak hitu. 16Nai fai ka limahulun-na, fo nde faik fo basa Sabat ka 7-a, emi muse meni tutunu-hohotu nana'ak soaneu Manetualain. 17Uma loo esan-na, muse tunu-hotu loti dua, soaneu tunu-hotu natutu'duk ba'eneu Manetualain. Muse tao loti esa-na neme ha'desopu sopuanak kilo dua, ma pake laluteik, fo muse fen leo Manetualain neu, da'di leo tunu-hotuk neme dae-a buna-boa makasososan-na mai. 18Leoina Israel-la muse tunu-hotu bi'ilopoana hitu, teuk beke esak, sapi maneanak esa, ma bi'ihiik dua, sama-sama no loti ndia. Ta bole hapu bana lu'u-la'ak nai basa bana sila dalek fa, ma muse nanatunu-hotuk soaneu tutunu-hohotu nanatunuk, no tutunu-hohotu nana'ak ma tutunu-hohotu angol-la ba'eneu Manetualain. Tutunu-hohotuk sila-la, boon-na nandaa no Manetualain dalen-na. 19Boeo, tunu-hotu bi'ihii mane esa, soaneu tutunu-hohotuk fo sala-singok hapu ampon, ma bi'ilopo maneanak dua, teuk beke esak, soaneu tutunu-hohotu mole-dame. 20Imam-ma muse tunu-hotu loti ma bi'ilopoana ka duak sila-la, da'di leo tutunu-hohotu natutu'duk ba'eneu Manetualain, fo imam-ma baba'en-na nde ndia. Tutunu-hohotuk sila-la nde been-na malalao-malalafuk. 21Nai faik ndia, emi muse makabubua fo sene-do'ok, ma ta bole tao ue-le'dis mabela fa. Emi tititi-nonosim muse tunga paleta ndia, losa dodoon-na, ma ala leo su'di nai mamanak bee boe. 22#Im. 19:9-10; Ul. 24:19-22 Metema, emi ketu-kolu soona, boso ke'di gandum manamolik manai emi tinam-ma su'un-na, ma ketu-kolu basa soona, boso meu hehele gandum bei elak-kala. Nemen-na, fo sila soaneu hataholi nuu-taa hata-taak-ka, ma hataholi nusa dea-la. Manetualain nde been-na, emi Manetualaim-ma.
Feta teu beuk
(Bil. 29:1-6)
23-24Nai hataholi Yahudi-la bula ka hitun-na, fain esa soona, muse tao feta, da'di leo fai hehelik soaneu hahaeaok. Fai hahaeaok ndia, ta'du-tanan nde pupuuk-ka liin-na, de emi muse makabubua, fo sene-do'ok. 25Nai faik ndia, tunu-hotu tutunu hohotu nana'ak soaneu Manetualain, ma boso tao ue-le'dis mabela.
Faik fo sala-singok hapu ampon
(Bil. 29:7-11)
26-27 #
Im. 16:29-34
Nai hataholi Yahudi-la, bula ka hitun-na fain sanahulu nde been-na, faik fo feta tunga teuk-ka soaneu leoina Israel-la sala-singon hapu ampon. Nai faik ndia, emi muse okaaom-ma, ma makabubua fo sene-do'ok, boema tunu-hotu tutunu-hohotu nana'ak fe Manetualain. 28Boso maue-male'di, nana faik ndia nde been-na, faik fo sala-singok hapu ampon, fo ela emi hapu ampon nai emi Manetualain matan. 29Ba'eneu see, fo na'a hata esa nai faik ndia soona, ana ta da'di Manetualain anan-nala so'on. 30Ma ba'eneu see, fo naue-nale'di nai faik ndia soona, Manetualain nde hukun nenik huhuku mamates-sa. 31Nakanenetek ndia, nanapakek soaneu basa emi tititi-nonosim, fo ala leo su'di nai bee boe. 32Mulai neme lelek le'do-a tenak, fo nai bulak ndia fain sio, losa lelek fo le'do tenak, nai bulak-ka fain sanahulu, emi muse taon sama leo fai Sabat-ta, fo fai hehelik soaneu hahaeaok. Nai faik ndia dalen-na, emi muse okaaom-mala.
Feta Lalaa Akidook
(Bil. 29:12-40)
33-34 #
Ul. 16:13-15
Feta Lalaa Akidook-ka dodoon-na faik hitu, fo ana mulai nai hataholi Yahudi-la, bula ka hitun-na, fain 15. 35-36Nai fai ka hituk sila-la dalek, emi muse tunu-hotu tutunu-hohotu nana'ak. Nai fai makasososan-na, ma fai ka falun-na, emi muse makabubua, fo sene-do'ok, ma tunu-hotu tutunu-hohotu nana'ak soaneu Manetualain. Boso tao ue-le'dis mabela, nai faik ndia.
37 Manetualain naketu agama fai malolen-nala nde ndia, de emi muse po'a-bengan. Nai fai malole sila-la, emi muse fe ha'da-holomata neu Manetualain nenik makabubua, fo sene-do'ok, ma tunu-hotu tutunu-hohotu nana'ak, tutunu-hohotu nanatunuk, tutunu-hohotu nana'ak, tutunu-hohotu bana, ma tutunu-hohotu angol oek de'u nanapaluuk tunga faik-ka. 38Fai malole sila-la, nalupa tatamak neu fai-fai Sabat biasa, da'di tunu-hotuk sila-la nde been-na, tatamak neu emi tutunu-hohotu biasam-mala, neu emi tutunu-hohotum soaneu nasar, do tutunu-hohotuk no dale hihii-nanau mesan, fo emi fen neu Manetualain.
39 #
Kel. 23:16, 34:22 Ketu-kolu basa, fo mulai hataholi Yahudi-la, bula ka hitun-na, fain sanahulu lima soona, emi muse tao feta faik hitu dalen-na. Fai makasososan-na, ma fai ka falun-na nde been-na, fai hehelik soaneu fai hahaeaok. 40Nai fai makasososak-ka, emi muse seu ai boa neulauk-kala neme emi osim dale mai, boeo ketu ai palma doon-nala, ma helu ai manaleloaka-kala ndanan-nala, fo mulai tao feta namahoko-setelek soaneu fe ha'da-holomata neu emi Manetualain. 41Emi muse tao feta ndia nakandoo, nai faik hitu dalen-na. Emi tititi-nonosim, muse tao tunga nakanenetek ndia losa dodoon-na. 42Faik hitu dalen-na, leoina Israel-la muse lahele leme lalaa akidoon-nala dalek, 43fo ela emi tititi-nonosim bubuluk lae Manetualain nadenu leoina Israel-la, leo lai lalaa ta kandaak-kala dalek, nai lelek Manetualain nos kalua leme Masir mai. Ndia nde emi Amam Manetualaim-ma.
44Leondiak, Musa nanduku-nalosak neu leoina Israel-la nakanenetek-kala, la'eneu fai malole-la eno-dalan leo beek, fo fe ha'da-holomata neu Manetualain.
Currently Selected:
IMAMAT 23: twu
Highlight
Copy
Compare
Share
Want to have your highlights saved across all your devices? Sign up or sign in
