Jeremia 27
27
A muyoka wa hosi ya Babuloni.
1A kusanguleni ka kufuma ka Jehoiakimu, a nʼwana Josia, hosi ya ka Juda, ku tile a mhaka leyi ka Jeremia hi ka Jehova, yiku:
2Jehova i te ngalo ka mina: Ti mahele a magota ni miyoka, u zi tihomeka a nhanwini ya wena.
3Zonake u zi rumela a ka hosi ya le Edome, ni ka hosi ya Moabi, ni ka hosi ya vana va ka Amoni, ni ka hosi ya Tire, ni ka hosi ya Sidoni, hi mitsumi yi tileko Jerusalema ka Zedekia, a hosi ya ka Juda,
4U ta va leletela ka tihosi tabye, uku: Jehova wa tiyimpi a Nungungulu wa Israeli i te ngalo: Byelani a tihosi ta nwina, muku:
5Hi mina nzi vangileko misava, ni vanhu ni zihari zi nga kona misaveni, hi ntamu wa mina wa hombe ni woko ga mina gi nawulutilweko; nza yi nyika ka loyi nzi ranzako a ku mu nyika yona. Jer. 32:17; Dan. 4:29
6Makunu nzi nyikele wontihe lawa matiko a mandleni ya nanza ga mina Nebukadrezzare, a hosi ya Babuloni; nza mu nyika ni zihari za khwati kasi za mu tirela.
7Wontihe matiko ma ta mu tirela, yena ni nʼwana wakwe ni zukulu wakwe, kala ku chikela a xikhati xa tiko gakwe, zonake yenawu i ta khoziswa hi matiko manyingi ni tihosi ta hombe.
8A tiko kutani mufumo lowu wu to kala ku khoza ka Nebukadnezzare, hosi ya Babuloni, va ta nga ala ku veka tinhamu tabye hasi ka muyoka wa hosi ya Babuloni, nzi taba a tiko lego hi supado, ni ndlala, ni ntungu, ku wula Jehova, kala nziku gi bhi hi woko gakwe.
9Hikwalaho mu nga dzuki mu ingisa a vaprofeti va nwina, ni vavumbi va nwina, ni miloro ya nwina, ni zitumbe za nwina, ni vangoma va nwina, ioku zi wula ka nwina, ziku; Mu nga tireli a hosi ya Babuloni!
10Hakuva mawunwa va profetako ka nwina, kasi ku mu maha mu huma tikweni ga nwina mu yiswa kule; kasi nza fela ku mu hlongola, mu ya lova.
11Kanilezi a tiko legi gi to vumela a muyoka wa hosi ya Babuloni, gi yi tirela, nzi ta gi tsika tikweni ga gona, ku wula Jehova, va ta gi rima ni ku ti akela lomo.
12A twaleto timhaka nzi ti wulile ka Zedekia, hosi ya ka Juda, nziku: Enghenisani a tinhamu ta nwina lomu ka muyoka wa hosi ya Babuloni; mu ta hanya loku mu yi tirela ni vanhu va yona.
13Wena ni vanhu va wena, hikuyini mu ta ngafa hi supado ni ndlala ni ntungu, kota lezi Jehova a wulileko hi ka tiko legi gi to kala ku khoza ka hosi ya Babuloni ke?
14Mu nga dzuki mu ingisa a magezu ya vaprofeti lava va nge ngalo ka nwina: Mu nga tireli a hosi ya Babuloni; hakuva vo mu profetela mawunwa.
15Hakuva a nzi va rumangi, ku wula Jehova, vo profeta mawunwa hi vito ga mina, kasi mina nzi fela ku mu papaxela, mu lova, nwina ni vaprofeti lava va mu profetelako.
16Kambe nzi byelile vapristi ni ka vontlhe vanhu, nziku: Jehova i ngalo: Mu nga ingisi a magezu ya vaprofeti va nwina, lava va profetako ka nwina, vaku: Makunu a zibya za yindlu ya Jehova zi ta wuya lokuloku hi le Babuloni, hakuva vo mu profetela mawunwa.
17Mu nga vazwi, tirelani a hosi ya Babuloni, mu ta hanya; hikuyini mu felako a muti lowu wu maha rumbi ke?
18Loku va hi vaprofeti, ni loku a mhaka ya Jehova yi hi zinwe navo, a va khongele Jehova wa tiyimpi, lezaku a zibya lezi za ha seleko a ndlwini ya Jehova, ni lomu ndlwini ya hosi ya ka Juda, ni le Jerusalema, zi nga ha yisiwi Babuloni.
19Hakuva Jehova wa tiyimpi i ngalo xungetano hi timhanze, ni bimbi, ni zikhatelo, ni zibya zinwani leʼzi seleko mutini lowu, 1 Tih. 7:15, 23, 27; 2 Tih. 25:13
20lezo Nebukadnezzare, hosi ya Babuloni, a nga zi tekangiko loku a khomile Jekonia, nʼwana Jehoiakimu, hosi ya ka Juda, le Jerusalema a mu yisa Babuloni, ni zontlhe zigwili za Juda ni Jerusalema;
21ina, Jehova wa tiyimpi, a Nungungulu wa Israeli, i ngalo xungetano hi zibya leʼzi seleko ndlwini ya Jehova, ni lomu ndlwini ya hosi ya ka Juda ni le Jerusalema:
22Zi ta yisiwa Babuloni, zi ya tshama kona kala siku nzi to zi lava ha gona, ku wula Jehova, nzi zi wuyisa ka legi wutshamu. 2 Kro. 36:22; Ezra 1:1, 7
Currently Selected:
Jeremia 27: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
