Marku 7
7
A zilo lezi zi nyenyezisako.
1Zonake a vaFarisi ni vokari va vatsali, lava va nga tile hi le Jerusalema, va lo tsombana ka Jesu, Mat. 15:1
2hilezi va wa wonile vanwani va vapizani vakwe na va kari vaga hi mandla ya chaka, hi lezaku lawa ma nga hlaziwangiko.
3Hakuva a vaFarisi ni vaJuda vontlhe, a vagi na va nga se ku hlamba mandla; va gonga mahanyela ya vakale.
4Loku vata hi le hubyeni, a vagi na va nga se ku hlamba; yi kona ni yinweni mikhuwo leyi va yi amukeleko ku yi gonga: hi ku hlaza magombe, ni timbita, ni zibya za suku,
5A vaFarisi ni vatsali va lo mu wutisa, vaku: Hi yini a vapizani va wena va nga fambiko hi mahanyela ya vakale, kanilezi vaga hi mandla ya chaka ke? Mat. 15:2
6Aku kabye: I profetile khwatsi Isaya ha nwina, vaxengeteli, kota lezi ku tsalilweko:
Lava vanhu va nzi dumisa hi milomu yabye,
Kanilezi a timbilu tabye ti le kule na mina. Isa. 29:13; Mat. 15:8
7Kanilezi a ku nzi khozela kabye mahala,
Hakuva a tigonzo leti va ti gonzisako zileletelo za vanhu.
8Nwina mu tsika a nayo wa Nungungulu, mu khomisisa a mahanyela ya vanhu.
9A engeta aku: Mu ala a kulaya ka Nungungulu, kasi ma fela ku gonga mahanyela ya nwina.
10Mosi i te ngalo: Chava raru wa wena ni nyine wa wena; niku: Loyi a rukatelako raru Wakwe kutani nyine wakwe, ngha afa hi kufa; Ekso. 20:12; Levi 20:9; Deut. 5:16
11kanilezi nwina muku: Loku munhu a wula ka raru wakwe kutani ka nyine wakwe aku: A za mina lezi u nga ta ngha u vunetelwa ha zona zi hi Korbani, lezo hiku ngalo, Zi basiselwe Nungungulu. Mat. 15:5
12Zonake a ma ha mu vumeli ku mahela nchumu a raru wakwe ni nyine wakwe;
13mu maha a mhaka ya Nungungulu yi nga hi na ntamu hi kota ya mahanyela ya nwina lawa mu ma gonzisako; ni zinwani za kutala zo kota wona ma zi maha.
14I lo engeta a vitana xidlemo, aku ngalo: Nzi zweni nwina nwentlhe, mu pima. Mat. 15:10
15A ku na nchumu xi tako hi lahandle ka munhu, xi enghenako nzeni kakwe, xi zi kotako ku mu bihisa; kanilezi lezi zi humako ka munhu, hi zona zi mu bihisako.
16Loyi a nga ni tindleve ta kuzwa, ngha a ingisa.
17Laha na siyile xidlemo a enghena ndlwini, a vapizani vakwe va lo mu wutisa hi mufananiso lowo. Mat. 15:15
18I te ngalo kabye: Na nwinawu a mu na kupima ke? A mu zi tivi lezaku kani hi xihi xi tako hi lahandle xi enghena ka munhu, a xi na ku mu bihisa ke?
19Hakuva a xiyi mbilwini: yakwe, kanilezi xiya rumbyini gakwe, xi humeswa lahandle. Lezo i lo tlhamusela lezaku a kuga kontlhe ku hlazekile.
20A engeta aku: Lexi xi humako munhwini hi xona xi mu bihisako;
21hakuva hi lomo nzeni, hi le timbilwini ta Vanhu, ku huma maalakanyo yo biha, a wubhayi, a kuyiva, ni kudaya; ni wurembi, Gen. 6:5; 8:21; Mat. 15:19
22a kunavela, ni kubiha, ni kukhohlisa, ni wutsele, ni tihlo go biha, ni kurukatela, ni kutikukumukisa, ni wupumbu;
23zontlhe lezi za kubiha zi huma hi lomo nzeni, za bihisa munhu.
24I lo Suka hi laho, a famba matlhelweni ya Tire ni Sidoni, a enghena ndlwini yo kari, hakuva i wa nga ranzi ku tibyiwa hi munhu; kanilezi i wa nga hi na ku fihlala. Mat. 15:21
A wasati wa muSirofenike.
25Zalezo a wasati, loyi a nhanyana wakwe wa tsongwani a nga hi ni moya wa kubiha, na a zwile ha Jesu, i lota a tawa lahasi mikonzweni yakwe.
26A wasati loye i wa hi muGreki, a muSirofenike hi kupswalwa. I lo mu khongotela a kuva a hlongola a dimoni ka nhanyana wakwe.
27Jesu i te ngalo kakwe: Ngha va ranga vanana va xura; hakuva a zi faneli ku teka zibaba za vanana zi hoxiwa ka timbyana.
28Kanilezi i lo hlamula aku kakwe: Ina, Hosi, kanilezi na tona timbyana ti nga lahasi ka meza taga a matlhatlha ya vanana.
29Jesu aku ngalo kakwe: Hi kota ya gezu legi nziku ka wena, ti fambele; a dimoni gi humele ka nʼwana wa wena.
30Yena i lo famba ndlwini yakwe, a ya kuma a nwanana na a etlele sangweni, a dimoni na gi humile.
Kuhanyiswa ka xiwiri xi nga hi ni xirimiti.
31Zonake i lo suka matlhelweni ya Tire, a tsemakanya Sidoni a kala a chikela bimbini ga Galilea, na hunzile hi le matlhelweni ya Dekapoli. Mat. 15:29
32Va lo neha ka yena a munhu a nga hi xiwiri, na hi ni xirimiti, va mu khongotela a kuva a tlhateka canja gakwe hehla kakwe. Mat. 9:32; Lu. 11:14
33Jesu i lo mu humesa xidlenwini, aya naye xihundleni, aya enghenisa titiho takwe tindleveni ta xiwiri; i lo pela mari, a khumba lirimi la xona, Xip. 8:23; Joh. 9:6
34na cuwuka le tilweni i lo hefemuteka, aku ka xona: Efata, lezo hi ku ngalo: Vululeka!
35A tindleve takwe ti lo vululeka, ni misiha ya lirimi lakwe yi tlhatlheka, a su wulawula zi su dlunya. Isa. 35:5, 6; Mat. 11:5
36Jesu i lo va laya lezaku va nga byeli munhu; kanilezi kota lezi a nga va layisisa nguvu, hi laho va nga zi tlhatlhambutela nguvu.
37Va lo hlamaliswa nguvu, vaku: Yena i mahile zilo zontlhe khwatsi: i maha ni ziwiri a kuzwa ni timbeveve ti wulawula.
Currently Selected:
Marku 7: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
