Mitsengo 16
16
A kuhluwuka ka Kora.
1Makunu Kora a nʼwana wa Izhare wa Kohati wa Levi, zinwe na Datani na Abiramu, a vana va Eliabe, na Oni a nʼwana wa Peleti lava hi wunharu gabye va nga vana va Rubeni;
2va lo vukela Mosi zinwe ni 250 wa vavanuna va vanana va ka Israeli, lava ti nga tihosana ta tlhangano, a ziro za hubye, na va hi madota ma dumileko.
3Va lo tsombana va vukela Mosi na Aroni, vaku ka vona: Zi ringene, hakuva wontihe tlhangano wu basile, na Jehova i kona xikari ka wona! Hikuyini mu ti kukumukisa hehla ka tlhangano wa Jehova ke?
4Laha Mosi na zwile lezo zilo, i lowa lahasi hi nghohe yakwe,
5aku ngalo ka Kora ni ntlawa wakwe: Manziko Jehova i ta kombisa lava va nga vakwe, ni lava va basileko a kuva va tshinela ka yena; zonake loyi Jehova a ta nga mu hlawula, i ta mu tshineta kakwe.
6Wena Kora ni vanhu va wena vontlhe, mahani lezi; tekaniwo a zibya za libani.
7Manziko mu ta oka a nzilo ka zona, mu cela ni libani hehla ka zona mahlweni ka Jehova, zonake loye Jehova a ta nga mu hlawula hi yaloye a basileko. Zi enele lezo, nwina vana va ka Levi!
8Zonake i lo engeta aku ngalo ka Kora: Zwanani nwina, vana va ka Levi:
9kasi xilo xitsongwani ka nwina, lezi Nungungulu wa ka Israeli a mu hlawulileko ka tlhangano wa va ka Israeli, a mu tshineta kusuhani ka yena kasi mu tira a ntiro wa yindlu ya Jehova, ni lezaku mu yima mahlweni ka tlhangano mu wu wulawulela ke?
10I ku tshinetile kusuhani na yena, wena ni vamakabye va wena vontlhe va vana va ka Levi, ni lezo ma ha navelako a kuva vapristi kambe!
11Hikwalaho mu tlhangene wena ni vanhu va wena vontlhe a kulwa na Jehova! Xana Aroni o va mani yena wo kala mu monya ha yena ke?
12Mosi i lo rumela kuya vitana Datani na Abiramu, a vana va Eliabe; vona va te ngalo: Hina hi nga tata.
13Kasi xilo xitsongwani lezi u hi humesileko tikweni legi gi khulungako a masi ni wulombe, u hi daya lomu xiwuleni, u engeta u ti maha hosi hehla ka hina ke?
14Kambe wena a ku hi chikelangi a tikweni legi gi khulungako a masi ni wulombe; kambe a ku hi nyikangi a masimu ni zivina a kuva tshomba ya hina! Kasi wena u lava ku boxa a mahlo ya lava vanhu ke? Hina hi nga tata.
15Zonake Mosi i lo zangara nguvu, aku ka Jehova: U nga amukeli munyikelo wabye! Mina a nzi tekangi ni mbongola yinwe ka vona; ge ni ku kalavela ni munwe wabye. Gen. 4:5; 1 Sam. 12:3
16Mosi a ku ngalo kambe ka Kora: Ngonani manziko mahlweni ka Jehova, wena ni tlhangano wontihe wa wena, yenawu Aroni i tata.
17Tekani zibya, munwe ni munwani wa nwina, mu chela ka zona a tibani, zonake loyi ni loyi i ta neha a xibya xakwe mahlweni ka Jehova, zi tava 250 wa zibya; wena na Aroni mu ta teka a zibya za nwina hi wumbiri ga nwina.
18Va lo teka a zibya zabye, va chela a nzilo lomo, va vekela a tibani lomu nzeni ka zona, zonake va yima laha nyangweni ya tenda ga mutlhangano, zinwe na Mosi na Aroni.
19Zonake Kora i lo tsombanyisa a ntlhangano wakwe wontihe laha nyangweni ya tenda ga mutlhangano, zonake a kungangamela ka Jehova ku lo woneka mahlweni ka tlhangano wontihe.
20Jehova i lo wulawula ka Mosi na Aroni, aku:
21Tlhatukani xikari ka tlhangano lowu, nzi ta va lovisa khatiginwe.
22Kanilezi vona va lowa hi tinghohe tabye, vaku: O Nungungulu, Nungungulu wa mimoya ya nyama yontlhe! U ta zangarela a tlhangano wontihe hi kuonha ka munhu munwe ke? Joba 12:10
23Zonake Jehova i te ngalo ka Mosi:
24Byela a tlhangano wontihe, uku: Sukani nwina ka wuakelo ga Kora, na Datani, na Abiramu.
25Zonake Mosi i lo vuka aya ka Datani na Abiramu; ni masingalakati ya ka Israeli ma lo mu lanzela.
26Mosi i lo byela a tlhangano wontihe aku ngalo: Humani matendeni ya vanhu lava vo biha, mu nga henyi ni nchumu xa lezi zi nga zabye, mu nga loviswa hi kota ya zionho zabye zontlhe.
27Zinghaho va lo huma lomu tendeni ga Kora ni ga Datani ni ga Abiramu hi matlhelo wontihe; Datani na Abiramu va lo humawo, va yima lomu tinyangweni ta matenda yabye, zinwe ni vasati vabye ni vanana vabye, ni zihlangana zabye.
28Zonake Mosi aku ngalo: Hi ka lexi mu ta zi tiva lezaku Jehova i nzi rumile ku maha zontlhe lezi, ni lezaku lezi zilo a zi humi mbilwini ya mina.
29Loku vanhu lava vafa kota, lezi va fisako zona vanwani vanhu, ni loku lava vanhu vafa hi ku humelwa hi lezi zi humelako vanwani vanhu; Jehova a nga nzi rumangi.
30Kanilezi loku Jehova a humesa a xilo xiswa, ni loku a misava yi ahlama a nomu wa yona yi va mita ni zilo zabye zontlhe, ni loku va relela na va ha hanya lomu nkeleni, zonake mu ta zi tiva lezaku lava vanhu va lo xanza Jehova.
31Laha na a mbhetile ku wulawula tontlhe leti timhaka, a misava leyi yi nga wa hi lahasi kabye yi lo avanyeka.
32A misava yi lo ahlamisa a nomu wa yona, yi va mita ni mingango yabye, ni vanhu vontlhe va Kora, ni yontlhe tshomba yabye. Deut. 11:6; Juda 11
33Va lo relela na va ha hanya, ni zilo zabye zontlhe lomu Xeole; a misava yi lo va fenengeta, va lova xikari ka tlhangano.
34Zonake a va ka Israeli lava va nga wa va ranzele va lo tsutsuma hi tihuwa tabye; hakuva va waku: A hi tsutsumeni kasi misava yi nga hi mitiwo!
35Ni nzilo wu lota hi ka Jehova, wu ta lovisa lava va 250 wa nga wa hisile tibani.
36Zonake Jehova i lo wulawula ka Mosi, aku:
37Byela Eliazare a nʼwana wa mupristi Aroni, lezaku a susa a zibya za tibani xikari ka nzilo, a hangalasela kule a nzilo wa kona, hakuva zi basile.
38A zibya lezi a vanhu va onhileko mihefemulo yabye ha zona zi ta tlombiwa zi maha ziphambati za ku lemela a alati ha zona; hakuva zona zi nyikelwe mahlweni ka Jehova, na zona zi basile; zi tava xialakanyiso ka vanana va ka Israeli.
39Zinghaho mupristi Eliazare i lo teka a zibya lezo za suku zi nyikelweko hi lava va hisilweko, zi tlombiwa va nameketa ha zona a alati,
40ziva xialakanyiso ka vanana va ka Israeli; kasi ku nga dzuki kuva ni munhu munwe loyi a nga hiko wa lixaka la ka Aroni a ta nga tshinela a nyikela a libani mahlweni ka Jehova, ku nga taku a kota Kora ni ntlawa wakwe, khwatsi hilezi Jehova a wulileko ka yena hi nomu wa Mosi.
41Kanilezi hi siku gi gamelako, wontihe tlhangano wa vanana va ka Israeli wu lo sola, wu vukela Mosi na Aroni, wuku: Nwina mu dele a vanhu va Jehova.
42Zonake laha a tlhangano wu nga wa tsombene a ku vukela Mosi na Aroni, vona va la su hunzulukela le tendeni ga mutlhangano, languta, a refu gi wa gi fenengetile, ni kungangamela ka Jehova ku lo woneka.
43Mosi na Aroni va loya mahlweni ka tenda ga mutlhangano.
44Jehova i te ngalo ka Mosi;
45Sukani xikari ka lowu tlhangano, nzi ta wu lovisa lokuloku. Kanilezi vona va lowa hi tinghohe tabye.
46Zonake Mosi aku ka Aroni: Teka a xibya xa ku hisela a libani u oka a nzilo wa lomu ka alati, u vekela lomo a libani, u hatlisa uya xikari ka tlhangano, uya maha muphahlelo wa nzhiho; hakuva ku kona a zanga yi tako hi mahlweni ka Jehova, a ntungu wu sangulile.
47Zonake Aroni i lo teka a xibya xa ku hisela a libani khwatsi hilezi Mosi a wulileko, a tsutsuma aya xikari ka tlhangano; kasi a ntungu wu wa sangulile xikari ka vanhu; kanilezi i lo chela libani nzilweni, a mahela vanhu a nzhiho.
48Yena i lo yima xikari ka lava va hanyako ni lava va fileko, zonake a ntungu wu lo khawuka.
49Lava va nga wa file hi ntungu lowo va wa hi 14,700, ahandle ka lava va ngafa hi kota ya Kora.
50Zonake Aroni i lo tlhelela ka Mosi le nyangweni ya tenda ga mutlhangano, hakuva a ntungu wu wa khawulile.
Currently Selected:
Mitsengo 16: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
