Mateu 8
8
Jesu a hanyisa a wa hlokonho.
1Laha na a relele hi le xitsungeni a zidlemo za hombe zi lo mu lanzela.
2Zonake ku lota kakwe a wa hlokonho a ta mu khizamela, aku: Hosi, loku u zi ranza, wa zi kota ku nzi basisa.
3Jesu i lo nawuluta a canja gakwe, a mu khumba, aku: Nza zi ranza, basiswa wena! Zalezo a hlokonho yakwe yi lo basiswa.
4Jesu aku ngalo kakwe: U nga byeli munhu; kanilezi famba u ya ti kombisa ka mupristi, u nyikela a munyikelo lowu Mosi a nga wu yimisa, wuva wukustumunyu ka vona. Levi 14:3; Mar. 5:43; Lu. 5:14
Ku hanyiswa a nanza ga nduna ya zana.
5Laha na enghenile le Kapernaume, ku lota kakwe a nduna ya zana, yi ta mu khongotela, Lu. 7:1
6yiku: Hosi, a nanza ga mina gi etlele lomu ndlwini ya mina, gi file reve ga tlhelo, ga xaniseka nguvu.
7Jesu aku kakwe: Nzi tata nzi ta mu hanyisa.
8A nduna ya zana yi lo hlamula, yiku: Hosi, a nzi fanelwi lezaku u enghena lomu ndlwini ya mina; kanilezi wula a gezu ginwe ntsena, a nanza ga mina gi ta hanya. Tis. 107:20; Lu. 15:19, 21
9Hakuva na mina nzi munhu a fumi wako; na nzi hi ni masochwa ma nga lahasi ka mina. Loku nziku ka loyi: Famba, wa famba; ni ka munwani: Ngone, ata; ni ka xitiri xa mina: Maha lexi, xi xi maha.
10Laha Jesu na a zi zwile, i lo hlamala, aku ka lava va mu lanzelako: Hizinene nziku ka nwina, a nzi se ku kuma a kukholwa ka hombe ko kota loku, hambu ni ka Israeli.
11Nziku ka nwina: A vanyingi va tata hi Mutsuwuka-gambo ni Muhlwa-gambo, va ta tshama na Abrahama, na Isaka, na Jakobe, mufunweni wa tilo; Gen. 12:3; Isa. 2:2, 3; Efe. 3:6
12kanilezi a vanana va mufumo va ta hlongolwa lahandle le munyameni; laha mikosi yi ta ngava kona ni kugetsela ka meno. Xip. 21:43; 13:42, 50; Lu. 13:28
13Jesu aku ka nduna ya zana: Famba, a zi maheke ka wena khwatsi hilezi u kholilweko. Ni nanza gi lo hanyiswa hi xikhati xwalexo.
Kuhanyiswa ka mukokati wa Pedro.
14Laha Jesu na a tile ndlwini ya Pedro, i lo kuma mukokati wakwe na etlele na a babya hi feveri. Mar. 1:29; Lu. 4:38; 1 Kor. 9:5
15I lo khumba canja gakwe, ni feveri yi lo mu tsika; i lo suka, a va tirela.
16Laha na gi hlwile, va lo neha ka Jesu vanyingi lava va nga hi ni madimoni; i lo hlongola mimoya hi gezu gakwe ntsena, a hanyisa vontlhe lava va nga kari va babya;
17kasi ku fela ku tatiseka lezi zi nga wuliwa hi muprofeti Isaya, a ku ngalo: I lo ti rwexa a gome ga hina, a rwala a tinghumbe ta hina. Isa. 53:4; 1 Ped. 2:24
Lava va ranzako ku lanzela Jesu.
18Makunu laha Jesu na a wona zidlemo zi mu ranzeleko, i lo byela vapizani a kuva va suka vaya tlhatuko.
19Ku lota mutsali, aku ngalo kakwe: Hosi, nzi ta ku lanzela ni kwihi laha u yako kona. Lu. 9:57, 58
20Jesu aku ngalo kakwe: A vahlati va na ni timhako, ni tinyanyani ta tilo ti na ni zisaka; kanilezi a Nʼwana wa munhu a nga nako laha a nga vekako kona hloko yakwe.
21Munwani wa vapizani vakwe aku ka yena: Hosi, nzi vumele nzi ranga hi ku ya lahla dadani. Lu. 9:59, 60
22Kanilezi Jesu aku kakwe: Nzi lanzele, u tsika a vafileko va lahla vafileko vabye.
Jesu a miyeta bhubhutsa.
23Laha na khilele ngalaveni, a vapizani vakwe va lo enghena zinwe naye.
24Languta, ku lo vuka a bhubhutsa ga hombe le bimbini, lezaku kasi a mabyandlati ma phandlukela ngalaveni; kanilezi Jesu i wa etlele. Mar. 4:37; Lu. 8:23
25Va lo tshinela kakwe; va mu vuka, vaku: Hosi, hi hanyise, ha lova.
26Yena aku kabye: Nwina va kukholwa ku tsongwani, hi yini mu chavako? Zonake i lo vuka, a kawuka mheho ni bimbi, ku lova ni malenga ya hombe. Tis. 65:7
27Ni vavanuna va lo hlamala, vaku: Munhu wa ku yini loyi, waku hambu mheho ni bimbi zi mu ingisa ke?
Kuhumestea ka madimoni le Gadara.
28Laha na a chikele tlhatuko le tikweni ga vaGadara, i lo tlhangavetwa hi vanhu vambiri va nga hi ni madimoni, na va huma zilahleni; va wa leva nguvu, laha kakuva ku nga hi na munhu a nga tiya ku hunza hi ndlela leyo. Mar. 5:1; Lu. 8:26
29Va lo kanyuluka, vaku: I mhaka muni hi nga nayo na wena, Nʼwana wa Nungungulu? U tile laha ku ta hi xanisa na xi nga se ku chikela xikhati ke?
30Makunu ku wa hi kona a ntlhambi wa hombe wa makhumba ma nga kari maga kule navo.
31A madimoni ma lo mu khongotela, maku: Loku u hi hlongola, hi rumele ntlhambini wa makhumba.
32Zonake aku ka wona: Yanani! Ma lo huma, ma ya enghena makhumbeni. Languta, a ntlhambi wontihe wu lo tsutsumela nzhelelweni wa bimbi, wu su yo ncu lomo matini.
33A varisi va makhumba va lo tsutsuma vaya mutini, va ya hlawutela zontlhe, nguvunguvu lezi zi mahekileko ka lava va nga hi ni madimoni.
34Zonake vontlhe va muti va lo huma a ku ta khinga Jesu; laha na va mu wonile, va lo mu khongotela a ku suka tikweni gabye.
Currently Selected:
Mateu 8: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
