Mitsengo 1
1
A ku hlaya vanhu hi tixaka.
1Jehova i lo wulawula ka Mosi na va hi le xiwuleni xa Sinai, lomu ka tenda ga mutlhangano, hi siku go ranga ga hweti ya wumbiri, ka lembe ga wumbiri ga kuhuma kabye hi le Gipite, aku:
2Hlayani vontlhe vanana va ka Israeli hi mingango yabye ni tixaka ta vararu vabye, mu hlaya a mavito ya vavanuna vontlhe hi munwe-munwe, Ekso. 30:12; Mitse. 26:2
3kusukela ka va 20 wa malembe kuya mahlweni mu hlaya vavanuna vontlhe lava va zi kotako ku hloma matlhari ka vanana va ka Israeli; wena na Aroni mu ta va hlaya hi mabutho yabye,
4ku tava kona zinwe na nwina a wanuna munwe wa lixaka ni lixaka, loyi a nga hloko ya yindlu ya vararu vakwe.
5Laya hi mavito ya vavanuna lava va ta nga mu vuna: Le lixakeni la Rubeni, Elizura nʼwana wa Xedura;
6ka Simeoni, Xelumieli a nʼwana wa Zurixadayi;
7ka Juda, Naxoni nʼwana wa Aminadaba;
8ka Isakari, Netaneli a nʼwana wa Zuare;
9ka Zebuloni, Eliba a nʼwana wa Heloni;
10ka vana va Josefa: ka Efraime, Elixama a nʼwana wa Amihudi; ka Manasa, Gamalieli a nʼwana wa Pedazura;
11ka Benjamini, Abidani a nʼwana wa Gideoni;
12ka Dani, Ahiezere a nʼwana wa Amixadayi;
13ka Axeri, Pagieli a nʼwana wa Okrani;
14ka Gadi, Eliasafa a nʼwana wa Reueli;
15ka Naftali, Ahira a nʼwana wa Enane.
16Lava hi vona va vitanilweko le tlhanganweni, na va hi vona tihosana ta tixaka ta tiyindlu ta vararu vabye; ti nga tona tihosi ta matala ya ka Israeli.
17Mosi na Aroni va lo ramba madota laya ma langilweko hi mavito.
18Zonake hi siku go sangula ga hweti ya wumbiri, va lo vitana a tlhangano wontihe, va lo tsaliwa hi tinyangwa tabye ni mingango yabye, na va hlayiwa hi vito ga munhu ni munhu kusukela ka lava va nga ni 20 wa malembe ni kuya mahlweni.
19Lezo Mosi i lo va hlaya le xiwuleni xa Sinai, khwatsi hi lezi Jehova a mu leleteleko.
20Ku lo tsaliwa a vanana va Rubeni, a matewula ya Israeli, hi zizukulwana zabye ni mingango yabye, ku hlayiwa a vito ga munwe ni munwani wa vavanuna lavo va nga hi ni 20 wa malembe ni kuya mahlweni, vontlhe lava va nga zi kota ku hloma matlhari.
21Lava va hlayilweko va lixaka la ka Rubeni, va wa hi 46,500.
22A vana va Simeoni, a zizukulwana zabye hi mingango yabye, hi tixaka tabye, lava va hlayilweko hi mavito, vavanuna vontlhe hi tihloko tabye; kusukela ka lava va nga ni 20 wa malembe, ni kuya mahlweni, vontlhe vavanuna lava va zi kotako ku hloma matlhari.
23Lava va hlayilweko va lixaka la ka Simeoni, va wa hi 59,300.
24A vana va Gadi, a zizukulwana zabye hi mingango yabye ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va 20 wa malembe, ni kuya mahlweni;
25lava va hlayilweko va lixaka la ka Gadi, va wa hi 45,650.
26A vana va Juda, a zizukulwana zabye hi mingango yabye, ni tixaka tabye lava va hlayilweko hi mavito, a vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
27lava va hlayilweko va lixaka la ka Juda, va wa hi 74,600.
28A vana va Isakari, a zizukulwana zabye hi mingango yabye, ni tixaka tabye a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
29lava va hlayilweko va lixaka la ka Isakari, va wa hi 54,400.
30A vana va Zebuloni, a zizukulwana zabye hi mingango yabye, ni tixaka tabye, a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
31lava va hlayilweko va lixaka la ka Zebuloni, va wa hi 57,400.
32A vana va Josefa: Ka nyangwa ya Efraime, a zizukulwana zabye hi mingango yabye, ni tixaka tabye, a ku hlaya mavito ya vavanuna vontlhe lava va zi kotako ku hloma matlhari; kusukela ka lava va nga ni 20 wa malembe, ni kuya mahlweni;
33lava va hlayilweko va lixaka la ka Efraime, va wa hi 40,500.
34Ka nyangwa ya ka Manase, a zizukulwana zabye hi mingango yabye, ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
35lava va hlayilweko va lixaka la ka Manase, va wa hi 32,200.
36A vana va Benjamini, a zizukulwana zabye hi mingango yabye, ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
37lava va hlayilweko va lixaka la ka Benjamini, va wa hi 35,400.
38A vana va Dani, a zizukulwana zabye hi mingango yabye ni tixaka tabye, a ku hlaya mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
39lava va hlayilweko va lixaka la ka Dani, va wa hi 62,700.
40A vana va Axeri, a zizukulwana zabye hi mingango yabye, ni tixaka tabye, a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
41lava va hlayilweko va lixaka la ka Axeri, va wa hi 41,500.
42A vana va Naftali, a zizukulwana zabye hi mingango yabye, ni tixaka tabye, a ku hlaya a mavito ya vavanuna vontlhe lava va zi kotako ku hloma matlhari, kusukela ka lava va nga ni 20 wa malembe, ni kuya mahlweni;
43lava va hlayilweko va lixaka la ka Naftali, va wa hi 53,400.
44Lava hi lava va hlayilweko hi Mosi na Aroni, zinwe ni 12 wa madota ya ka Israeli, lava va nga tihosana ta tixaka ta ka Israeli; loyi ni loyi i wa hi hosana ka ngango wa vararu vakwe.
45Zinghaho vontlhe a vanana va ka Israeli lava va hlayilweko hi mingango ya vararu vabye, kusukela ka lava va nga ni 20 wa malembe, ni kuya mahlweni, na va hi vavanuna lava va zi kotako ku hloma matlhari vontlhe;
46a tsengo wa vontlhe lava va hlayilweko va wa hi 603,550. Ekso. 12:37; Mitse. 2:32
47Kanilezi a vana va Levi, hi lixaka la raru wabye, vona a va hlayiwangi.
48Hakuva Jehova i wa layile Mosi, aku:
49A lixaka la ka Levi, u nga va hlayi xikari ka vanana va ka Israeli.
50Kanilezi u ta veka mandleni ya vanana va ka Levi a tabemakeli ga wumboni ni zontlhe zibya za gona, ni zontlhe lezi zi lumbako gona. Vona va ta rwala a tabemakeli ni nhunzu yontlhe ya gona; va tira a ntiro wa gona, ni lezaku va ta gova kusuhani ni tabemakeli va gi rinzela.
51Kasi loku a tabemakeli gi Suka, a vaLevi va ta gi tlhatlha, ni loku a tabemakeli gi yimiswa, a vaLevi va ta gi zimekela; kanilezi a wamatiko loye a tshinelako kusuhani ka gona i ta dawa.
52A vanana vanwani va ka Israeli va ta gova, loyi ni loyi ka wutshamu gakwe, kusuhani ni mujeke wabye hi mabutho yabye.
53Kanilezi a vaLevi va ta gova kusuhani ni tabemakeli ga wumboni, va gi ranzela, kasi a zanga ya mina yi nga dzuki yi vukela a tlhangano wa vanana va ka Israeli; hikwalaho a vaLevi va ta hlayisa a tabemakeli ga wumboni.
54Zinghaho a vanana va ka Israeli va lo maha zontlhe kota lezi Jehova a leleteleko ka Mosi; va lo maha zalezo.
Currently Selected:
Mitsengo 1: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
