Jeremia 29
29
A papilo gi tsalehoeko a vakhonwi.
1Makunu leti hi timhaka ta papilo legi Jeremia muprofeti a nga rumela hi le Jerusalema a ka lava va seleko va masingalakati va le wukhumbini, ni ka vapristi ni ka vaprofeti ni ka vontlhe vanhu, lavo Nebukadnezzare a nga va khoma Jerusalema va yiswa Babuloni,
2anzhako kova Jekonia, a hosi, a humele hi le Jerusalema zinwe ni mamani wa hosi ni tinduna ni tihosana ta ka Juda ni Jerusalema, ni vavatli ni vabethi va nyunzu. 2 Tih. 24:12; Jer. 24:1
3A papilo gi lo rumiwa hi canja ga Elasa, nʼwana Xafani, na Gemaria, nʼwana Hilkia, lavo Zedekia hosi ya ka Juda a nga va ruma Babuloni ka Nebukadnezzare a hosi ya Babuloni, giku:
4Jehova wa tiyimpi, a Nungungulu wa Israeli i ngalo a ka vontlhe va nga wukhumbini, lavo nzi va rurisileko Jerusalema nzi va yisa Babuloni:
5Akani tiyindlu, mu tshama ka tona; byalani masimu, muga a mbhanzu wa wona.
6Tekani vasati, mu beleka varisanyana ni vanhanyana; tekelani a vafana va nwina a vasati, ni ku nyikela a vanhwana va nwina va tekwa hi vanuna; va beleka varisanyana ni vanhanyana; anzani seyo, mu nga hungulela.
7Xuvani a makatekwa hehla ka muti lowu nzi mu yisileko ka wona kota vakhonwi, mu wu khongelela ka Jehova; hakuva loku wu humelela, mu ta humelela na nwinawu.
8Hakuva Jehova wa tiyimpi, a Nungungulu wa Israeli i ngalo: Mu nga khohliswi hi vaprofeti va nwina lava va nga xikari ka nwina, ni vavumbi va nwina, mu nga dzuki mu ingisa a miloro leyi mu yi lorako.
9Hakuva va mu profetela mawunwa hi vito ga mina; a nzi va rumangi, ku wula Jehova.
10Hakuva Jehova i ngalo: Loku ku hunzile a 70 wa malembe le Babuloni, nzi ta mu alakanya, nzi mu mahela a mhaka ya mina yinene, nzi mu wuyisa ka legi wutshamu. Ezra 1:1; Dan. 9:2; Zak. 1:12
11Hakuva nza alakanya lezi nzi xuvako ha nwina, ku wula Jehova: maalakanyo ya kurula, na ma nga hi ya khombo, lezaku mu tsumba a masiku ma ha tako.
12Mu ta nzi vitana, mu famba mu nzi khongela, mina nzi ta mu ingisa.
13Mu ta nzi lava, mu ta nzi kuma loku mu nzi hlota hi mbilu ya nwina yontlhe.
14Nzi ta kumiwa ha nwina, ku wula Jehova, nzi ta tlhelisela a vakhonwi va nwina, nzi ta mu tsombanyisa hi matikweni wontihe ni matlhelweni wontihe lawa nzi mu hangalasileko kona, ku wula Jehova; nzi ta tlhela nzi mu wuyisa ka wutshamu legi nzi mu hlongoleko ka gona muya wukhumbini. Deut. 30:1; Tis. 106:45
15Hakuva mu ngalo: Jehova i hi vuxele vaprofeti ni le Babuloni.
16Jehova i wula lezo xungetano hi hosi leyi yi tshamileko xitshanwini xa wuhosi xa Davida, ni xungetano ni vanhu lavo va tshamako mutini lowu, va nga vamakwenu lava va nga yangiko zinwe na nwina a wukhumbini;
17Jehova wa tiyimpi i ngalo: Nzi ta va rumela supado, ni ndlala, ni ntungu, nzi ta va maha kota makuwu yo biha, ma nga zi kotiko ku giwa hi kota ya kubiha ka wona.
18Nzi ta va hlongolisa hi supado, ni ndlala, ni ntungu; nzi ta va maha a xichaviso xikari ka mifumo yontlhe ya misava, ni kuva xiruko, ni xirewukiso ni xihlekiso, ni xixovo a ka wontihe matiko nzi to va hangalasela ka wona;
19hakuva a va ingisangi a timhaka ta mina, ku wula Jehova, laha nzi nga va rumela a malanza ya mina vaprofeti hi kusimamisilweko. Kanilezi a mu zwangi, ku wula Jehova.
20Hikwalaho zwanani a mhaka ya Jehova, nwina nwentlhe mu nga wukhumbini, nwina nzi mu rumeleko hi Jerusalema kuya Babuloni.
21Jehova wa tiyimpi, a Nungungulu wa Israeli i ngalo xungetano ha Ahabi a nʼwana Kolaya, na Zedekia a nʼwana Maaseya, lava va mu profetelako mawunwa vitweni ga mina: Langata, nzi ta va nyikela canjeni ga Nebukadnezzare, hosi ya Babuloni; yena i ta va daya mahlweni ka nwina.
22Ku ta tekiwa ka vona a gezu ga nzhukano a ka vontlhe vakhonwi va vaJuda va nga le Babuloni, gaku: Jehova a ku mahe u kota Zedekia na Ahabi, lavo a hosi ya Babuloni yi nga va rimba nzilweni.
23Hakuva va mahile wupumbu lomu ka Israeli, va bhaya ni vasati va vaakelwane, ni ku wulawula timhaka ta mawunwa vitweni ga mina, leti nzi nga va layangiko. Mina nza zi tiva, niku nzi mboni, ku wula Jehova.
A mhaka yi rumelweko ka Xemaya.
24Byela Xemaya wa le Nehelame, uku:
25Jehova wa tiyimpi, a Nungungulu wa Israeli, ngalo: Kotisa lezi u rumeleko a mapapilo vitweni ga wena a ka vanhu vontlhe va nga le Jerusalema, ni ka Zefania, a nʼwana Maaseya mupristi, ni ka vontlhe vapristi, uku:
26Jehova i ku yimisile a kuva mupristi a wutshanwini ga Jehoyada a mupristi, kasi kuva kona varangeli ndlwini ya Jehova, lezaku u boha hi makhotso ni tisinga lava va hlanyako, va ti maha vaprofeti.
27Makunu hikuyini u nga kawukangiko Jeremia wa le Anatote, loyi a profetako xikari ka nwina?
28Hi kota ya lezi i hi rumele mhaka le Babuloni, aku: A wukhumbi ga ha ta leha; ti akeleni tiyindlu mu tshama ka tona, mu byala masimu ni kuga a mihanzu ya wona.
29A mupristi Zefania i lo gonza a papilo legi tindleveni ta Jeremia a muprofeti.
30Zonake a mhaka yi lota ka Jeremia hi ka Jehova, yiku:
31Rumela ka vontlhe va nga wukhumbini, uku: Jehova i ngalo xungetano ha Xemaya wa le Nehelame: Kotisa lezi Xemaya a nga profeta ka nwina na nzi nga mu rumangi, a mu maha mu tsumba mawunwa;
32hikwalaho Jehova i ngalo: Mina nzi ta tsayisa Xemaya wa le Nehelame ni vana vakwe; a nga tava na munhu wo tshama xikari ka tiko legi, kambe a nga ta wona makatekwa lawa nzi to mahela a vanhu va mina, ku wula Jehova, hakuva i wulawulile zo vukela Jehova.
Currently Selected:
Jeremia 29: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
