Joxua 3
3
Kutlhatukiwa ka Jordani.
1Joxua i lo vuka ni mixo, zonake vontlhe a vanana va ka Israeli va lo suka le Xitime va famba va ya chikela le Jordani, va yima laho, na va nga se tlhatuka a congo.
2Zonake a anzhako ka masiku manharu, a tinduna ti lo famba lomu wugovelweni,
3ti leletela vontlhe lezaku: Loku mu wona a nghaxa ya xivumelwano xa Jehova Nungungulu wa nwina na gi rwelwe hi vapristi va vaLevi, mu ta suka lomu mu govileko kona, mu famba lenzhako ka yona.
4Kanilezi a kuve kona a pfhukana xikari ka gona na nwina wa xipimo xa 2,000 wa mikono, mu nga tshineli laha kusuhani kasi mu wona a ndlela leyo mu ta nga famba ha yona, hakuva nwina a mu se nga famba hi leyo ndlela ka masiku ma hunzileko.
5Na Joxua i te ngalo ka vanhu: Basisani wutsumbu ga nwina, hakuva manziko Jehova i ta maha zihlamaliso xikari ka nwina. Ekso. 19:10, 14
6Zonake Joxua i lo byela vapristi, aku: Tekani a nghaxa ya xivumelwano, mu famba mahlweni ka vanhu. Zonake va lo rwala a nghaxa ya xivumelwano, va famba mahlweni ka vanhu.
7Jehova i te ngalo ka Joxua: Inyamutlha nzi ta sangula ku ku kulisa mahlweni ka vontlhe va ka Israeli, kasi va fela ku zi tiva lezaku nzi tava na wena khwatsi hi lezi nzi nga hi zinwe na Mosi.
8Makunu u ta leletela a vapristi lava va rwalako a nghaxa ya xivumelwano uku: Loku mu chikela mbhirini ya mati ya Jordani, mu ta yima lomu Congweni wa Jordani.
9Joxua i te ngalo ka vanana va ka Israeli: Tshinelani mu tazwa timhaka ta Jehova Nungungulu wa nwina.
10Zonake Joxua aku: Inyamutlha mu ta zi tiva lezaku i kona Nungungulu a hanyako xikari ka nwina, ni lezaku futsi i ta panzanya mahlweni ka nwina a vaKanani, ni vaHiti, ni vaHivi, ni vaPerezi, ni vaGirgaxi, ni vaAmori, ni vajebusi.
11Languta, a nghaxa ya xivumelwano xa Hosi ya yontlhe misava, yi ta ranga mahlweni ka nwina yi tlhatuka Jordani.
12Makunu lezi humesani 12 wa vavanuna lomu ka tinyangwa ta ka Israeli, a nyangwa ni nyangwa yi humesa a wanuna munwe.
13Hakuva laha mikonzo ya vapristi lava va rwalako a nghaxa ya Jehova a Hosi ya misava yontlhe yi ta nga yima matini ya Jordani, a mati ya Jordani lawa ma tako hi le hehla, ma ta tsemeka ma yima, ma maha xitsunzulu.
14Laha a vanhu va nga huma hi lomu matendeni yabye a ku ya tlhatuka Jordani, a vapristi lava va rwalako a nghaxa ya xivumelwano va lo ranga mahlweni ka vanhu.
15Lava va rwalako a nghaxa na va chikele Jordani, loku mikonzo yabye yi pelile matini (hakuva a congo wa Jordani wa kukumuka, wu halakela wontihe a fungu xontlhe xikhati xa kuhula); 1 Kro. 12:15
16a mati lawa ma relelako mata hi le hehla, ma lo ta yima ma kukumuka ma maha xitsunzulu hi le kule nguvu, kala kusuhani ni le Adama, a muti lowu wu nga tlhelo ga Zaretani; ni mati lawa ma relelako le Bimbini ga Libala, gi nga Bimbi ga Munyu, ma lo kokiwa wontihe, zonake a vanhu va lo tlhatuka hi laha ko cuwukana na Jeriko. Deut. 3:17; Tis. 114:3
17Ni vapristi lava va rwalako a nghaxa ya xivumelwano xa Jehova va lo yima vaku tseka hi mikonzo lomu ku omileko laha xikari ka Jordani, zonake vontlhe va ka Israeli va lo famba muhanzeni wu omileko, kala vontlhe vanhu va tlhatuka Jordani.
Currently Selected:
Joxua 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
