Zakaria 14
14
Jerusalema ni matiko.
1Languta, gata a siku ga Jehova, legi ku ta nga avanyiswa ha gona a muphango wa wena xikari ka wena.
2Hakuva nzi ta tsombanyisa a matiko wontlhe kasi kulwa ni Jerusalema, a muti wu ta tekiwa, a tiyindlu ti phangiwa, ni vavasati va pfinyiwa. A khihlanya ga vanhu va muti gi ta yiswa wukhumbini, kanilezi a misalela ya vanhu yi nga ta humeswa mutini.
3Zonake Jehova i ta huma a yalwa ni matiko lawo, khwatsi hilezi a nga lwisa zona a sikwini ga yimpi.
4Hi siku lego i ta yima hi mikonzo yakwe le xitsungeni xa maOliva, kusuhani ni Jerusalema hi tlhelo ga Muhuma-gambo; a xitsunga xa maoliva xi ta avanyeka hi laha xikari, ku sukela tlhelo ga Muhuma-gambo kala Mupela-gambo. Laho ku tava kona a nzhelelo wa hombe, a khihlanya ginwe ga xitsunga gi ta tshinela Nwalungu, a ginwani gi tshinela Dzongeni.
5Mu ta tsutsuma hi minzhelelo ya zitsunga za mina, hakuva a minzhelelo ya zitsunga za mina yi ta chikela ni le Azeli. Mu ta tsutsuma khwatsi hi lezi mu nga tsutsuma a xitsekatseka xa misava masikwini ya Uzzia a hosi ya ka Juda. Zonake Jehova a Nungungulu wa mina i tata, ni vontlhe va basileko zinwe na wena.
6A siku lego, a kuwonekela ku nga tava kona, a ziwoningo za tilo zi ta pfhupeliswa.
7Kanilezi gi tava siku legi gi tibyiwako hi Jehova; gi nga tava ni hlikanhi hambu wusiku, kanilezi laha gambyeni ku tava kona kuwonekela.
8Hi siku lego a mati ya xibuka xi nga pswhiko ma ta huma Jerusalema, a khihlanya ga wona ma ta khulungela bimbini ga Muhuma-gambo, a ginwani khihlanya gi khulungela bimbini ga Mupela-gambo. Ma tava tano laha ximunwini ni laha wuxikeni. Deut. 11:24; Joh. 4:14; Kuv. 22:1
9Jehova i tava hosi ya misava yontlhe; hi siku lego Jehova i tava munwe, ni vito gakwe gi tava ginwe. Mal. 1:11; Joh. 10:16
10A tiko gontlhe kusukela Geba kala Rimmoni le Dzongeni ga Jerusalema, gi ta hunzuka livala. Jerusalema gi ta tlakuka a tshama wutshanwini gakwe, kusukela nyangweni ya Benjamini kala nyangweni yo ranga, ni ku kala nyangwa ya laha gwitsini; ni kusukela le khokholeni ga Hananeli kala le maphisweni ya hosi. Jox. 15:32; 2 Tih. 14:13; Neh. 3:1, 6
11A vanhu va ta aka lomo, ku nga tava na nzhukano kambe; Jerusalema gi ta tshama hi kurula.
12Lowu hi ntungu lowu Jehova a ta ngaba ha wona a matiko wontlhe lawa ma ngalwa na Jerusalema: A nyama yabye yi ta bola na va yimile hi mikonzo yabye; a mahlo yabye ma ta bola lomu makheleni ya wona, ni tirimi tabye ti ta bola; lomu milonwini yabye.
13Hi siku lego ku tava ni pfilupfilu ya hombe xikari kabye yi humako hi ka Jehova, kasi munwe ni munwani a vukela muakelane, a nawuluta woko gakwe ka muakelane.
14Juda i ta lwawu le Jerusalema; a titshomba ta matiko wontlhe ma gamekeneko ti ta tsomhanyiswa: a nzalama, ni siliva, ni tinguwo to tala.
15A ntungu lowu wu ta ngaba a mahaxi, ni mamula, ni makameli, ni timbongola ni zontlhe zihari zi nga lomo wugovelweni, wu ta fanana ni lowu wo ranga.
16A misalela ya matiko wontlhe lawa ma ngalwa ni Jerusalema, lembe ni lembe yi ta kanziha ku ya khozela Hosi Jehova wa tiyimpi, ni ku ya maha a mubuzo wa mixaxa.
17Ni lihi lixaka laha misaveni leli li to kala li nga kanzihi Jerusalema a ku ya khozela Hosi, Jehova wa tiyimpi, li nga ta niselwa a vula.
18Ni va lixaka la vaGipite, loku va nga kanzihi vaya kona, vonawu va nga ta niselwa. Hi wona a ntungu lowu Jehova a ta ngaba ha wona a matiko wontlhe lawa ma to kala ma ngayi ma ya maha mubuzo wa mixaxa.
19Lowu wu tava a tsayiso wa Gipite, ni wa matiko wontlhe ma to kala ma ngayi ma ya maha mubuzo wa mixaxa.
20A siku lego ku ta tsaliwa laha ka vanyangende va mahaxi ku ngalo: Ku basiselwe Jehova. A timbita leti ti nga lomu ndlwini ya Jehova ti ta fanana ni mingelo leyi yi nga mahlweni ka alati. Ekso. 28:36
21Ina, tontlhe timbita ta le Jerusalema ni ta le Juda ti tava ti basiselwe Jehova wa tiyimpi, kasi ni wihi a phahlelako i ta zi kota ku teka yinwe ya tona a bhika ha yona. Hi siku lego ku nga tava kona a muKanani lomu ndlwini ya Jehova wa tiyimpi. Joeli 3:17; Kuv. 21:27
Currently Selected:
Zakaria 14: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
