Marku 3
3
Jesu a hanyisa loyi a lameleko canja.
1Jesu i lo enghena kambe sinagogeni; ku wa hi kona munhu laho loyi a nga hi ni canja gi lameleko. Mat. 12:9; Lu. 6:6
2Va lo mu cuwukela, ku kutani i ta mu hanyisa hi siku ga sabado, kasi va fela ku mu kumisa nanzu.
3Jesu i te ngalo ka munhu loyi a lameleko canja: Suka, u ta yima laha.
4Aku kabye: Zi fanele ku maha kusaseka hi siku ga sabado, kutani ku maha kubiha ke? A ku hanyisa munhu, kutani ku daya ke? Kanilezi va lo miyela.
5Laha na a langutile ka vona hi kuzangara, na karateka hi kota ya kunonoha ka timbilu tabye, aku ngalo ka munhu loye: Nawuluta canja ga wena. I lo gi nawuluta, gi tlhela gi hanya.
6A vaFarisi va lo huma, va ya tlhangana ni va ka Herodi, va xuxa khungo ha yena, lezaku va ta mu dayisa kuyini. Mat. 12:14; 22:16
7Jesu ni vapizani vakwe va lo suka laho vaya bimbini, a xidlemo xa hombe xa le Galilea xi lo mu lanzela, ni xa le Judia, Lu. 6:17
8ni xa le Jerusalema, ni xa le Idumea, ni le tlhatuko wa Jordani, ni le matlhelweni ya Tire ni Sidoni; na vazwa hi zilo za hombe lezi a zi mahako va lota kakwe na va hi xidlemo xa hombe nguvu.
9I lo byela vapizani vakwe, lezaku a ngalava a yi mu lavelele hi kota ya xidlemo, kutani a nga dzuka a manyiwa hi xona.
10Hakuva i wa hanyisile vanyingi, ni vontlhe va nga hi ni tinghumbe va wo tsimbeketana kakwe, kasi va fela ku mu khumba.
11A mimoya ya kubiha, loku yi mu wona yi lowa lahasi mahlweni ka yena, yiba huwa, yiku: Wena u Nʼwana wa Nungungulu. Xip. 1:23, 24; Mat. 14:33
12I lo yi laya nguvu lezaku yi nga mu zwati. Mat. 12:16; Xip. 1:25, 34
Jesu a hlawula lava va khume ni vambiri.
13I lo kanziha xitsungeni, a vitana kakwe lava a nga va hlawula, vata kakwe. Mat. 10:1; Lu. 6:12; 9:1
14I lo yimisa khume ni vambiri lezaku va fela ku tshama naye, niku kasi a fela ku va ruma va ya kanela,
15ni kuva ni ntamu wa ku hlongola madimoni.
16A yimisa Simoni, loyi a nga mu chula vito gakwe ku hi Pedro,
17na Jakobe nʼwana Zabedi, ni nakulobye Johani; lava a nga va chula vito gaku Boanerges, hi lezaku vana va kudzinza;
18na Andreu, na Filipu, na Bartolomeu, na Mateu, na Tomasi, na Jakobe nʼwana Alfeusi, na Tadeu, na Simoni muKanani,
19na Judasi Iskarioti, loyi a nga mu tokometa.
20Zonake i lo tlhelela kaya, ni xidlemo xi lo tlhela xi tsombana, laha ka kuva va nga zi koti ni kuga. Xip. 6:31
21Laha maxaka yakwe na ma zi zwile, va lo famba a ku ya mu khoma, hakuva va waku: Wa pepuka.
Ku rukatela Moya wa ku Basa.
22A vatsali lava va nga relele hi le Jerusalema, vaku ngalo: I na na Belzebuba, niku, I hlongola madimoni hi hosana ya madimoni. Mat. 9:34; Lu. 11:15; Joh. 7:20
23Yena i lo va vitana kakwe, a ku ngalo kabye hi mifananiso: Satani a nga zi kotisa kuyini ku hlongola Satani ke? Mat. 12:25
24A mufumo loku wu hambene ha woce, lowo mufumo a wu na ku tsonzoma.
25Ni loku a yindlu yi hambene ha yoce, leyo yindlu a yi zi koti ku yima.
26Loku Satani a ti vukele ha yece, a hambana ni wutsumbu gakwe, a nga zi koti ku yima, zonake i ta gumelwa.
27A nga kona a zi kotako ku enghena ndlwini ya nhenha a wutla xuma xa yona, loku a nga rangangi hi ku yi boha, zonake a phanga yindlu ya yona. Isa. 49:24; Mat. 12:29
28Hizinene nziku ka nwina: A vana va vanhu va ta tsetselelwa a zionho zabye zontlhe, ni tihlamba tontlhe leti va rukatelako ha tona; Mat. 12:31; Lu. 12:10; 1 Joh. 5:16
29Kanilezi loyi a rukatelako a Moya wa ku Basa, cima a nga ta tsetselelwa, i na ni xionho xa pinzukelwa.
30A wula lezo hakuva va wa te ngalo: I na ni moya wa kubiha.
A nyine wa Jesu ni vanakulobye.
31Zonake ku lota a nyine wakwe ni vanakulobye, va ta yima laha handle; va lo mu vitanisa. Mat. 12:46; Lu. 8:19
32Ni xidlemo xi wa mbambamele xi mu ranzela; vona vaku ka yena: Languta, wa labyiwa lahandle hi nyine wa wena ni vanakuloni.
33I lo va hlamula, aku: Himani a mamani ni vanakulori ke?
341 lo cuwuka ka lava va nga mbambamele va mu ranzela, aku: Langutani, mamani wa mina ni vanakulori hi valava!
35Hakuva loyi a mahako a kuranza ka Nungungulu, yaloye i nakulori, ni makweru, ni mamani wa mina.
Currently Selected:
Marku 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
