Joxua 18
18
1Ni wontihe tlhangano wa vanana va ka Israeli wu lo tlhangana le Xilo; zonake va lo yimisa a tenda ga mutlhangano, hakuva va wa khozisile tiko. Jer. 7:12
2Kanilezi ku wa sele ntlhanu wa tinyangwa ni timbiri xikari ka vanana va ka Israeli, leti ti nga amukelangiko xiavelo xabye.
3Zonake Joxua aku ka vanana va ka Israeli: Ku ta kala rini na ma ha rivateka a kuya teka a tiko legi Jehova Nungungulu wa vararu va nwina a mu nyikileko gona ke?
4Hlawulani vavanuna vanharu ka nyangwa yinwe ni yinwani, nzi ta va ruma va tsemakanya a tiko va panzelela matiko hi ku tsala; zonake va ta wuya ka mina.
5Na vona va ta avanyisela a ntlhanu wa ziavelo ni zimbiri. Juda i ta tshama lomu tikweni gakwe le Dzongeni, ni yindlu ya ka Josefa yi ta tshama lomu tikweni ga yona le Nwalungu.
6Mu ta panzelela a tiko, mu panza a ntlhanu wa matiko ni mambiri, zonake mu ta neha a mapapilo ya kona laha ka mina, mina nzi ta mu hlahluveta tihlolo ka legi wutshamu mahlweni ka Jehova Nungungulu wa hina.
7Kanilezi a va ka Levi, a va na xiavelo xikari ka nwina, hakuva a wupristi ga Jehova hi yona tshomba yabye. Kasike Gadi na Rubeni, ni khihlanya ga nyangwa ya ka Manasa, va amukele xiavelo xabye le tlhatuko wa Jordani, hi le Mutsuwuka-gambo, leyi Mosi a nanza ga Jehova a va nyikileko. Mitse. 18:20; Deut. 10:9
8A vavanuna lavo, va lo suka va famba. Na Joxua i lo va leletela a vavanuna lavo va fambako kuya panza tiko, aku: Fambani, mu tsemakanya tiko, mu gi tsalela, zonake mu ta wuya ka mina. Nzi ta mu pimela hi ku hlahluva tihlolo laha ka wutshamu legi mahlweni ka Jehova, laha Xilo.
9A vavanuna lavo va lo famba va tsemakanya tiko va tsalela miti ya gona lomu ka mapapilo, va gi avanyisa hi 7 wa zipanze. Zonake va lo wuya ka Joxua le wugovelweni ga le Xilo.
10Joxua i lo va pimela hi ku hlahluva tihlolo le Xilo, mahlweni ka Jehova, zonake Joxua i lo avela a tiko ka vanana va ka Israeli, i lo nyika ka munwe ni munwani a xiavelo xakwe.
11Ku lo huma xiavelo xa nyangwa ya vanana va ka Benjamini, hi mingango yabye; zonake a mimbhingano ya xiavelo xabye yi wa hi xikari ka vanana va ka Juda ni vanana va ka Josefa.
12Ni mbhingano wabye hi tlhelo ga Nwalungu wu wa sukela Jordani, wu kanziha xitsungeni xa Jeriko hi le Nwalungu; zonake wu kanziha zitsunga za le Muhlwa-gambo, wu longoloka wuya le xiwuleni xa Bet-Avane.
13Wu lo suka laho wu kongoma Luza, hi le Dzongeni le Beteli; zonake wu relela Atarot-Adari hi le xitsungeni lexi xi nga le Dzongeni ga Bet-Horoni wa le hasi. Gen. 28:19
14Zonake wu renzeleka wu kongoma Muhlwa-gambo hi le Dzongeni ka xitsunga lexi xi cuwukeneko ni Bet-Horoni hi le Dzongeni, zonake wu famba kala le Kiriat-Baali, ku nga Kiriat-Jearime, a muti wa vanana va ka Juda; hi tlhelo ga Muhlwa-gambo.
15Le Dzongeni wu sukela magumeso ka Kiriat-Jearime, zonake wu kongoma Muhlwa-gambo, ka hlowo ya mati ya le Neftoa;
16zonake wu relela magumo ka xitsunga lexi xi cuwukeneko ni nzhelelo wa Ben-Hinome lowu wu nga nzhelelo wa va ka Refaime, hi le Nwalungu, zonake wu relela hi nzhelelo wa Ben-Hinome, wu kongoma tlhelo ga le Dzongeni ka xitsunga xa vajebusi ni ku kala le En-Rogeli;
17zonake wu kongoma le Nwalungu, wuya En-Xemexe, wu famba hi tlhelo ga le Gelilote legi gi cuwukeneko ni ndlela leyi yi kanzihako le Adumima, zonake wu relela hi le Ribyeni ga Bohani nʼwana Rubeni.
18Zonake wu hunza wu relela hi tlhelo ga Nwalungu legi gi cuwukeneko ni libala, zonake wu relela le libaleni.
19Wu famba wu relela hi le Nwalungu ka Bet-Hogla, zonake wu ya gumesa le magumo ka Nwalungu wa Bimbi ga Munyu, hi le magumeso ka Jordani. Lowu hi mbhingano wa le Dzongeni.
20Ni Jordani i lo maha mbhingano hi tlhelo ga Mutsuwuka-gambo. Leyi hi tshomba ya vanana va ka Benjamini, hi mimbhingano ya kona hi matlhelo wontihe, hi mingango yabye.
21Makunu a miti ya lixaka la vanana va ka Benjamini hi mingango yabye, hi leyi: Jeriko, ni Bet-Hogla, ni Emeki-Ziza;
22ni Bet-Araba, ni Zemarime, ni Beteli;
23ni Avima, ni Para, ni Ofra;
24ni Kefar-Amonai, ni Ofni, ni Geba; 12 wa miti ni zimitana za yona.
25Ni Gibeoni, ni Rama, ni Beeroti;
26ni Mizpa, ni Kefira, ni Moza;
27ni Rekemu, ni Irpeeli, ni Tarala;
28ni Zela, ni Elefa, ni Jebusi (ku nga kona Jerusalema), ni Gibea, ni Kiriati; 14 wa miti ni zimitana za yona. Leyi hi tshomba ya vanana va ka Benjamini hi mingango yabye.
Currently Selected:
Joxua 18: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
