Jeremia 41
41
Gedalia a dawa hi Ixmaeli.
1Makunu hi hweti ya wuntlhanu ni timbiri, Ixmaeli a nʼwana Netania wa Elixama, wa yindlu ya wuhosi, a nga nduna ya hombe ya hosi, i lota ka Gedalia a nʼwana Ahikamu le Mizpa na hi ni khume ga vavanuna, va ta tshama kugeni vontlhe kwale Mizpa. 2 Tih. 25:25
2Zonake Ixmaeli a nʼwana Netania ni khume ga vavanuna lava a nga hi navo, va lo suka va yima, va gwaza Gedalia a nʼwana Ahikamu wa Xafani hi supado, va mu daya, yaloye a hosi ya le Babuloni yi nga mu vekile kuva mufumeli lomo tikweni.
3Ixmaeli i lo daya ni vaJuda lava va nga hi na Gedalia ta Mizpa, ni maKaldea lawa ma nga hi laho, ti nga tinhenha.
4Hi siku ga wumbiri anzhako ka kudawa ka Gedalia, na zi nga se tibyiwa hi munhu,
5ku lo chikela a vanhu va le Xekemi ni le Xilo ni le Samaria, va wa hi 80 wa vavanuna, na va cingile malevu yabye, a tinguwo tabye na ti hanzulwe, na va ti tsemelele, na va welele minyikelo ya tinzhoho ni pepo, va zi neha ndlwini ya Jehova. Levi 19:27; Deut. 14:1
6Ixmaeli nʼwana Netania i lo huma ku va khinga, na a kari a rila. Loku a tlhangene navo, i te ngalo kabye: Tanani ka Gedalia a nʼwana Ahikamu!
7Loku va chikele xikari ka muti, Ixmaeli a nʼwana Netania i lo va daya a va hoxa lomu rinzini, na a hi zinwe ni vavanuna vakwe.
8Kanilezi ku wa hi ni khume ga vavanuna xikari kabye, va ngaku ka Ixmaeli: U nga hi dayi; hakuva hi na ni mabako ya Zakuga hi ma fihlileko le nkoveni, a mavele ni sevada ni mafura ni wulombe. Hikwalaho i lo va tsika a nga va dayi zinwe ni vamakabye vabye.
9Makunu a rinzi legi Ixmaeli a nga hoxa ka gona a zirumbi za vanhu lava a nga va daya zinwe na Gedalia, hi legi hosi Asa a nga gi mahile hi ku chava Baaxa a hosi ya ka Israeli, hi gona Ixmaeli nʼwana Netania a nga gi tata hi zirumbi. 1 Tih. 15:22
10Zonake Ixmaeli i lo famba ni misalela ya vanhu lava va nga hi lomu Mizpa, a vanhanyana va hosi, ni vontlhe vanhu lava va nga sele le Mizpa, lava Nebuzaradani a nduna ya vanyakasani a nga va nyikile ka Gedalia a nʼwana Ahikamu. Ixmaeli nʼwana Netania i lo va khomelaa famba navo ka vana va Amoni.
11Kanilezi Johannani nʼwana Karea ni tinduna tontlhe ta mabutho lawa ma nga hi naye, loku va zwile a kubiha kontlhe loku a ku mahileko Ixmaeli nʼwana Netania,
12va lo teka vontlhe vavanuna va yalwa na Ixmaeli a nʼwana Netania, va lo ya mu kuma laha kusuhani ni tiva ga hombe gi nga hi le Gibeoni. 2 Sam. 2:13
13Makunu laha a vanhu vontlhe lava va nga hi na Ixmaeli va nga wona Johannani nʼwana Karea ni tinduna tontlhe ta mabutho lawa a nga hi nawo, va lo tsaka.
14Zinghaho a vanhu vontlhe lava Ixmaeli a nga va khomele le Mizpa va lo hunzuluka va tlhela vaya ka Johannani, nʼwana Karea.
15Kanilezi Ixmaeli nʼwana Netania i lo tsutsuma Johannani, na hi ni ntlhanu wa vavanuna ni vanharu, vaya ka vana va Amoni.
16Zonake Johannani nʼwana Karea ni tinduna tontlhe ta mabutho lawa a nga hi nawo va lo teka a misalela ya vanhu vontlhe lava Ixmaeli nʼwana Netania a nga va humesile le Mizpa anzhaho kakuva a dele Gedalia nʼwana Ahikamu, va nga hi vavanuna va yimpi, a vavasati ni vanana ni mithenwa, lava va nga va tlhelisile hi le Gibeoni;
17va lo andlamuka va ya tshama le Gerute Cimhame, ngomama ni Betlehema, kasi kuya le Gipite hi kota yo chava maKaldea. 2 Sam. 19:38
18Hakuva va wa va chava hilezi Ixmaeli nʼwana Netania a nga dele Gedalia nʼwana Ahikamu, loyi a hosi ya le Babuloni yi nga mu vekile kuva mufumeli lomu tikweni.
Currently Selected:
Jeremia 41: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
