Levi 19
19
1Jehova i lo wulawula ka Mosi, aku;
2Byela a hlengeletano wontihe wa vanana va ka Israeli, uku ka vona; Basani, hakuva mina rizi basile, mina Jehova, Nungungulu wa nwina.
3Loyi ni loyi a chave a mamani wakwe ni dadani wakwe; ni lezaku a hlayisa masabado ya mina. Hi mina Jehova, Nungungulu wa nwina.
4Mu nga khizameli zifananiso, ge hambu ku ti mahela zifananiso zi chululweko. Hi mina Jehova, Nungungulu wa nwina.
5Ni loku mu nyikela ka Jehova a muphahlelo wa kurula, mu ta nyikela hi ndlela leyi yi faneleko kasi ma amukelwa.
6Wona wu ta giwa hi siku mu phahlelako ni siku gi gamelako; lezi zi to sala kala siku ga manharu, zi ta hisiwa nzilweni.
7Loku zi giwa hi siku ga wunharu, ku tava manyala; ni muphahlelo wu nga ta amukelwa.
8Loye a ta nga ziga i tava ni nanzu, hakuva i kanyisile lezi zi basiselweko Jehova. A munhu loye i ta susiwa xikari ka va ka kabye.
9Loku mu hula lomu tikweni ga nwina, u nga tshoveli u chikela magumo ka simu ga wena, ni kambe u nga kutsuli lezi zi saletelako kutshoveleni ka wena.
10U nga khayi lezi zi seleko xivineni xa wena, hambu ni ku rolela mihanzu leyi yi wileko lomu masinwini ya wena. U ta yi siyela zisiwana ni valuveli. Hi mina Jehova, Nungungulu wa nwina.
11Mu nga yivi. Mu nga hembelana mawunwa, hambu ni ku khohlisana. Efe. 4:25, 28; 1 Tes. 4:6
12Mu nga hlambanyi mawunwa hi vito ga mina, hakuva lezo ku nyenyezisa a vito ga Nungungulu wa nwina. Hi mina Jehova. Deut. 5:11; Mat. 5:33; Jak. 5:12
13U nga tsimbeketi wakelene na wena, ni ku phanga a zilo zakwe. U nga hlweli ni hakhelo ya xitiri kala ku chikela manziko.
14U nga rukateli xiwiri; hambu ni ku veka a xikhunguvanyiso mahlweni ka xikhumu; kanilezi u ta chava Nungungulu wa wena. Hi mina Jehova.
15Mu nga hambanyisi nongameto laha kulamuleni ka nwina; u nga cuwuki a nghohe ya xisiwana, hambu ku yimela a wahombe; kanilezi lamula muakelani wa wena hi nongameto.
16Loku u fambafamba lomu tikweni ga nwina u nga fambi u lumbeta a va ka nwina, hambu ni ku maha mboni yo vukela a nkhata wa wakelene na wena. Hi mina Jehova.
17U nga vengi makabye wa wena lomu mbilwini ya wena; u nga tsiki ku luleka muakelani wa wena kasi u nga kumi nanzu hi kota yakwe. Mat. 5:22; Lu. 17:31; Joh. 2:9
18U nga ti photeli, hambu ni ku tshama ni timbiti hi vanhu va ka nwina. Kanilezi u ta ranza wakelene na wena kota lezi u ti ranzako wena. Hi mina Jehova. Rom. 12:19; Gal. 5:14; Jak. 2:8
19Nwina mu ta hlayisa zileletelo za mina. U nga vumeli xifuyo xa wena xi kanzihiwa hi linwani lixaka. U nga byali timbewu ta tixaka timbiri sinwini ga wena. U nga ambali a nguwo leyi yi lukilweko hi tixaka ti hambeneko.
20Loku munhu a etlela ni wasati loyi a nga khumbi, na a ngha a wutilwe hi wanuna, kanilezi na a nga se ku timiwa, hambu ku tlhatlhiswa, vona vambiri va ta tsayiswa, kanilezi ku nga hi ka kufa, hakuva a wasati i wa nga se tlhatlhiswa.
21Ni wanuna i ta neha a hamba ya muphahlelo wa milanzu ka Jehova, laha nyangweni ya tabemakeli ga mutlhangano.
22Ni mupristi i ta mu mahela a nzhiho mahlweni ka Jehova hi hamba ya muphahlelo wa milanzu, hi kota ya kuonha loku a ku mahileko, zonake i ta tsetselelwa a kuonha loku a ku mahileko.
23Loku mu chikela ka tiko legi mu yako ka gona, muya byala tisinya ta mihanzu yi giwako ya tixaka ti hambeneko; lomu ka malembe manharu mu ta hlaya mihanzu ya kona kota makhuna. Ni ka nwina yi tava leyi yi nga hiko minkwera, hikwalaho mu nga yigi.
24Kanilezi hi lembe ga wumune, a mihanzu ya kona yontlhe yi tava ya kubasa, mu nga nyika kubonga ka Jehova hi yona.
25Hi lembe ga wuntlhanu, nwina mu taga mihanzu ya kona, kasi tisinya ti fela ku mu pswalela mihanzu yinyingi. Hi mina Jehova, Nungungulu wa nwina.
26Mu ngagi a zilo lezi zi nga ni nkhata. Mu nga mahi wutumbe, hambu ni ku hlahluva. Miti. 15:20
27Mu nga cingi lomu matlhelweni ya hloko mu yi renzelekela; hambu ni ku cinga lomu matlhelweni ya xilevu xa wena.
28Mu nga ti tlhaveli tihlanga lomu mirini hi kota ya vafileko, hambu ni ku tlhavela madaranganya mimirini ya nwina. Hi mina Jehova.
29U nga nyenyezisi a nhanyana wa wena hi ku mu kucetela wubhayi, kasi a tiko gi nga ti nyiketeli wubhayini, gi tala hi manyala.
30Mu ta hlayisa masabado ya mina; mu hi ni xichavo hi wutshamu ga mina ga kubasa. Hi mina Jehova.
31Mu ngayi ka zitumbe ni ka vangoma, mu nga dzuki mu wutisa nchumu ka vona, kasi va nga mu nyenyezisi. Hi mina Jehova, Nungungulu wa nwina. 1 Sam. 28:7; Isa. 8:19
32U ta suka u yima mahlweni ka lava va basileko wuvu, u nyika xichawo ka munhu wa hombe, u chava Nungungulu wa wena. Hi mina Jehova.
33Loku muluveli a akile tikweni ga nwina, mu nga mu xanisi.
34A muluveli loyi a akileko xikari ka nwina, i tava xisumbulwa, a maha munwe wa nwina; u ta mu ranza kota lezi u ti ranzako wena; hakuva nwinawu mu wa hi valuveli tikweni ga le Gipite. Hi mina Jehova, Nungungulu wa nwina.
35Mu nga hambukisi a nongameto kulamuleni, hambu ku hi ku ringanisa a kuleha ka xilo, hambu kupimeni ka lezi zo tika, hambu ni ku pima wunzeni.
36Mu tava ni xikalu xinene, ni maribye ya kona yo lulama; ni efa gi longamileko, ni hini gi lulamileko. Hi mina Jehova, Nungungulu wa nwina, loyi a mu humesileko le Gipite.
37Mu ta hlayisa milayo yontlhe ya mina ni zileletelo zontlhe za mina, mu zi maha. Hi mina Jehova.
Currently Selected:
Levi 19: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
