Luka 1

1Kota lezi a vanyingi va ringileko a ku hlawutela hi ku longoloxa a mahungu laya ma humeleleko xikari ka hina,

2khwatsi hilezi ma nyikilweko ka hina hi lava va nga zi wona hi mahlo, na va hi malanza ya mhaka hi kusanguleni, Mar. 1:1; Joh. 15:27; Maheb. 2:3

3na minawu na nzi hlolisisile a timhaka tontlhe hi le kusanguleni ka tona, nzi xuvile a ku ku tsalela tona hi ku longoloxa, wena Teofilu a dumileko nguvu; Miti. 1:1; 11:4

4kasi wa fela ku tiva a kutiya ka timhaka leti u gonzisilweko tona.

A xitsumbiso xa kupswalwa ka Johani.

5A masikwini ya Herodi, a hosi ya le Judia, ku wa hi kona a mupristi wo kari, a vitwako Zakaria, wa ntlawa wa Abija; a sati wakwe i wa hi wa vana va ka Aroni, a vito gakwe i wa hi Elizabeti. Mat. 2:1; Neh. 12:4

6Hi wumbiri gabye va wa lulamile mahlweni ka Nungungulu, va gonga yontlhe milayo ni zileletelo za Hosi, va nga hi na nanzu. Gen. 11:1

7Va wa nga hi na nʼwana, hakuva Elizabeti i wa hi ngonwa, hi wumbiri gabye va wa khosahele.

8Ku te laha Zakaria na tira a ntiro wa wupristi mahlweni ka Nungungulu hi xikhati xa ntlawa wakwe, 2 Kro. 8:14

9kota a mukhuwo wa wupristi, i lo khonʼwa hi hlolo ku enghena tempeleni ya Hosi a hisa libani. Ekso. 30:7, 8; 1 Sam. 2:28

10A xidlemo xontlhe xa vanhu xi wa yimile lahandle xi khongela hi xikhati xa ku hiswa libani. Levi 16:17; Kuv. 8:3, 4

11Zonake a ngelosi ya Hosi yi lo woneka ka Zakaria, na yi yimile hi tlhelo ga xinene ga alati ga ku hisela a libani; Ekso. 30:1

12laha a nga yi wona i lo dzuka a chava.

13Kanilezi a ngelosi yi te ngalo kakwe: U nga chavi, Zakaria; hakuva a xikombelo xa wena xi zwilwe; a sati wa wena Elizabeti i ta ku pswalela a nisanyana, u ta mu chula vito gakwe ku hi Johani.

14U tava ni kutsaka ni kunengela ha yena, ni vanyingi va ta tsakela a kubelekwa kakwe; vesi 58

15hakuva i tava wa hombe mahlweni ka Hosi. A nga tanwa a vinya ni byala, kanilezi i ta tala hi Moya wa ku Basa kusukela na hi lomo rumbyini ga nyine wakwe. Mitse. 6:3; Jer. 1:5; Gal. 1:15

16I ta wuyiseta a vana vanyingi va ka Israeli ka Hosi Nungungulu wabye. Mal. 4:5, 6

17Yena i ta ranga mahlweni kakwe hi moya ni ntamu wa Elija, a kuva a hunzulusa a timbilu ta vararu ka vana vabye, lava va hluwukileko a va tlhelisa wutlharini ga valulamileko; ni ku yi longisela Hosi a vanhu va longiselweko yona. Mal. 4:5; Mat. 11:14

18Zakaria aku ngalo ka ngelosi: Nzi ta zi tiva hi yini ke? Hakuva nzi munhu wa kale ni sati wa mina i khosahele. Gen. 17:17

19A ngelosi yi mu hlamula, yiku kakwe: Nzi mina Gabrieli, loyi a yimako mahlweni ka Nungungulu; nzi lo runwa a ku ta wulawula na wena, ni ku ku byela a mahungu laya yo saseka. Dan. 8:16; Maheb. 1:14

20Languta, u tava mbeveve u nga zi koti ku wulawula, ku kala ku chikela a siku lego lezi zi ta nga maheka ha gona, hakuva a ku kholwangi hi timhaka ta mina, leti ti ta nga tatiseka xikhatini xa tona.

21Ni vanhu va lo lavelela Zakaria, va hlamala hilezi a nga hlwela lomo tempeleni;

22laha a nga huma i wa nga zi koti ku wulawula na vona; zonake va wa zi tiva lezaku i wonile xiwoniso lomo tempeleni; yena i lo fananisela ka vona, a tshama na hi mbeveve.

23Laha a masiku ya kutira kakwe na ma mbhelile, i loya kaya kakwe.

24Anzhako ka masiku laya, a sati wakwe Elizabeti i lo xura nyimba, a ti fihla ntlhanu wa tihweti, aku:

25Hi lezi Hosi yi nga nzi mahela zona a masikwini laya yi nzi cuwukileko, kasi ku susa a tingana ta mina xikari ka vanhu. Gen. 30:23; Isa. 54:1, 4

Maria a byeliwa hi kubelekiwa ka Jesu.

26Hi hweti ya wuntlhanu ni yinwe a ngelosi Gabrieli yi lo runwa hi Nungungulu a kuya mutini wa le Galilea, wu vitwako Nazareta,

27ka nhwana a wutilweko hi wanuna loyi a vito gakwe a nga Josefa, wa yindlu ya Davida; a vito ga nhwana i wahi Maria. Mat. 1:18; Xip. 2:4, 5

28A ngelosi yi lo ta enghena, yiku kakwe; Xewe, wena loyi u kumileko thomo, a Hosi yi na wena. Dan. 9:23; 10:19; Vala. 6:12

29Kanilezi i lo dzukiswa nguvu hi kuwula ka yona, na a alakanyela lezaku kuloswa loku ku wula yini.

30A ngelosi yiku ngalo kakwe: U nga chavi. Maria; hakuva u kumile thomo ka Nungungulu.

31U ta xura nyimba, u beleka a nisanyana, u mu chula vito gakwe aku hi Jesu. Isa. 7:14; Mat. 1:21; Xip. 2:21

32I tava wa hombe, i ta vitanwa aku Nʼwana wa loyi a nga Hehla-Hehla; Hosi Nungungulu i ta mu nyika a xitshamu xa wuhosi xa Davida raru wakwe. 2 Sam. 7:11; Tis. 132:11; Isa. 9:6, 7; Jer. 23:5

33I ta fumela yindlu ya Jakobe kala kupinzuka; a mufumo wakwe cima wu nga ta gumelwa. Dan. 2:44; Obad. 21; Mika 4:7

34Maria aku ngalo ka ngelosi: Zi ta mahisa kuyini lezo, lezi nzi nga tiviko wanuna?

35A ngelosi yi lo hlamula yiku ka yena: A Moya wa ku Basa wu tata hehla ka wena, ni ntamu wa loyi a nga Hehla-Hehla wu ta ku fenengeta; hikwalaho a nʼwana wo basa loyi a ta nga belekiwa i ta vitanwa a Nʼwana wa Nungungulu. Mat. 1:20; Joh. 1:34; Rom. 1:4

36Languta, a xaka ga wena Elizabeti, yenawu i xure nyimba ya nisanyana wukhosaneni gakwe; leyi hi hweti ya wuntlhanu ni yinwe ka yena loyi va ngaku i ngonwa.

37Hakuva a ku na xilo xi nga mu tsanzako Nungungulu. Gen. 18:14; Jer. 32:17; Rom. 4:21

38Maria aku ngalo: Hizona, nzi nanza ga Hosi; a zi maheke ka mina kota lezi u wulileko. Ni ngelosi yi lo suka ka yena,

Maria a enzela Elizabeti.

39Hi walawo masiku Maria i lo suka a famba hi kuhatlisa mutini wa ka Juda, lomu tikweni ga zitsunga;

40a ya enghena ndlwini ya Zakaria, a losa Elizabeti.

41Laha Elizabeti a ngazwa kulosa ka Maria, a xinwanana xi lo tshukuma rumbyini gakwe; zonake Elizabeti i lo tala hi Moya wa ku Basa,

42a tlakusa gezu, aku: U katekile wena xikari ka vavasati, yi katekile ni mbeleko ya nyimba ya wena. Vala. 5:24

43Zi maheka hikuyini lezi ka mina, lezaku a nyine wa Hosi ya mina ata ka mina ke?

44Hakuva laha a gezu ga kulosa ka wena na gi zwele tindleveni ta mina, a xinwanana xi lo tshukuma hi kutsaka rumbyini ga mina.

45U katekile wena loyi u nga kholwa, lezaku zi ta tatiseka lezi zi wulawulileko ka wena hi Hosi.

46Zonake Maria i te ngalo:

A muhefemulo wa mina wa dumisa Hosi,

47Ni moya wa mina wa tsaka ha Nungungulu a Muhanyisi wa mina;

48Hakuva i cuwukile a wulahasi ga nanza gakwe.

Kusukela lezi a zizukulwana zontlhe zi taku ngalo nzi katekile. 1 Sam. 1:11; Mal. 3:12

49Hakuva Loyi a nga ni ntamu i nzi mahele zilo za hombe;

Gi basile a vito gakwe. Tis. 71:19; 111:9

50A zizukulwaneni zontlhe a wuxinji gakwe gi ka lava va mu chavako.

51I tirile hi ntamu hi woko gakwe;

I hangalasile lava va ti kukumukisako kualakanyeni ka timbilu tabye. Tis. 98:1; 33:10; 1 Ped. 5:5

52I wisile tihosi zitshanwini za tona za wuhosi,

A tlakusa lava va tsongwani.

53Lava va nga ni ndlala i va xurisile hi lezi zo nanziha;

A tlhelisa lava va fumileko na

Va nga hi na nchumu.

54I vunile Israeli a nanza gakwe,

Na a alakanya a wuxinji gakwe

55Ka Abrahama ni pswalo wakwe kala kupinzuka,

Kota lezi a nga tsumbisa a vararu yahina. Gen. 17:19; Tis. 132:11; Gal. 3:16

56Maria i lo tshama na Elizabeti a tihweti tinharu, zonake i lo tlhelela kaya.

A kubelekiwa ka Johani Mubapatizi.

57A xikhati xa Elizabeti xi wa chikele xa kuva a hefemula; i lo beleka a nisanyana.

58Laha a vaakelane vakwe ni maxaka yakwe va ngazwa lezaku a Hosi yi mu mahele a wuxinji ga hombe, va lo tsaka zinwe naye.

59Hi siku ga wuntlhanu ni manharu, laha va ngata ku mu maha a nkwera a nwanana, a va lava ku mu chula a vito ga Zakaria, a raru wakwe. Gen. 17:12; Levi 12:3

60Kanilezi a nyine wakwe i lo hlamula, aku: Kokwihi; i ta vitanwa aku hi Johani. vesi 13

61Vaku kakwe: A nga kona wa xaka ga nwina a vitanwako hi vito legi.

62Va lo wutisa raru wakwe hi ku fananisela, lezaku i ranza a ku ngha a vitanwa aku hi yena mani.

63Yena i lo kombela a pedra go tsalela kona, a tsala, aku: A vito gakwe hi Johani. Vontlhe va lo hlamala.

64Zalezo wu lo vululeka a nomu wakwe, ni lirimi lakwe li tlhatlheka; i lo wulawula a bonga Nungungulu. vesi 20

65A vaakelane vabye vontlhe va wa chava, ni timhaka tontlhe leti ti wa lo ga fenemete tikweni gontlhe ga zitsunga ga le Judia.

66Vontlhe lava va nga tizwa va lo ti hlayisa timbilwini tabye, vaku: Xana a nwanana loyi i ta maha wa kuyini ke? Hakuva a canja ga Hosi gi wa hi zinwe naye. Gen. 39:2; Xip. 2:19

67Na Zakaria a raru wakwe i lo tatiswa hi Moya wa ku Basa, a profeta, aku: Joeli 2:28

68A yi khesiwe Hosi, a Nungungulu wa Israeli,

Hakuva i enzele a vanhu vakwe ni ku va tirula. 1 Tih. 1:48; Tis. 72:18

69I hi vuxela a limhonzo la kuhanyisa

A ndlwini ka Davida a nanza gakwe, Tis. 132:17

70Kota lezi a nga tsumbisa kaleloko hi milomu ya vaprofeti vakwe vo basa,

71A ku hi hanyisa valaleni va hina, ni mandleni ya vontlhe lava va hi vengako;

72Kasi ku va mahela wuxinji a vararu va hina,

Ni ku alakanya a xivumelwano xakwe xo basa, Levi 26:42; Tis. 98:3; Ezek. 16:60

73Lexi a nga funga hi ku hlambanya ka Abrahama a raru wa hina, Gen. 12:3; 22:17, 18

74A ku hi nyika lezaku laha na hi tlhatlhekile mandleni ya valala va hina

Hi ta mu tirela na hi nga chavi nchumu, Rom. 6:18

75Hi kubasa ni kululama mahlweni ka yena masikwini wontihe ya hina.

76Na wena nwanana, u ta vitanwa aku muprofeti wa loyi a nga Hehla-Hehla,

Hakuva u ta famba mahlweni ka Hosi a ku longisa a tindlela ta yona, Isa. 40:3; Mal. 3:1

77A kuva u tivisa vanhu va yona hi kuhanyiswa

Kutsetselelweni ka zionho zabye,

78Hi kota ya wuxinji ga hombe ga Nungungulu wa hina,

Lego a kuca ka le hehla ku ta nga hi enzela ha gona,

79A ku va woninga lava va tshamileko munyameni ni le nzhutini wa kufa,

Ni ku rangela a mikonzo ya hina ndleleni ya kurula. Isa. 9:2; Mat. 4:16

80A nwanana i lo kula, a ngangamukelana hi ntamu moyeni; zonake i wa hi le xiwuleni ku kala siku lego a nga huma ha gona xikari ka vaIsraeli. Xip. 2:40

Currently Selected:

Luka 1: TSC72

Highlight

Copy

Compare