Mitsengo 23
23
1Balaami i te ngalo ka Balake: Nzi akele kwalaha 7 wa maalati, zonake u nzi longisela 7 wa tinkuzi ni 7 wa tihamba.
2Balake i lo maha khwatsi hi lezi Balaami a wulileko; zonake Balake na Balaami va lo tlhava a nkuzi ni hamba hehla ka alati ginwe ni ginwani.
3Zonake Balaami aku ngalo ka Balake: Yima kwalaho kusuhani ni muphahlo wa wena wo hiswa, mina nzi taya tlhelweni; kutani Jehova i tata woneka ka mina; zonake nzi ta ku byela lezi a ta nga nzi kombisa. I lo tlakukela kuya laha ku basileko.
4Nungungulu i lo woneka ka Balaami, Balaami aku ka yena: Nzi longisile a maalati lawa ya ntlhanu ni mambiri, nzi nyikela a nkuzi ni hamba hehla ka alati ginwe ni ginwani.
5Zonake Jehova i lo veka timhaka nonwini wa Balaami, aku ngalo: Tlhela uya ka Balake uya mu byela lezi ni lezi.
6I lo tlhela aya kakwe, a ya mu kuma na a yimile kusuhani ni muphahlo wakwe wa kuhiswa, zinwe ni tihosana tontlhe ta maMoabi.
7Zonake Balaami i lo vumba, aku:
Balake i nzi vitanile na nzi hi le Arama,
A hosi ya Moabi yi nzi relelisile zitsungeni za le Mutsuwuka-gambo, aku:
“Ngone u ta nzi phungela Jakobe!
Ngone u ta zangarela Israeli!” Deut. 23:4
8Nzi ta mu phungisa kuyini loyi Nungungulu a nga mu phungangiko ke?
Nzi ta mu zangarelisa kuyini loku Jehova a nga mu zangarelangi ke?
9Hakuva nza mu wona na nzi hi hehla ka ribye,
Nzi mu cuwuka na nzi hi zitsungeni.
Langutani, i vanhu lava va tshamako tlhelo,
Lava va nga ti hlayiko ku fanana ni manwani matiko.
10Himani a ta nga hlaya Jakobe a teleko kota tshuri ke?
Hambu ku tiva tsengo wa xipanze xa wumune xa vaIsraeli ke?
A nzife hi kufa ka valulamileko,
Ni kugumesa ka mina a ku kote ka vona! Gen. 13:18; 28:14
11Balake i te ngalo ka Balaami: Hikuyini u nzi mahela lezi ke? Mina nzi ku vitanele ku ta phunga valala va mina, kanilezi wena wo va katekisa!
12Yena i lo hlamula, aku ngalo: Xana a nzi faneli ku wula ntsena lezi Jehova a vekileko nonwini wa mina ke?
13Balake i te ngalo kakwe: Mina nza ku khongotela, a hi fambe hi ka ginwani tlhelo laha u ta nga va wona xipanzana xabye, na u nga va woni vontlhe; u ta va phunga na u hi laho.
14I lo mu yisa masinwini ya le Zofima, le hehla ka Pisga, laho i lo aka a 7 wa maalati, a tlhava a nkuzi ni hamba hehla ka alati ginwe ni ginwani.
15Zonake Balaami aku ngalo ka Balake: Yima laha kusuhani ni muphahlo wa wena wa kuhiswa, mina nzi taya tlhangana na Jehova lahaya.
16Jehova i lo woneka ka Balaami, a veka timhaka nonwini wakwe, aku ngalo: Tlhela uya ka Balake, u taya mu byela lezi ni lezi.
17Zonake i lo tlhela aya ka yena, aya mu kuma na yimile kusuhani ni munyikelo wakwe wa kuhiswa, ni tihosana ta maMoabi ti wa hi zinwe na yena. Balake i te ngalo kakwe: Jehova i te yini?
18Balaami i lo vumba, aku:
Vuka Balake, u ingisa!
Demba ndleve, wena nʼwana wa Zipore!
19Nungungulu a hi munhu a hembako,
Ge a hi nʼwana wa munhu a hunzulukako.
Kasi hi yena wo wula a wuya a nga mahi ke?
Xana ngwo wula a wuya a nga mbhelelisa ke? 1 Sam. 15:29; Tit. 1:2
20Hakunene i nzi leletele ku katekisa;
I katekisile, cima nzi nga ta hunzulusa.
21A nzi kumi khombo ka Jakobe,
Hambu ni ku wona kukarateka ka Israeli.
Jehova, Nungungulu wakwe, i zinwe na yena,
I Hosi yabye leyi va mahako guwa ga ku yi tsakela.
22Nungungulu i va humesile le Gipite.
Yena i va nyikile a ntamu wa nyari,
23Hakuva ku hava wutumbe go vukela Jakobe;
A ku na wungoma go vukela Israeli.
Ku ta wuliwa ha Jakobe na Israeli hi xikhati xa zona,
Zini lezi Nungungulu a nga zi mahangiko!
24Mbanhu lava va vukako kota pswele ga nghala,
Va ta yima khwatsi matsune wa nghala.
Yi nga ta etlela na yi nga se kuga a pfimba wa yona,
Ni kunwa a nkhata wa lava va delweko. Gen. 49:9
25Zonake Balake aku ngalo ka Balaami: Loku u nga lavi ku va phunga, u nga va katekisi!
26Balaami aku ngalo ka Balake: Xana a nzi ku byelangi mina, lezaku zontlhe lezi Jehova a ta nga zi wula nzi ta zi maha ke?
27Balake aku ngalo ka Balaami: Ngone hi famba hi ka ginwani wutshamu; kutani Nungungulu i ta vumela ku va fumba ka gona.
28Balake i lo yisa Balaami le hehla ka Peora, ngomama ni xiwula.
29Balaami aku ka Balake: Nzi akele khwalaha a 7 wa maalati, u nzi longisela a 7 wa tinkuzi ni 7 wa tihamba.
30Balake i lo maha kota lezi Balaami a mu byelileko; i lo tlhava a nkuzi ni hamba hehla ka alati ginwe ni ginwani.
Currently Selected:
Mitsengo 23: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
