Mitsengo 13
13
A kuhlolwa ka tiko gi tsumbisilweko.
1Jehova i lo byela Mosi, aku:
2Ruma a vanhu va ya hlola tiko ga Kanani, legi nzi nyikileko a vanana va ka Israeli. Mu ta ruma munhu munwe ka lixaka linwe ni linwani la vararu va nwina, mu ruma ntsena loyi a nga wa hombe xikari kabye.
3Mosi i lo va rumela kota kuleletela ka Jehova na va hi le xiwuleni xa Parani; vontlhe lavo vanhu va wa hi tihloko ta tinyangwa ta vanana va ka Israeli. A mavito yabye hi lawa: Deut. 1:22
4lixakeni la ka Rubeni hi Xamua, a nʼwana wa Zakura.
5Lixakeni la ka Simeoni hi Xafate, a nʼwana wa Hori.
6Lixakeni la ka Juda hi Kalebi, a nʼwana wa Jefuna.
7Lixakeni la ka Isakari hi Igali, a nʼwana wa Josefa.
8Lixakeni la ka Efraime hi Hosea, a nʼwana wa Nuni.
9Lixakeni la ka Benjamini hi Palti, a nʼwana wa Rafu.
10Lixakeni la ka Zebuloni hi Gadieli a nʼwana wa Sodi.
11Lixakeni la ka Josefa, lomu ka va ka Manase, hi Gadi a nʼwana wa Susi.
12Lixakeni la ka Dani hi Amieli, a nʼwana wa Gemali.
13Lixakeni la ka Axeri hi Setura, a nʼwana wa Mikaeli.
14Lixakeni la ka Naftali hi Nabi, a nʼwana wa Vofsi.
15Lixakeni la ka Gadi hi Geueli, a nʼwana wa Maki.
16Lawa hi mavito ya vanhu lava Mosi a nga va ruma kuya hlola a tiko; zonake Mosi i lo chula Hosea a nʼwana wa Nuni a vito gaku: hi Joxua.
17Mosi i lo va rumela a ku ya hlola a tiko ga Kanani; aku kabye: Kanzihani hi tlhelo ga le Dzongeni, mu kanziha zitsunga,
18mu ta hlola a tshamela ga tiko; mu wona ni vanhu lavo va akileko lomo, lezaku va na ni ntamu kutani a va na ntamu, mu wona ni lezaku va tele kutani a va talangi.
19Mu wona ni tiko legi va akileko ka gona, loku gi sasekile ni loku gi bihile, ni miti leyi va akileko ka yona, loku ma hi magovelo ni loku ma hi makhokhola.
20Mu wona ni misava loku yi nonile ni loku yi nga nonangi; mu wona ni tisinya loku ti hi kona ni loku ti hi hava. Tiyani, mu ta wuya ni mihanzu ya tiko lego. Makunu yi wa hi nguva ya mauva.
21Zinghaho va lo kanziha va ya hlola a tiko. Va lo ya sangula hi le xiwuleni xa Zini, kala va chikela le Rehobi, hi ndlela yi yako Hamate.
22Va lo kanziha hi le Dzongeni, kala va ya chikela le Hebroni, laho ku nga wa hi na Ahimani, na Xexai, na Talmai, a vazukulu va Anaki. A muti wa Hebroni wu rangile ku akiwa, hi mahlweni ka ntlhanu wa malembe ni mambiri na wu nga se ku akiwa Zoana wa Gipite.
23Va lo ya chikela nzhelelweni wa Exkole, laho va lo tsema a xitata xa mauva, va xi rwala va hi vambiri hi pingo; va lo neha ni mapomegranada ni makuwu.
24A wutshamu lego va lo gi chula ku ngalo: I Nzhelelo wa Exkole, hi kota ya xitata lexo a vanana va ka Israeli va nga xi tsema laho.
25Anzhako ka 40 wa masiku va lo wuya hi le kuhloleni ka tiko.
26Zonake va lo ya chikela ka Mosi na Aroni, ni tlhangano wontihe wa vanana va ka Israeli le xiwuleni xa Parani, kusuhani ni Kadexe. Va lo bika a mahungu ka tlhangano wontihe, va va kombisa a mihanzu ya tiko.
27Va lo hlawutela a mahungu ka Mosi, vaku: Hi yile ka tiko legi u hi rumileko ka gona; hakunene i tiko gi khulungako masi ni wulombe, a mihanzu ya kona hi yaleyi.
28Kanilezi a vanhu lava va akileko ka tiko lego, mbanhu va ntamu; a miti yabye nja hombe, yi na ni makhokhola; kambe lomo hi wonile a vazukulu va Anaki.
29A vaAmaleki va akile hi le Dzongeni; a vaHiti ni vajebusi ni vaAmori va akile zitsungeni; a vaKanani va akile kusuhani ni bimbi ni lomu mbhirini ya Jordani.
30Zonake Kalebi i lo miyeta a vanhu, hakuva va wa zangarela Mosi; yena aku ngalo: A hi fambeni hi ya teka tiko, hakuva hakunene hi ta ya va hlula.
31Kanilezi a vanhu lava a nga wa yile zinwe navo, vaku ngalo: Cima hi nga ta zi kota ku ya va hlula, hakuva va na ni ntamu ku hunza hina.
32Zonake va lo hlawutela kubiha mahlweni ka vanana va ka Israeli hi tiko lego va gi hlotileko, vaku: A tiko legi hi tsemakanyileko hi gi hlola, i tiko gi dayako vaaki va gona; vontlhe vanhu lava hi va wonileko mbo leha nguvu.
33Kambe hi wonile zihotlovila za vanana va ka Anaki, va lixaka lo zimuka; kuwoneni ka hina hi wo fanana ni timhera, ni le kuwoneni kabye hi wo khwatsi hi timhera. Gen. 6:4
Currently Selected:
Mitsengo 13: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
