Kuvululelwa 19
19
A va le tilweni va bonga Nungungulu hi kota ya kuwa ka Babuloni.
1Anzhako ka lezo nzi lozwa a ku khwatsi i gezu ga hombe le tilweni, giku: Haleluya! A kuhanyisa, ni wudzunzo, ni ntamu zi lumba Nungungulu wa hina; Xip. 4:11; 7:10, 12; 11:15
2hakuva a kulamula kakwe ku nene ku lulamile; hakuva i lamule a xibhayi leʼxa hombe, lexi xi nga holisa misava hi kubhaya ka xona, i photele a nkhata wa malanza yakwe ka xona. Deut. 32:43; Xip. 15:3
3Va engeta vaku: Haleluya! Ni musi wa xona wu tuvika kala kupinzuka ni kupinzuka. Isa. 34:10
4A 24 wa manghanakana ni mune wa zimahwa zi hanyako zi lowa hasi zi khozela Nungungulu loyi a tshamileko xitshanwini xa wuhosi, ziku: Amen, Haleluya! 1 Kro. 16:36; Neh. 5:13; Xip. 4:4, 6
5A gezu gi lo huma xitshanwini xa wuhosi, giku: Khesani Nungungulu wa hina, nwina malanza yakwe nwentlhe, nwina lava mu mu chavako, a vatsongwani ni vahombe. Tis. 134:1; 135:1
6Nzi lozwa a ku khwatsi i gezu ga xidlemo xa hombe, giku khwatsi i gezu ga mati manyingi, giku khwatsi i gezu ga kudzinza ka ntamu, giku: Haleluya! hakuva ku fuma Hosi Nungungulu wa hina. Ezek. 1:24; 43:2; Xip. 11:15
7A hi nengeleni hi tsaka nguvu, a hi dzunzeni yena; hakuva a xikhati xa muchado wa Yivana xi chikele, ni sati wa yona i ti longisele. Efe. 5:32; Xip. 21:2, 9
8I lo nyikiwa ku ambala tinguwo to saseka ta wukene, ti basisilweko tiku pa! A tinguwo to saseka ta wukene hi mitiro ya kululama ya vobasa. Tis. 45:13, 17; 132:9
9Yiku ka mina: Tsala: Va katekile lava va rambilweko mubuzweni wa muchado wa Yivana. Yi engeta yiku ka mina: Leti hi timhaka ta zinene ta Nungungulu. Mat. 22:2, 3; Lu. 14:15, 16
10Nzi lowa hasi mikonzweni ya yona a ku yi khozela, kanilezi yiku ka mina: Hi nga wona, u nga mahi lezo! Nzi nanza khwatsi hi wena ni vamakabye va wena lava va nga hi wukustumunyu ga Jesu. Khozela Nungungulu, hakuva a wukustumunyu ga Jesu hi moya wa kuprofeta. 1 Joh. 5:10; Xip. 22:8, 9
A sochwa gi, tsumbekileko ni ga zinene.
11Nzi lo wona tilo na gi vululekile, ku woneka a haxi go basa, ni loyi a nga khilele ka gona i vitanwa Kutsumbeka ni Zinene; wa lamula alwa hi kululama. Isa. 11:4; Xip. 3:14; 6:2; 15:5
12A mahlo yakwe ma kotisa malangavi ya nzilo, ni hlokweni yakwe ku hi ni zidlodlo zinyingi; a hi ni vito gi tsalilweko, legi ku nga hiko kona loyi a gi tivako saseka yena yece. Xip. 2:17, 18; 6:2
13I wa ambele a nguwo yi petilweko lomu nkhateni; a vito gakwe i wa hi Gezu ga Nungungulu. Isa. 63:2, 3; Joh. 1:1
14Ni mabutho ya le tilweni ma lo mu lanzela, na ma khilele mahaxi yo basa, na ma ambele a tinguwo to saseka ta wukene ti basileko tiku pa. Mat. 28:3; Xip. 14:20
15Ku huma nonwini wakwe a supado yo kariha, leyi a ta ngaba matiko ha yona. I ta ma fumela hi nhonga ya xiketse; i ta kamela xigowolweni xa vinya ga zanga yi tshisako ya Nungungulu Nyamintamu. Tis. 2:9; Isa. 11:4; 3:3; Xip. 1:16; 2:27
16Laha ngubyeni yakwe hi laha xiwunwini ku wa tsalilwe a vito gaku: Hosi ya tihosi tlhelo Mufumeli wa vafumeli. Dan. 2:42; 1 Tim. 6:15; Xip. 17:4
17Nzi lo wona ngelosi na yi yimile gambyeni; yi lo kanyuluka hi gezu ga hombe yiku ka zinyanyani zontlhe zi purumako ndengelengeni: Tanani mu ta tsombana mubuzweni wa hombe wa Nungungulu. Ezek. 39:17
18Mu taga a nyama ya tihosi, ni nyama ya tinduna, ni nyama ya tinhenha, ni nyama ya mahaxi ni ya lava va khileleko ka wona, ni nyama ya vontlhe lava va tlhatlhekileko ni tikhumbi, a vatsongwani ni vahombe.
19Nzi lo wona xihari ni tihosi ta misava, ni mabutho ya tona, na va tsombene a kulwa ni loyi a khileleko haxini ni yimpi yakwe.
20A xihari xi lo khomiwa zinwe ni muprofeti wa mawunwa, loyi a nga maha zirewukiso mahlweni ka xona, lezi a nga khohlisa ha zona lava va nga wa amukele a xifungo xa xihari, ni lava va nga khozela a xifananiso xa xona; hi wumbiri gabye va lo hoxwa na va ha hanya lomu tiveni ga nzilo legi gi vurako hi solufa. Dan. 7:11; Xip. 13:12; 14:10; 16:13
21A vanwani va lo dawa hi supado leyi yi humako nonwini wa loyi a khileleko haxini; ni zinyanyani zontlhe zi lo xura hi nyama yabye.
Currently Selected:
Kuvululelwa 19: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
