Jeremia 6
6
A kutsayiswa ka Jerusalema.
1Nwina vanana va Benjamini, tsutsumani mu huma xikari ka Jerusalema,
Banani mpunzu le Tekoa, Yimisani a xikombiso xa nzilo le Betakeremi;
Hakuva a khombo gita hi le Nwalungu,
Ni lobyiselelo wa hombe.
2Nzi ta lovisa a nhwana wa Zioni,
Loyi a nga lipswhitla ni njhenene.
3A varisi va taya kakwe ni mitlhambi yabye,
Va gwimba matenda yabye va mu renzelekela;
Munwe ni munwani i ta risela wutshanwini gakwe.
4Sangulani a kulwa naye!
Vukani hiya kona ni hlikanhi.
Yowe, a gambo gi hlwile,
Ni minzhuti ya kupeta ka gona yi lehile.
5Vukani, a hi mu kanziheleni ni wusiku,
Hi ya hahlula tiyindlu takwe ta wuhosi.
6Hakuva Jehova wa tiyimpi i ngalo:
Tsemani tisinya, mu maha lihlavu la ku bhiyela Jerusalema.
Hakuva i muti wu feleko ku tsayisiwa,
Wu tele hi kutsimbeketa.
7Kotisa a hlowo yi humesako a mati,
Wu humesisa lezo a kubiha ka wona.
A kuholova ni kuphanga za zwala ka wona,
A wubabyi ni timbanga zi kona mahlweni ka mina.
8Hunzuluka, O Jerusalema, kasi nzi nga ku fulareli,
Nzi ku maha a rumbi, a tiko gi nga hiko na muaki.
9Jehova wa tiyimpi i ngalo:
Va ta kutsula a misalela ya Israeli
Kotisa loku ku kutsuliwa vina.
Tlhelisa a canja ga wena xirunzwini
Kotisa muwungeleteli wa mauva.
10Nzi ta byela mani,
Nzi maha wumboni kasi va ingisa ke?
A tindleve tabye makhuna, a va zi koti kuzwa.
A mhaka ya Jehova i nzhukano kabye, a va yi ranzi.
11Hikwalaho nzi tele hi zanga ya Jehova,
Nzi karele hi ku ti khoma.
Yi chulule hehla ka vanana lomu maruweni,
Ni hehla ka tihlengeletano ta majaha,
A nuna ni sati va ta khonwa zinwe,
A zikhosana ni loyi a teleko hi masiku.
12A tiyindlu tabye ti ta nyikiwa vanwani,
Zinwe ni masimu yabye ni vasati vabye;
Hakuva nzi ta tshambuluta a canja ga mina
Hehla ka vaaki va tiko, ku wula Jehova. Deut. 28:30; Mik. 5:2
13Hakuva va ti nyiketele kumbilukeleni,
A vatsongwani ni vahombe,
A vaprofeti ni vapristi, vontlhe va kanganyisa.
14A va khatalangi ku chuma a ti mbanga ta vanhu va mina,
Vaku: Ku rulile, ku rulile!
Na ku nga hi na kurula. Mika 3:5; 1 Tes. 5:3
15Xana va zwile tingana loku va mahile manyala ke?
Kokwihi, a va zwangi tingana,
Ne, a va tivi ku koyama tingana.
Hikwalaho va tawa zinwe ni vanwani;
Va tawa a xikhati nzi va tsavisako, ku wula Jehova.
16Jehova i ngalo: Yimani tindleleni, mu languta; mu wutisela a tindlela ta kale, muku: Xana a ndlela yinene hi yihi ke? zonake fambani ha yona, mu ta kuma kuhumula ka mihefemulo ya nwina. Kanilezi vona va lo hlamula, vaku: A hi vumeli ku famba ha yona. Isa. 28:12; Mat. 11:29; 23:37
17Nzi vekile varinzeli xikari ka nwina, nziku: Ingisani a gezu ga mpunzu. Kanilezi va hlamule, vaku: Hi nga ta gi ingisa.
18Hikwalaho, nwina vamatiko, ingisani; na wena hlengeletano, tiva lezi zi va humelelako!
19Ingisa, o misava: Nzi ta neha a khombo hehla ka tiko legi, wu nga mbhanzu wa maalakanyo yabye; hakuva a va ingisangi a timhaka ta mina, va kanyisile a nayo wa mina.
20Ma nzi vuna yini a makha ya le Xeba, ni mipepo ya tiko ga le kule ke? A minyikelo ya nwina ya kuhiswa a yi nzi xalalisi, ni miphahlo ya nwina a yi nzi tsakisi. Isa. 1:11; Am. 5:21; Mika 6:6
21Hikwalaho Jehova i ngalo: Nzi ta vekela tiko legi a zikhunguvanyiso, a vapswali ni vanana va ta khunguvanyeka khatiginwe, a muakelwani ni munghana wakwe va ta lova zinwe.
22Jehova i ngalo:
Langutani, a vanhu va tako hi le tikweni ga le Nwalungu,
A tiko ga hombe gi ta vuka le magemetamusi ya misava. Deut. 28:49
23Va welela mawura ni matlhari,
Va na ni lunya, a va na tipswalo.
A guwa gabye gi khwatsi ga bimbi,
Va khilele mahaxi, na va hlomile a kulwa na wena,
O nhwana wa Zioni.
24Hi zwile a wudumo gabye, a mawoko ya hina ma mbhela ntamu,
Hi telwe hi hlanekera ni kubayisa ko kota wasati a lunwako.
25Mu ngayi masinwini, hambu ku famba tindleleni;
Hakuva a supado ya nala yi kona lomo,
Ka chavisa a matlhelo wontihe.
26O nhwana wa vanhu va mina,
Ti ambexe hi sakwa, u puluwunza khumeni;
Bana nkosi kota loku ku rilelwa a nʼwana munwe yece,
A hlomulo wa xiviti;
Hakuva a muhahluli i ta hi tela hi xitshuketi.
27Nzi ku vekile a kuva mukambi wa tiko ga mina, ni kuva khokhola; lezaku u tiva ni ku ringa a kufamba kabye.
28Vona vontlhe vahluwuki ni lava va ti alisako, va famba-famba va lumbeta; va nonohile ku fanana ni suku ni xiketse; vontlhe va bihile.
29A mivuvo yi buveta hi ntamu, a muthovu wu hisilwe hi nzilo; a munyekisi i nyekisile mahala, hakuva a vobiha a va susiwangi.
30Vona va ta wuliwa ku i siliva yi tsikilweko, hakuva Jehova i va tsikile.
Currently Selected:
Jeremia 6: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
