Jeremia 38
38
Jeremia a tlhelisiwa nkeleni.
1Xefatia nʼwana Mattani, na Gedalia nʼwana Paxuri, na Jukali nʼwana Xelemia, na Paxuri nʼwana Malkia, va wa zwile a timhaka leti Jeremia a nga ti kanela ka vontlhe vanhu, aku:
2Jehova i ngalo: Loyi a to sala mutini lowu i tafa hi supado, ni ndlala ni ntungu; kanilezi loyi a to pfowolela ka maKaldea i ta hanya, i taku khwatsi o wutla a wutomi gakwe a hanya.
3Jehova i ngalo: A muti lowu futsi wu ta nyiketwa a canjeni ga yimpi ya hosi ya Babuloni, yena i ta wu khozisa.
4Zonake a vahombe va lo byela hosi, vaku: A munhu loyi a dayiwe, hakuva wa rera a mawoko ya tinhenha leti ti seleko mutini lowu, ni mawoko ya tiko gontlhe, hi ku va byela a timhaka ta kunghahi; a munhu loyi a nga xuveli a tiko wunene, kanilezi wa gi xuvela makhombo. Am. 7:10
5Hosi Zedekia i lo hlamula, aku: Langutani, i le mandleni ya nwina, hakuva hosi a yi zi koti ku mu alela nchumu.
6Zonake va lo khoma Jeremia va mu chikisa a rinzini ga Malkia a nʼwana wa hosi, legi gi nga hi lomu hubyeni ya vanyakasani; va relelisa Jeremia hi tingoti. Lomu rinzini ku wa nga hi na mati, saseka marope; na Jeremia i lo njhibila maropeni.
7Loku Ebed-Meleki a nduna ya muEtiopia, loyi a nga hi lomu ndlwini ya hosi, a zi zwile lezaku Jeremia va mu hoxile rinzini, na hosi yi tshamile a nyangweni ya Benjamini;
8Ebed-Meleki i lo huma ndlwini ya hosi, a ya wulawula ni hosi, aku:
9Hosi, nwinyi wanga, a vavanuna lava va mahile za hava ka zontlhe lezi va nga zi mahela muprofeti Jeremia, loyi va mu hoxileko rinzini; i tafa hi ndlala laha a nga kona, hakuva a ku na kuga lomu mutini.
10Zonake a hosi yi lo ruma Ebed-Meleki a muEtiopia, yiku: Teka 30 wa vavanuna laha, mu ya humesa muprofeti Jeremia lomu rinzini na a nga sefa.
11Ebed-Meleki i lo famba ni vavanuna lavo, vaya ndlwini ya hosi, va khokhomela hi xipetsweni xa bako, va rolela kona a micangala ya kale yo bola, va yi releta ka Jeremia lomu rinzini.
12Ebed-Meleki a muEtiopia, i lo byela Jeremia, aku: Hakharisa a micangala leyi makhahaleni ya wena hi lahasi ka tingoti. Jeremia i lo maha lezo.
13Zonake va lo koka Jeremia hi tingoti, va mu humesa rinzini; na Jeremia i lo tshama a hubyeni ya vanyakasani. Zedekia a engeta a lomba wusungukati ka Jeremia.
14Zonake hosi Zedekia a va ruma a ku ya vitana muprofeti Jeremia a mu vitanela a nyangweni ya wunharu ya yindlu ya Jehova. A hosi yiku ka Jeremia: Nza ha ku wutisa mhaka, u nga nzi fihleli nchumu.
15Jeremia i te ngalo ka Zedekia: Loku nzi ku byela mhaka, u ta nzi daya, ni loku nzi kuha wusungukati, wena u nga ta nzi ingisa.
16Zonake hosi Zedekia i lo hlambanya ka Jeremia xihundleni, aku: Ha Jehova a hanyako, loyi a hi nyikileko wutomi legi, nzi nga ta ku daya, hambu a ku ku nyikela a mandleni ya vanhu lava va hlotako wutomi ga wena.
17Zonake Jeremia i lo byela Zedekia, aku: Jehova a Nungungulu wa tiyimpi, a Nungungulu wa ka Israeli i ngalo: Loku u huma u ya ti nyikela ka tihosana ta hosi ya Babuloni, zonake wena u ta hanya, ni muti lowu wu nga ta hiswa hi nzilo; u ta hanya, wena ni yindlu ya wena.
18Kanilezi loku u nga humi u ya ti nyikela ka tihosana ta hosi ya Babuloni, a muti lowu wu ta nyikelwa canjeni ga maKaldea, va wu hisa hi nzilo, na wena u nga ta pona mandleni yabye.
19Hosi Zedekia i lo hlamula Jeremia, aku: Nzo chava vaJuda lava va pfowoleleko ka maKaldea, lezaku nzi nyikelwa canjeni gabye, va hlakana ha mina.
20Jeremia aku: Va nga ta ku nyikela. Hi nga ingisa a gezu ga Jehova, legi nzi ku byelako gona; u ta tshameka khwatsi u hanya.
21Kanilezi loku u ala ku huma, leyi hi yona a mhaka a nga nzi kombisa Jehova:
22Languta, a vavasati vontlhe lava va seleko a ndlwini ya hosi ya ka Juda va ta yiswa ka tihosana ta hosi ya Babuloni; a vavasati lavo va taku:
A vanghana va wena va ku kanganyisile,
Ve ku hlulile;
A milenge ya wena yi kari yi njhibila maropeni,
Vona na va tlhelele nzhako! Obad. v. 7
23A vasati va wena vontlhe ni vana va wena va ta yisiwa ka maKaldea, na wena u nga ta huluka a canjeni gabye, kanilezi u ta khomiwa hi canja ga hosi ya Babuloni; ni muti lowu wu ta hiswa hi nzilo hi kota ya wena.
24Zonake Zedekia i te ngalo ka Jeremia: Loku u nga byeli munhu a timhaka leti wena u nga tafa.
25Kanilezi loku tihosana tizwa lezaku u wulawulile na mina, vata ka wena, vaku: Hi byele lezi u nga xuxa ni hosi, loku u nga hi fihleli nchumu hi nga ta ku daya; hi tivise ni lezi hosi yi ku byelileko.
26Zonake u ta va byela, uku: Nzi lo khongotela hosi lezaku yi nga ha nzi tlhelisi a ndlwini ya Jonatani, kasi nzi ya fela kona.
27Zonake ku lota tontlhe tihosana ka Jeremia, ti ta mu wutisa; yena i lo va hlamula hi timhaka tontlhe leti hosi yi nga mu layisile tona. Va lo mu tsika, va ti fambela, hakuva a mhaka a yi tibyiwangi hi munhu.
28Na Jeremia i lo tshama lomu hubyeni ya vanyakasani kala a siku legi Jerusalema a nga khoziswa ha gona.
Currently Selected:
Jeremia 38: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
