1 TIMOTIUS 2
2
Tao leo beek fo hataholi kamahehele kala sene-do'ok neu Lamatua ka
1Makasososa na, au oke anseli, fo ela o manoli salani kala, dokodoe ma hule-haladoi, boema loke makasi neu Manetualain, soaneu basa hataholi lala'ena; 2soaneu mane-mane kala, ma basa hataholi mana ho'u koasa lala'ena. Moke fo ela ita taso'da no nee nee-lino linok, mole-dame soaneu Manetualain, no ha'da-tatao matetu-mandaak. 3Ndia nde malole ma nandaa no Manetualain, fo ita mana Soi-Tefa na, dale na. 4Ana nau, fo ela basa hataholi lala'ena hapu so'dak, ma lalelak eno ndo sa. 5Nana, hapu ka'da Manetualain esa mesa kana, ma hapu ka'da hataholi esa mesa kana nde da'di hataholi tala'dak, soaneu Manetualain no hataholi daebafa ka, fo nde Kristus Yesus. 6Yesus Kristus ia, hataholi daebafak esa, fo Ana fe heni ao ina na, soaneu Ana soi tefa na basa hataholi lala'ena, leme sala-singo nala mai. No enok ndia, Manetualain naketu la'e fai na nae, Ana nau basa hataholi lala'ena, hapu so'dak. 7#2Tim. 1:11 Hu ndia de, nadenu au u leo hataholi ta Yahudi la, fo au tui-benga fes, halak la'eneu namahehele ka, ndo na. Fo au afa'dak ia nde bee na, tete'e ka, au ta pepeko fa.
8Au nau, fo ela su'di nai mamanak bee ndia boe, basa tou kala hule-haladoi no dale malalaok, boso no nasa-meluk do nale'a-napilik.
9 #
1Ptr. 3:3
Ela leo been-na, basa ina kala bubu'u-dada'a ao ina nala no mandaa na, ma ala pake-nggao no ha'da-holomata. Ala boso nggute adu-dodoki langa doo nala, do pake lilo pila poemata, do ala pake bua lo'a kabeli ina la. 10Te ela leo bee na, ina kala bubu'u-dada'a ao ina nala, ninik tatao-nono'i malole, fo besa ka nandaa ba'eneu inak fo, lamahehele neu Manetualai na. 11Ina kala muse lanoli no pe'dao nala, ma tunga paleta. 12Au ta nau ina kala lanoli do ala paleta tou kala fa; muse ala pe'dao nala. 13#Kej. 2:7, 2:21-22 Nana Manetualain nakadada'dik hataholi makasososa ka nde Adam, de besa ka Hawa. 14#Kej. 3:1-6 Boema nitu a ta ke'di ndiu Adam fa, te ana ke'di ndiu ka nde ina ka dei, de nalosa ana la'o lena Manetualain paleta na. 15Leomae leondiak boe, neukose ina ka hapu so'dak, nana ana bongi anak; sa'di no dale nakaloe aok, namahele nahele Kristus, ma ana sue-lai nahele hataholi fe'ek, ma naso'da malalaok neu Manetualain.
Currently Selected:
1 TIMOTIUS 2: twu
Highlight
Copy
Compare
Share
Want to have your highlights saved across all your devices? Sign up or sign in
