Zakaria 12
12
A kutlharihiswa ka Jerusalema.
1A mhaka ya xiprofeto xa Jehova ha Israeli. Jehova loyi a tshambutelako matilo, a yimisa xiseketelo xa misava, a wumba moya wa munhu nzeni kakwe, i ngalo:
2Langutani, nzi ta maha Jerusalema a kuva gombe gi mahako matiko wontlhe ma gi ranzelekeleko ma dedereka, zive tano ni ka Juda laha Jerusalema gi ta nga vimbezelwa.
3A siku lego Jerusalema nzi ta gi maha a ribye go binza ka matiko wontlhe; vontlhe lava va ta nga gi tlakula va ta bayiswa; a matiko wontlhe ma ta tsombana ma gi vukela.
4Hi siku lego, ku wula Jehova, nzi ta dzukisa a mahaxi wontlhe, nziba a vakhileli va wona hi lihlanyi. Kanilezi nzi ta cuwuka a yindlu ya ka Juda hi mahlo ya mina, nzi maha mahaxi wontlhe ya matiko kuva zikhumu.
5A tihosana ta ka Juda ti taku timbilwini ta tona: A vaaki va Jerusalema i ntamu wa hina ha Jehova wa tiyimpi, a Nungungulu wabye.
6Hi siku lego nzi ta maha a tihosana ta ka Juda ti ku khwatsi i mbawula ya nzilo xikari ka tihunyi, khwatsi xihlahle xa nzilo xikari ka tinyanza. Ti ta lovisa matiko ya le kusuhi hi tlhelo ga xinene ni ga xibhabha; a Jerusalema gi tava wutshanwini ga gona, kwa le Jerusalema.
7Jehova i ta ponisa kuranga a matenda ya ka Juda, kasi a wudzunzo ga yindlu ya ka Davida ni wudzunzo ga vaaki va Jerusalema gi nga hunzi legi ga Juda.
8Hi siku lego Jehova i ta vikela a vaaki va la Jerusalema; hi siku lego loye wa gome i ta ku khwatsi hi Davida, ni yindlu ya Davida yi ta ku khwatsi hi Nungungulu, yi ku khwatsi i ngelosi ya Jehova mahlweni kabye. 1 Sam. 17:50; 18:7; 2 Sam. 17:8
9A siku lego nzi ta hlota ku lovisa wontlhe a matiko lawa ma ta ngata ku ta vukela Jerusalema.
10Nzi ta chulula a moya wa wunene ni wa mikhongelo hehla ka yindlu ya ka Davida ni hehla ka vaaki va Jerusalema; zonake va ta cuwuka ka mina loyi va nzi tlhavileko. Va ta mu rilela kukotisa loku va rilela a nʼwana wabye wa munwe, va ta mu karatekela, khwatsi hi loku va karatekela a matewula yabye. Joh. 19:37; Kuv. 1:7
11Hi siku lego ku tava ni hlomulo wa hombe le Jerusalema, wo fanana ni hlomulo wa Hadadrimmoni lomu mikoveni ya Megiddoni.
12A tiko gi ta rila, a lixaka linwe ni linwani li tava ni xirilo xa lona; a lixaka la yindlu la ka Davida hi tlhelo, ni vasati va kona hi tlhelo; a lixaka la yindlu ya ka Natani hi tlhelo, ni vasati va kona hi tlhelo;
13a lixaka la yindlu ya ka Levi hi tlhelo, ni vasati va kona hi tlhelo; a lixaka la Ximei hi tlhelo, ni vasati va kona hi tlhelo;
14tontlhe leti tinwani tixaka, linwe ni linwani hi tlhelo, ni vasati va kona hi tlhelo.
Currently Selected:
Zakaria 12: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
