Jeremia 36
36
A bhuku ga Jeremia gi hiswa.
1Hi lembe ga wumune ga Jehoiakimu nʼwana Josia, hosi ya ka Juda, a mhaka ya Jehova yi lota ka Jeremia, yiku:
2Ti tekele a bhuku u tsala tontlhe timhaka leti nzi ku byelileko ha Israeli na Juda, ni xungetano hi wontihe matiko, a kusukela a siku lego nzi nga wulawula na wena a masikwini ya Josia kala nyamutlha lezi.
3Kutani a va ka Juda va ta ingisa a kubiha kontlhe loku nzi xuvako ku va mahela; lezaku munwe ni munwani a hunzuluka ndleleni yakwe yo biha, nzi mu tsetselela a kubiha kakwe ni xionho xakwe.
4Zonake Jeremia i lo vitana Baruke nʼwana Neria, na Baruke i lo tsala bhukwini hi nomu wa Jeremia, a magezu wontihe ya Jehova lawo a nga ma wulile kakwe.
5Jeremia i lo leletela Baruke, aku; Mina nzi khotselwe, a nzi zi koti ku enghena ndlwini ya Jehova.
6Hikwalaho enghena wena lomu ndlwini ya Jehova hi siku ga kuyila, u ya gonza a bhuku legi u gi tsalileko hi nomu wa mina, ma nga magezu ya Jehova, u ma gonza tindleveni ta vanhu ni ta vontlhe vaJuda lava va humeleko hi mitini yabye.
7Kutani va ta khongela mahlweni ka Jehova, va hunzuluka munwe ni munwani mahanyeleni yabye yo biha. Hakuva a khulo ga Jehova ga hombe ni xiviti lexi a sinako a xi wulile hi lava vanhu.
8Baruke nʼwana Neria i lo maha zontlhe lezo a nga byeliwa hi Jeremia muprofeti, a gonza timhaka ta Jehova bhukwini legi lomu ndlwini ya Jehova.
9Hi lembe ga wuntlhanu ga Jehoiakimu nʼwana Josia, hosi ya ka Juda, hi hweti ya wuntlhanu ni mune, ku lo biwa hungu hi siku ga kuyila mahlweni ka Jehova a ka vontlhe vanhu va Jerusalema, ni vanhu vontlhe va humako mitini ya ka Juda vata Jerusalema.
10Zonake Baruke i lo gonza lomu bhukwini a timhaka ta Jeremia lomu ndlwini ya Jehova, lomu tsawini ga Gemaria a nʼwana Xafani, mutsali, a hubyeni ya le hehla, a nyangweni yiswa ya yindlu ya Jehova, a gonza tindleveni ta vanhu vontlhe.
11Laha Mikaia nʼwana Gemaria nʼwana Xafani, a ngazwa tontlhe a timhaka ta Jehova na ti gonziwa bhukwini,
12i lo relela aya ndlwini ya hosi, lomu hubyeni ya mutsali. Ku wa tshami le kona a tihosana tontlhe: hi Elixama mutsali, na Delaya nʼwana Xemaia, na Elnatani nʼwana Akbora, na Gemaria nʼwana Xafani, na Zedekia nʼwana Hanania, ni tihosana tontlhe.
13Zonake Mikaia i lo va byela a timhaka tontlhe a nga tizwa, laha Baruke a nga kari a gonza tindleveni ta vanhu.
14Tontlhe tihosana ti lo rumela Jehudi nʼwana Netania, nʼwana Xelemia, nʼwana Kuxe, ka Baruke, tiku: Teka a bhuku u nga gi gonza a tindleveni ta vanhu, uta. Baruke nʼwana Neria i lo teka a bhuku ata kabye.
15Va te ngalo kakwe; Tshama hasi, u gi gonza tindleveni ta hina. Na Baruke i lo gi gonza tindleveni tabye.
16Makunu laha va ngazwa tontlhe leti timhaka, va lo dzuka va langutana, vaku ka Baruke: Futsi hi ta byela hosi a timhaka tontlhe leti.
17Va lo wutisa Baruke, vaku: Hi byele makunu, u tsalisile kuyini a timhaka tontlhe leti hi nomu wakwe?
18Baruke i lo va hlamula, aku: I nzi byelile wontihe lawa magezu hi nomu wakwe, nzi ma tsala bhukwini hi tinta.
19Zonake a tihosana tiku ka Baruke: Famba u ya fihlala, wena na Jeremia; mu nga byeli ni munhu laho mu tova kona.
20Va lo veka a bhuku lomu ndlwini ya Elixama, a mutsali; zonake va loya hubyeni ya hosi, va ya byela hosi tontlhe leti timhaka.
21A hosi yi lo ruma Jehudi a ku ya teka a bhuku; a ya gi teka lomu ndlwini ya Elixama a mutsali. Na Jehudi i lo gi gonza a tindleveni ta hosi, ni tindleveni ta tontlhe tihosana leto ti nga yimile mahlweni ka hosi.
22A hosi yi wa tshamile ndlwini ya wuxika, hakuva yi wa hi hweti ya wuntlhanu ni mune; ku wa hi ni nzilo lomu ka mbawula mahlweni kakwe.
23Kute loku Jehudi a gonzile tinzima tinharu hambu mune, a hosi yi lo tsema a bhuku hi mukwana a gi hoxa nzilweni wu nga lomo ka mbawula, kala gontlhe a bhuku giku bhi laha nzilweni wu nga lomu ka mbawula.
24A hosi ni malanza ya yona loku va zwile tontlhe leti timhaka, a va chavangi hambu a ku hanzula a tinguwo tabye. 2 Tih. 22:11
25Elnatani na Delaia na Gemaria va lo khongotela hosi lezaku yi nga hisi a bhuku, kanilezi a yi va ingisangi.
26Zonake a hosi yi lo laya lezaku Baruke, a mutsali, na Jeremia muprofeti, va khonwa hi Jerahmeeli a nʼwana wa hosi, na Seraia nʼwana Azrieli, na Xelemia nʼwana Abdeeli, kanilezi Jehova i lo va fihla.
27Zonake a mhaka ya Jehova yi lota ka Jeremia, loku hosi na yi hisile a bhuku legi gi nga ni timhaka leti Baruke a nga ti tsalile hi nomu wa Jeremia, yiku:
28Ti tekele a ginwani bhuku, u tsala ka gona tontlhe a timhaka leʼto ranga ti nga hi ka bhuku go sangula, legi gi nga hisiwa hi Jehoiakimu hosi ya ka Juda.
29U ta byela Jehoiakimu hosi ya ka Juda, uku: Jehova i ngalo: Wena u hisile bhuku legi uku: Hikuyini u tsalileko ka gona lezaku a hosi ya Babuloni yi tata yi ta hahlula tiko legi, yi mbheta vanhu ni zihari?
30Hikwalaho Jehova i ngalo xungetano ha Jehoiakimu, hosi ya ka Juda: A nga tava na nʼwana wo tshama xitshanwini xa wuhosi xa Davida; a xirumbi xakwe xi ta hoxiwa handle a munwini wa hlikanhi ni xiramini xa wusiku.
31Nzi ta mu tsayisa yena ni pswalo wakwe ni malanza yakwe, hi kota ya kubiha kabye; nzi ta neha hehla kabye ni hehla ka vaaki va Jerusalema ni hehla ka vanhu va ka Juda, a makhombo wontihe lawa nzi wulileko hehla kabye, kanilezi a va ingisangi.
32Zonake Jeremia i lo teka ginwani bhuku, a gi nyika ka Baruke nʼwana Neria, a mutsali; a wihi a nga tsala ka gona hi nomu wa Jeremia tontlhe a timhaka ta bhuku lego gi nga hisiwa hi Jehoiakimu hosi ya ka Juda; kambe ku lo engetelwa a timhaka tinyingi to fanana nato.
Currently Selected:
Jeremia 36: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
