Mavingu 7
7
1Nwananga, hlayisa timhaka ta mina, veketela zileletelo za mina mbilwini ya wena.
2Hlayisa zilayelo za mina, u ta hanya; hlayisa a nayo wa mina kukotisa a nzololwani ya tihlo ga wena.
3Zi bohe titihweni ta wena, zi tsala hehla ka mbilu ya wena. Ekso. 13:16; Deut. 6:8
4Wula ka wutlhari, uku: Wena u makweru; i kupimisisa u ku vitana lezaku i nakuloni:
5Kasi za ku ponisa ka wasati wa xibhayi; ka sati wa muakelane loyi a xengetelako hi timhaka takwe.
6Hakuva laha njhaneleni ya yindlu ya mina, zi lo cuwuka hi lomu ka mavanga ya yona,
7Nzi lo wona xikari ka zipumbu, zi langutisisa xikari ka lava vaswa, jaha legi gi nga hi hava kupimisisa,
8Na a famba hi ndlela, kusuhani ni gwitsi laha ku nga hi ni wasati loye, lo kongoma ndlwini yakwe,
9A xikhatini xa gambo, laha na gi ya kupeleni, i xikhatini xa munyama wa wusiku.
10Languta a wasati i lo mu khinga, a ambele zo ti kombisa lezaku xibhayi, ni mbilu ya wumbyori;
11Wa guwa ni xikanikani, mikonzo yakwe cima a yi tshami ndlwini yakwe;
12Zalezo a wonekako lahandle, hi xikhanzakanya i le ndleleni, tshama a rinzela lomu mahanzakanyeni wontihe ya maruwa.
13Zonake i lo mu khoma a mu pswopswa, i nghohe yi nga hiko na tingana, aku kakwe:
14Nzi humesile muphahlelo wa kubonga, egi siku nzi tatisile zifungo za mina; Mitse. 15:3
15Hikwalaho nzi humile ku ku khinga,
Zi ku lavile nguvu, makunu nzi ku kumile.
16Nzi andlele mubhedi wa mina hi tinguwo to saseka, i tinguwo ti lukilweko hi wukene ta le Gipite.
17Nzi nwatsekele mafura ya mure mubhedini wa mina, i aloese, ni kinamona.
18Tana hi ta ti tsakisa hi liranzo kala gica, hi ti tsakise wutsumbu ga hina, hi ranzana.
19Hakuva a nuna wa mina a nga kona, enzele kule.
20I fambile ni nkwama wa mali, ta wuya kaya loku a hweti yi tala.
21Lezo wa mu kanganyisa hi timhaka takwe to tala, i milomu yakwe yo xengetela wa mu kurumeta.
22Zalezo wa mu lanzela, ukotisa a homu yi yako kutlhabyiweni, hwatsi xipumbu xi yako kutsayisweni;
23Kala ligalala li tlhava xivinzi xakwe, ukotisa xinyanyani xi tsutsumelako ku wela tlhanwini, a xi nga zi tivi lezaku wu ta lovisa wutomi ga xona.
24Hikwalaho, vana vanga, nzi ingiseni, uzwa a timhaka ta nomu wa mina.
25A timbilu ta nwina ngha ti nga kokiwi hi tindlela takwe, u nga pengi mu lanzela tisoko takwe.
26Hakuva vanyingi a nga va lamata vawa lahasi, na, xidlemo xa hombe a nga xi lovisa.
27A yindlu yakwe i ndlela yi yako Xeole, i kongomako tindlwini ta kufa.
Tshwa Bible © Bible Society in Mozambique, 1972, 2007.