Mateu 6

Wuhana.

1Ti woneleni lezaku mu nga mahi a kululama ka nwina mahlweni ka vanhu, kasi ma wonwa hi vona; loku zi nge nghaho a mu na nchachazelo ka Raru wa nwina wa le tilweni.

2Hikwalaho loku u nyika loyi a vumalako, u ngabi mpunzu mahlweni ka wena, khwatsi hi lezi va mahako a vaxengeteli masinagogeni ni lomo maphangweni, kasi va fela ku dumiswa hi vanhu. Hizinene nziku ka nwina; Va sina va amukele a nchachazelo wabye. Rom. 12:8

3Kanilezi loku u nyika lava va vumalako, ngha na canja ga wena ga xibhabha gi nga zi tivi lezi zi mahiwako hi ga xinene,

4lezaku a zinyikiwo za wena zi nyikiwa kufihlaleni; zonake a Raru wa wena loyi a wonako kufihlaleni i ta ku tlhelisela. Lu. 14:14

Ku khongela.

5Laha mu khongelako, mu nge khwatsi hi vaxengeteli, lava va ranzako a ku khongela na va yimile masinagogeni ni lomu mahanzakanyeni ya maphango, kasi va fela ku woniwa hi vanhu. Hizinene nziku ka nwina, va sina va amukele a nchachazelo wabye.

6Kanilezi wena; loku u khongela, enghena ndlwini ya wena, zonake loku u valile livati, khongela ka Raru wa wena loyi a nga xihundleni, ni Raru wa wena loyi a wonako xihundleni i taku tlhelisela. 2 Tih. 4:33

7Mu nga byabyatsi hava kukhongeleni ka nwina, khwatsi hi vamatiko; hakuva vona ve ngalo va ta zwiwa hi kota ya kuwulawula nguvu kabye. Mutsa. 5:2

8Hikwalaho ngha na mu nga fanani na vona; hakuva a Raru wa nwina wa zi tiva lezi mu zi vumalako, na mu nga se ku mu kombela.

9Hikwalaho khongelani kota lezi: Dadani wa hina wa le tilweni, a vito ga wena a gi hlawuliwe. Lu. 11:2

10A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.

11Hi nyike nyamutlha a kuga ka hina ka siku ginwani ni ginwani.

12Hi tsetselele milanzu ya hina, khwatsi hilezi hi va tsetselelako lava va nga ni milanzu ka hina. Xip. 18:21

13U nga hi yisi minzhingweni, kanilezi hi tlhatlhise ka loyi wa kubiha. Lu. 22:40, 48; Joh. 17:15; Kuv. 3:10

14Hakuva loku mu tsetselela vanhu a zigoho zabye, a Raru wa nwina wa le tilweni i ta mu tsetselelawu. Mar. 11:25, 26; Efe. 4:32; Kol. 3:13

15Kanilezi loku mu nga va tsetseleli a zigoho zabye, na yenawu a Raru wa nwina a nga ta mu tsetselela a zigoho za nwina. Xip. 18:35; Jak. 2:13

A kuyila.

16Loku mu yila, mu nga tsuvi khwatsi hi vaxengeteli, hakuva va tshuvika tinghohe tabye, kasi va fela ku wonwa hi vanhu vaku va yila. Hizinene nziku ka nwina, va sina va wu amukele a nchachazelo wabye. Isa. 58:5

17Kanilezi wena laha u yilako, tota a hloko ya wena, ni ku hlamba a nghohe ya wena,

18kasi u fela ku kala u nga wonwi hi vanhu lezaku wa yila, u woniwa ntsena hi Raru wa wena loyi a nga xihundleni; zonake a Raru wa wena loyi a wonako xihundleni, i ta ku tlhelisela.

A titshomba.

19Mu nga ti vekeli titshomba misaveni, laha tisumba ni kutshutshumbala zi gako ni laha makhamba ma bhoxako ma yiva; Mav. 23:4; 1 Tim. 6:17; Jak. 5:1

20kanilezi ti vekeleni a titshomba le tilweni, laha tisumba ni kutshutshumbala zi nga giko, ni laha makhamba ma nga bhoxiko ma yiva; Xip. 19:21; 1 Tim. 8:19; 1 Ped. 1:4

21hakuva laha yi nga kona tshomba ya wena, kwalaho yi tava kona ni mbilu ya wena.

22A kandiya ya miri hi tihlo; hikwalaho loku a tihlo ga wena gi hanya, a miri wa wena wontihe wu ta tala hi kuwonekela. Lu. 11:34, 36

23Kanilezi loku tihlo ga wena gi babya, a miri wa wena wontihe wu ta tala hi munyama. Hikwalaho loku a kuwonekela loku ku nga nzeni ka wena ku hi munyama, a munyama lowu wu ta maha wa hombe wa ku yiniyini ke!

24A ku na munhu a zi kotako ku tirela tihosi timbiri; hilezi i ta venga yinwe, a ranza yinwani, kutani i ta namarela ka yinwe, a kanyisa yinwani. A mu zi koti ku tirela Nungungulu ni Mamona. Lu. 16:13; Gal. 1:10; 1 Tim. 6:17

Ku karatekela a za kuhanya.

25Hikwalaho nziku ka nwina: Mu nga karatekeli a kuhanya ka nwina, lezaku mu taga yini, kutani mu tanwa yini; hambu ni miri wa nwina, lezaku mu ta ambala yini. A kuhanya a ku hunzi kuga ke, ni miri a wu hunzi a tinguwo ke? Tis. 55:22; Fil. 4:6; 1 Ped. 5:7

26Langutani a tinyanyani ta tilo: a ti byali, a ti tshoveli, a ti hlengeleteli nchumu magombeni; kanilezi a Raru wa nwina wa le tilweni wa ti phamela. A mu ti hunzi nguvu ke? Joba 38:41; Tis. 147:9; Lu. 12:24

27Himani xikari ka nwina a zi kotako ku engetela xiyimo xakwe hi nkono munwe hi kukarateka ka mbilu yakwe ke?

28Hikuyini mu karatekako hi kota ya tinguwo ke? Langutani a makhonʼwa ya lomu khwatini, lezaku ma kulisa kuyini; a ma tiri, hambu ni ku luka;

29kanilezi nziku ka nwina, hambu Solomoni hi wukosi gakwe gontlhe a nga ambalangi kota ginwe ga wona.

30Loku Nungungulu a ambexisa lezo a byanyi ga lomu khwatini, legi gi nga kona nyamutlha, kasi hi manziko wa kona gi ta hoxwa khombarini, xana a nga ta mu ambexa nguvu, nwina lava va kukholwa ku tsongwanyani ke?

31Hikwalaho mu nga karateki, muku; Hi taga yini? kutani, Hi tanwa yini? kutani, Xana hi ta zi kuma kwihi a za kuambala?

32Hakuva a vamatiko va zi lava zontlhe lezi zile; ni Raru wa nwina wa le tilweni wa zi tiva lezaku zontlhe lezi za laveka ka nwina.

33Kanilezi a kuranga lavani mufumo wakwe, ni kululama kakwe, zonake ku ta engetelwa ka nwina zontlhe lezi zilo. Tis. 37:25; Mar. 10:30; Lu. 12:31

34Hikwalaho mu nga karatekeli za manziko; hakuva manziko i ta karatekela a wutsumbu ga yena. A siku ginwe ni ginwani gi na ni khombo gi ringanako gona.

Currently Selected:

Mateu 6: TSC72

Highlight

Copy