Joxua 6
6
1Makunu Jeriko ku wa valilwe tinyangwa, ni kuva ku khotsilwe hi kota ya ku chava a vanana va ka Israeli; ku wa nga hi kona munhu a nga wa huma lahandle hambu ku enghena mutini.
2Na Jehova i te ngalo ka Joxua: Languta, nzi nyikele canjeni ga wena a Jeriko ni hosi ya kona, ni tinhenha ta kona.
3Fambani mu ya renzelekela a muti, nwina nwentlhe vavanuna lava mu hlomileko, mu ya wu renzelekela kanwe hi siku, mu renzelekela wontihe matlhelo; u ta maha lezo ntlhanu wa masiku ni ginwe.
4A 7 wa vapristi va ta famba mahlweni ka nghaxa na va rwele 7 wa mipunzu yi vumako, hi siku ga wu 7 mu ta renzelekela a muti 7 wa zikhati, a vapristi na vaba mipunzu.
5Laha va ta ngaba a mipunzu va lehisa, loku muzwa a kuvuma ka mipunzu vontlhe va ta kanyuluka hi gezu ga hombe, ni khokhola ga muti gi tawa hasi, zonake a vanhu va ta enghena, loyi ni loyi aya mahlweni kakwe.
A kuwa ka Jeriko.
6Zonake Joxua nʼwana Nuni i lo vitana vapristi, aku ka vona: Rwalani a nghaxa ya xivumelwano, ni kambe a 7 wa vapristi a va rwale 7 wa mipunzu mahlweni ka nghaxa ya Jehova.
7Vona vaku ka vanhu: Fambani muya renzelekela a muti, ni lezaku a vanhu lava va hlomileko a va hunze vaya mahlweni ka nghaxa ya Jehova.
8Ni laha Joxua a nga wa byelile a vanhu, a 7 wa vapristi ni lava va nga ni 7 wa mipunzu mahlweni ka Jehova, va lo hunza vaba mipunzu, ni arke ga xivumelwano xa Jehova gi lo famba lenzhako ka vona.
9Ni vavanuna lava va hlomileko va wa famba mahlweni ka vapristi lava va bako mipunzu, zonake a tlawa wa lenzhako wu lo lanzela a nghaxa, a vapristi na vaba mipunzu, na va kari va famba.
10Na Joxua i lo leletela vanhu, aku: Mu nga kanyuluki; ni magezu ya nwina ma nga zwali, ku nga humi hambu ni gezu ginwe milonwini ya nwina, kala ku chikela a siku legi nzi ta nga mu byela ku ngalo: Kanyulukani! Hi kona mu ta nga kanyuluka.
11Zinghaho a nghaxa ya Jehova yi lo famba yi renzelekela a muti khati ginwe, zonake va lo wuya wugovelweni va ta etlela kona.
12Ni mixo, Joxua i lo hatlisa ku vuka, ni vapristi va lo rwala a nghaxa ya Jehova.
13Ni 7 wa vapristi lava va nga rwele 7 wa mipunzu mahlweni ka nghaxa ya Jehova va waba mipunzu na va kari va famba, ni vanhu lava va hlomileko va wa famba mahlweni ka yona, zonake a tlawa wa lenzhako wu lanza a nghaxa ya Jehova; va loba mipunzu, na va kari va famba.
14Hi siku ga wumbiri va lo renzelekela a muti khati ginwe, zonake va tlhela va lo tlhelela wugovelweni; va lo maha lezo ntlhanu wa masiku ni ginwe.
15Hi siku ga wu 7, va lo vinzuka nguvu, laha wuronga gi humako, zonake va loya renzelekela a muti 7 wa makhati khwatsi hi mamahela walawo.
16Zonake hi khati ga wu 7, na vapristi na vaba mipunzu, Joxua aku ngalo ka vanhu: Kanyulukani! hakuva Jehova i mu nyikile muti.
17A muti ni zontlhe zi nga ka wona a zi love, manyala ka Jehova; ku ta hanya Rahabi xibhayi basi, ni vontlhe lava va nga zinwe na yena lomu ndlwini yakwe, hakuva yena i fihlile tihloli leti hi ti rumileko. Jox. 2:3; Maheb. 11:31
18Kanilezi nwina ti hlayiseni ka lezi zi yilako, ku nga taku mu ti nyenyezisa hi ku teka a zilo zo yila mu zi yisa wugovelweni ga ka Israeli, mu gi nehela khombo.
19Yontlhe siliva, ni yontlhe nzalama, ni zontlhe zibya za suku, ni za ziketse zi tava zo basa za Jehova; zona zi ta enghena xikhwameni xa Jehova. Mitse. 31:54
20Zinghaho a vanhu va lo kanyuluka, ni vapristi va loba mipunzu. Ni laha a vanhu va ngazwa a kuvuma ka mipunzu, va lo kanyuluka hi guwa ga hombe, zonake a khokhola gi lo khungumuka giwa lahasi, a vanhu va lo enghena mutini, loyi ni loyi i loya mahlweni kakwe, zinghaho va lo teka a muti. Maheb. 11:30
21Va lo lovisa zontlhe lezi zi nga hi lomu mutini, a vavanuna ni vavasati, a vaswa ni vakale, ni tihomu ni tiyivu, ni timbongola, va lo daya zontlhe hi matlhari.
22Na Joxua i te ngalo ka vavanuna lava vambiri va nga wa yile ku ya hlola a tiko: Yanani ndlwini ya xibhayi, mu ya humesa loye wasati ni vanhu vakwe, kota lezi mu hlambanyileko ka yena.
23Ni majaha lawo ya tihloli ma lo ya enghena, ma humesa Rahabi ni raru wakwe, ni nyine wakwe, ni vamamabye vakwe, ni zontlhe zilo zakwe, ni wontihe maxaka yakwe, va lo va humesa va va yisa lahandle ka wugovelo ga ka Israeli.
24Zonake va lo hisa a muti ni zontlhe lezi zi nga hi kona; saseka a siliva ni nzalama, ni zontlhe zibya za suku ni za ziketse, va lo zi veka lomu xikhwameni xa yindlu ya Jehova.
25Na Joxua i lo hanyisa Rahabi wa xibhayi, zinwe ni yindlu ya raru wakwe, ni zontlhe lezi a nga wa hi nazo; na yena i lo aka xikari ka vaIsraeli kala legi siku, hakuva i lo fihla mitsumi leyi Joxua a nga wa yi rumile ku ya hlola Jeriko.
26Ka xwalexo xikhati Joxua i lo hlambanya, aku: I rukatelwe mahlweni ka Jehova a munhu loye a ta nga vuxa a muti lowu wa Jeriko; i ta aka xiseketelo xa kona hi matewula yakwe, ni ku yimisa tinyangwa ta kona hi xisiva-marumbu xakwe. 1 Tih. 16:34
27Na Jehova i wa hi zinwe na Joxua, ni wudumo gakwe gi lo hangalaka tikweni gontlhe.
Currently Selected:
Joxua 6: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
