Levi 9
9
1Hi siku ga wuntlhanu ni manharu, Mosi i lo vitana Aroni ni vana vakwe, ni masingalakati ya va ka Israeli,
2aku ka Aroni: Teka a role gi tava ga muphahlelo wa kuonha, ni hamba yi nga hiko na bawa, yi tava ya muphahlelo wa kuhiswa, u phahlela ka Jehova.
3Zonake u ta wula ka vanana va ka Israeli, uku: Tekani a mhongo ya muphahlo wa kuonha, ni role, ni yivu, za lembe ginwe a wukale, na zi nga hi na bawa, zi tava za muphahlelo wa kuhiswa;
4ni nkuzi, ni hamba ya muphahlelo wa kurula, mu zi phahlela ka Jehova, ni munyikelo wa zakuga za mapa ma chelilweko mafura; hakuva inyamutlha Jehova i ta ti wonekelisa ka nwina.
5Zinghaho va lo neha mahlweni ka tabemakeli ga mutlhangano lezi zi leletelweko hi Mosi; zonake a ntlhangano wontihe wu lo tshinela, wu ta yima mahlweni ka Jehova.
6Mosi aku ngalo: Lezi hi lezi Jehova a mu leleteleko zona; zi maheni, zonake a kungangamela ka Jehova ku ta woneka ka nwina.
7Mosi aku ngalo ka Aroni: Tshinela laha alatini u nyikela a muphahlo wa wena wa kuonha, ni muphahlo wa kuhiswa, u ti mahela muphahlo wa nzhiho wa wena, ni wa vanhu; u ta nyikela a muphahlo wa vanhu, u maha a nzhiho wa wuyiselelo wa wena wutsumbu ni wa vanhu khwatsi hi lezi Jehova a leleteleko.
8Aroni i lo tshinela laha alatini, a tlhava a role ga muphahlelo wa kuonha lowu wu lumbako yena.
9A vana va Aroni va lo mu nehela a nkhata, a peta a litiho lakwe nkhateni, a wu tota lomu ka timhonzo ta alati, zonake a chulula a nkhata lahasi ka alati.
10I lo hisa mafura ni tiswa, ni pambani wa zivinzi, le hehla ka alati, zi maha za muphahlo wa kuonha, kota lezi Jehova a leleteleko Mosi.
11Kasike a nyama ni bhebhe, i lo zi hisa lahandle ka wugovelo.
12Zonake a tlhava a xifuyo xa muphahlelo wa kuhiswa. A vana va Aroni va lo mu nehela a nkhata, yena a wu nwatsekela laha alatini, matlhelo wontihe.
13Va lo mu nehela a nyama ya muphahlelo wa kuhiswa hi ziro za yona, ni hloko, zonake i lo zi hisa alatini.
14I lo hlaza marumbu ni masonzo, a zi hisa le hehla ka muphahlo wa kuhiswa laha alatini.
15Hilezo i lo neha a munyikelo wa vanhu. A teka a mhongo ya muphahlelo wa kuonha, lezi zi nyikelelwako vanhu; a zi tlhava a maha ha zona a muphahlelo wa kuonha, kota lezi a nga maha ka muphahlo wa ku ranga.
16Zonake i lo nyikela a muphahlelo wa kuhiswa, a nyikela hi nayo wa kona.
17I lo nyikela ni munyikelo wa zakuga; i lo nusa a canja ginwe, a hisa laha alatini zinwe ni muphahlo wa kuhiswa wa laha mixweni.
18I lo tlhava ni nkuzi ni hamba, zi maha muphahlo wa kurula wa vanhu. A vana va Aroni va lo mu nehela nkhata, a nwatsekela ha wona a alati matlhelo wontihe.
19Va mu nehela ni mafura ya role ni hamba, ni nkila, ni pambani, ni tiswa, ni pambani wa zivinzi;
20va lo veka mafura hehla ka zifuva, zonake a hisa mafura alatini.
21Kanilezi a zifuva ni nenge wa xinene, Aroni i lo zi nziwitela mahlweni ka Jehova, wu maha munyikelo wa kunziwitela, kota lezi Mosi a leleteleko.
22Zonake Aroni i lo tlakusa a mandla yakwe hehla ka vanhu a va katekisa. Laha a nga mbhetile a muphahlelo wa kuonha, ni muphahlelo wa kuhiswa, ni muphahlelo wa kurula, i lo relela hi le alatini.
23Zonake Mosi na Aroni va lo enghena lomu ka tabemakeli ga mutlhangano, zonake va huma, va katekisa a vanhu; ni kungangamela ka Jehova ku lo woneka ka vanhu vontlhe.
24Ni nzilo wu lo huma mahlweni ka Jehova wu hisa a muphahlo wa kuhiswa, ni mafura laha alatini. Ni vanhu vontlhe va lo zi wona, zonake va lo kanyuluka hi kutsaka, va ti wisa lahasi hi tinghohe tabye. 2 Kro. 7:1
Currently Selected:
Levi 9: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
