KELUARAN 13

Tunu-hotu ana uluk-kala

1 Manetualain nafa'da Musa nae, 2#Bil. 3:12-13; Luk. 2:23 “Tunu-hotu basa ana uluk-kala fe Au. Basa Israel anatou ulun-nala, ma basa bana-manu ana ulun-nala nde been-na, Au nuung sila.”

Feta Loti Fo Ta Pake Laluteik fa

3Musa nafa'da leoina Israel-la nae, “Nai faik ia, Manetualain, Ana soi-po'i emi nenik koasa matuainan-na, nalosa emi hapu kalua meme Masir, mamanak fo emi da'di ata. Hu ndia de, tao faik ia da'di faik nasanene'dak. Boso mi'a loti fo kamen pake laluteik. 4Nai faik ia, hataholi Yahudi-la bula Abib-pa, do bula ka esa fain esa, emi la'oela nusa Masir-ra. 5No soo-supak, Manetualain helu emi bei-ba'i kaim-mala, fo Ana fe emi leoina Kanaan, Het, Amori, Hewi ma Yebus nusan-na. Manetualain no basa emi leo nusak fo kamasu'i-makabetek, ma maoe-maisik ndia neu so, de tunga teuk, nai hataholi Yahudi-la bula Abib-pa dalek, emi muse tao feta ia. 6Nai faik hitu dalen-na, emi muse mi'a loti fo kamen Ta Pake Laluteik fa, ma neu fai ka hitun-na soona, muse tao feta soaneu fe ha'da-holomata neu Manetualain. 7Nai faik hitu dalen-na, emi ta bole mi'a loti fo kamen pake laluteik fa, ma nai emi nusam dale lala'en-na, ta bole hapu laluteik, do hata esa, ana pake laluteik.

8Nai feta ndia faik makasososan-na, emi muse tui emi anatoum-mala, mae emi tao basa ia-la, nanahu Manetualain tao basa hata lala'en-na soaneu emi, nai lelek emi la'oela nusa Masir-ra. 9Feta ia, ana da'di nasanene'dak soaneu emi, sama leo ta'du esa, nanapa'ak nai emi limam-ma, do emi dedeim-ma. Feta ia fe emi nasanene'dak, fo moke makasi nakandoo, ma manoli Manetualain hoholo-lalanen, nana Manetualain kalua heni emi meme Masir mai, nenik koasa matuainan-na. 10Tao feta ia tunga teuk, nai faik fo nananaketuk-ka.”

Ana uluk

11Musa nafa'da leoina Israel-la nae, “Neukose, Manetualain noo emi leo nusa Kanaan fo Ana helu fen neu emi, ma emi bei-ba'i kaim-mala nenik soo-supak. Metema dae ndia, ana da'di emi nuum soona, 12#Luk. 2:23 emi muse tunu-hotu anatou uluk lala'en-na, ma bana-manu ana maneanan makasososan-nala. Basa sila-la Manetualain nuun, 13tehu keledei-la ana maneanan makasososan-nala, emi muse soi-malas neme Manetualain mai, nenik tunu-hotu bi'ilopo ana esa, da'di neu ngganggatin-na. Metema, emi ta nau soi-ma keledei ndia fa soona, muse helu la'di lesuha'in-na. Emi muse soi-ma emi anatou ulum-mala. 14Metema nai fai makabuin, emi anam-mala latane basa sila-la sosoa-ndandaan hata soona, emi muse mataa mae leo ia, ‘No koasa matuaina, Manetualain noo ita kalua teme nusa Masir-ra mai, mamanak fo ita da'di ata. 15Lelek manek Masir-ra nalanga batu, de ana ta nau po'i ita la'o fa, Manetualain taonisa la'iesak anatou uluk manai Masir-ra, nau hataholi daebafak-ka anan-nala, do bana-manu anan-nala boe. Hu ndia de, ita tunu-hotu fe Manetualain basa bana-manu ana maneanan fo bongi makasososak-ka, tehu ita asa-ta falik ita ana ulun-nala, neme Manetualain mai.’ 16Ha'da-tataok ndia, ana da'di nasanene'dak esa ba'eneu ita, sama leo ta'du esa nanapa'ak nai ita liman-na, do nai ita dedein-na. No enok ndia, neukose ana fe ita nasanene'dak tataas esa, nae Manetualain kalua heni ita teme Masir mai, nenik koasa matuainan-na so.”

Dii ko'as ma dii ha'ik

17Manek Masir-ra, ana po'i basa leoina Israel-la la'o boema, Manetualain ta noos tunga enok manatunga nusa Filistin-na fa, leomae enok ndia eno tetepak. Manetualain dodoo nae, “Boso nalosak hataholi sila-la lasasale dale, metema ala bubuluk, lae sila muse latee-lata'ti, boema ala fali le'us leo Masir leu.” 18Hu ndia de, Manetualain noos tunga enok-ka naleo, fo ala tunga moo solokaek-ka, de leu leo Tasi Gelagah leu. Nai lelek, hataholi Israel sila-la la'oela Masir-ra, ala ho'u tee-tafa sama leo sanga leu latee-lata'ti.

19 # Kej. 50:25; Yos. 24:32 Musa ho'i neni Yusuf dui-kalun, nana nai lelek Yusuf bei naso'da, nadenu hataholi Israel-la soo-supa, fo ala ho'i leni dui-kalun. Yusuf hala hehelun-na nae leo ia, “Nai lelek, Manetualain soi-po'i emi soona, emi muse ho'i meni au popolang-nga, neme mamanak ia mai.”

20Hataholi Israel-la la'oela Sukot boema, ala ofu leme kota Etam-ma, fo nai moo solokaek-ka su'un-na. 21Nai fai lele'don-na, Manetualain la'ok nai uluk, fo nai dii ko'as dale, ma nai fai le'odaen-na, Ana la'ok nakahuluk-kasa nai dii ha'ik dale, fo natu'du enok-ka. No enok ndia, ala hapu la'ok lele'do le'odaen. 22Neme fafaik losa le'odae, dii ko'as-sa nai leoina ndia uluk, ma neme le'odae losa fafaik, dii ha'ik-ka nos.

Currently Selected:

KELUARAN 13: twu

Highlight

Copy

Compare