Jeremia 25
25
Xiprofeto xungetano ni kuhlula ka Nebukadrezzare.
1A gezu legi gi ngata ka Jeremia xungetano hi vanhu va ka Juda hi lembe ga wumune ga kufuma ka Jehoiakimu, a nʼwana Josia, hosi ya ka Juda, gi nga hi lembe go ranga ga kufuma ka Nebukadrezzare, hosi ya Babuloni;
2a gezu legi muprofeti Jeremia a nga byela tiko gontlhe ga ka Juda ni ka vontlhe a vaaki va Jerusalema, aku:
3A kusukela ka lembe ga wukhume ni manharu ya Josia, a nʼwana Amoni, hosi ya ka Juda, kala legi siku, a ka malembe laya ya 23 a gezu ga Jehova gi tile ka mina, nzi gi kanele ka nwina na ga hi mixo, kanilezi nwina a mu ingisangi.
4Kambe Jehova i rumele ka nwina a malanza yakwe wontihe hi kusimamisilweko, va nga vaprofeti; kanilezi nwina a mu ingisangi hambu aku phuhunha tindleve kasi kuzwa. 2 Tih. 17:13
5Va waku: Hunzulukani munwe ni munwani a ndleleni yakwe yo biha, ni ka kubiha ka zimaho za nwina, kasi ma aka tikweni legi Jehova a nyikileko nwina ni vararu va nwina, kusukela kaleloko ku kala kupinzuka.
6Mu nga lanzeli vanwani vanungungulu, kasi mu va tirela ni ku va khizamela, mu nga vindlusi a khulo ga mina hi mitiro ya mandla ya nwina, kasi mina nzi nga mu maheli kubiha.
7Hambu lezo a mu nzi ingisangi, ku wula Jehova, lezaku kasi mu vindlukisa a zanga ya mina hi mitiro ya mandla ya nwina, kasi ku ti hala khombo ha nwece.
8Hikwalaho Jehova wa tiyimpi i ngalo: Kotisa lezi mu nga ingisiko a timhaka ta mina,
9nzi ta rumela nzi ya lava a tixaka tontlhe ta le Nwalungu, ku wula Jehova, ni ka Nebukadrezzare, a nanza ga mina a nga hosi ya Babuloni; nzi ta va tisa a kulwa ni tiko legi ni vaaki va gona, ni matiko wontihe ma gamekeneko; nzi ta va lovisela magumo, nzi ta va maha a xirewukiso, ni xiruko, ni marumbi ya kala kupinzuka.
10Nzi ta miyeta xikari kabye a gezu ga kutsaka ni kuhlakana, a gezu ga muteki ni mutekiwa, a guwa ga maribye ya xigayo, ni kuwonekela ka kandiya. Jer. 7:34; Kuv. 18:22
11Gontlhe legi tiko gi tava marumbi ni xirewukiso; ni matiko laya ma ta tirela a hesi ya Babuloni a 70 wa malembe.
12Kanilezi loku ku hunzile a 70 wa malembe, nzi ta tsayisa a hosi ya Babuloni ni tiko ga kona hi kota ya kusoholoka kabye, ku wula Jehova, ni tiko ga maKaldea nzi ta gi maha giva xiwula kala kupinzuka. 2 Kro. 38:21; Ezra 1:1; Dan. 9:2
13Nzi ta tatisa hehla ka tiko lego tontlhe a timhaka ta mina, leti nzi ti wulileko ha gona, zontlhe lezi zi tsalilweko ka legi bhuku, lezi Jeremia a profetileko hi wontihe lawa matiko.
14Hakuva na vonawu va ta khoziswa hi matiko manyingi ni tihosi ta hombe; nzi ta va tlhelisela ku ringana ni zimaho zabye ni mitiro ya mandla yabye.
15Hakuva Jehova a Nungungulu wa Israeli i te ngalo ka mina: Teka a gombe legi ga vinya ga zanga canjeni ga mina, u nwisa wontihe a matiko nzi to ku rumela ka wona. Kuv. 14:10; 16:19
16Va tanwa lezaku va dedereka ni ku hunguka, hi kota ya supado leyi nzi to yi rumela xikari kabye.
17Nzi lo teka a gombe canjeni ga Jehova, nzi gi nyikela ka wontihe matiko manwa, lawo Jehova a nga nzi rumele ka wona.
18Hi Jerusalema ni miti ya ka Juda, ni tihosi ta kona ni tihosana tabye, lezaku ma maha marumbi, ni xirewukiso, ni xiruko, kota ma nga zona nyamutlha;
19na Faro a hosi ya le Gipite, ni malanza yakwe, ni tihosana takwe ni vanhu vakwe vontlhe;
20ni valuveli va kona; ni tihosi tontlhe ta tiko ga Uzi, ni tihosi tontlhe ta tiko ga maFilistia, ni Askeloni ni Gaza, ni Ekroni ni salela wa Axdodi;
21na Edome, na Moabi, ni vana va Amoni;
22ni tontlhe tihosi ta Tire ni Sidoni, ni tihosi ta zihlale zi nga le tlhatuko wa bimbi;
23na Dadani, na Tema, na Buzi ni vontlhe va nga ni misisi yi kayilweko mareveni;
24ni tontlhe tihosi ta Arabia, ni tontlhe a tihosi ta valuveli lava va tshamako xiwuleni;
25ni tontlhe tihosi ta Zimri, ni tontlhe tihosi ta Elami, ni tontlhe tihosi ta Media;
26ni tihosi tontlhe ta le Nwalungu, leti ti nga kusuhi ni ta le kule, a yinwe ni yinwani, ni mifumo yontlhe ya misava, yi nga kona misaveni. Ni hosi ya le Xexaki yi tanwa a gombe anzhako kabye.
27U ta va byela, uku: Jehova wa tiyimpi a Nungungulu wa Israeli, i ngalo: Nwanani mu popiwa, ni ku paleka, muwa mu nga ha vuki kambe, hi kota ya supado nzi to yi rumela xikari ka nwina.
28Kanilezi loku va ala ku teka a gombe mandleni ya wena vanwa, u taku kabye: Jehova wa tiyimpi i ngalo: Hizinene mu yimelwe hi kunwa!
29Hakuva, hi nga wonani a muti lowu wu vitiwako hi vito ga mina, nzi sangula ha wona nzi wu tsayisa; xana nwina mu ta tsikiwa mu nga tsayiswi ke? Mu nga ta tsetselelwa, hakuva nzi ta hloma supado, yiba a vaaki vontlhe va misava, ku wula Jehova wa tiyimpi. Ezek. 9:6; 1 Ped. 4:17
30Hikwalaho u ta profeta kabye leti timhaka, uku:
Jehova wa dzuma-dzuma hi le hehla,
A zwata gezu gakwe hi lomu ndlwini yakwe yo basa;
Wa dzumela wuriselo gakwe hi kuchavisileko,
Waba huwa kukotisa vakhuwuti va mauva,
Na vukela vaaki vontlhe va misava. Joeli 3:16; Am. 1:2
31A guwa gi ta zwala kala magumelweni ya misava;
Hakuva Jehova i ni zunga ni matiko,
I ta lamula nyama yontlhe;
I ta nyikela a vabihileko ka supado, ku wula Jehova.
32Jehova wa tiyimpi i ngalo:
A khombo gi taya ka tiko ginwe ni ginwani,
A xingulu xi chavisekako xi ta huma le magemetamusi ya misava.
33Lava va delweko hi Jehova va ta mbambamela misaveni kusukela mbhirini kala ka yinwani mbhiri ya misava; va nga ta rilelwa, hambu ku hlengeletiwa, hambu ku lahliwa, va te maha koho misaveni.
34Nwina varisi,: huwelelani mu rila;
Puluwunzani khumeni nwina vahombe va ntlhambi;
Hakuva a masiku ya kuchabyiwa ka nwina ma tshinele.
Nzi ta mu hangalasa, mu tawa
Kota a xibya xa lisima.
35A varisi va ta vumala ndlela yo pfowola ha yona,
Ni vahombe va tlhambi va nga ta pona.
36Hi nga zwani a kurila ka varisi,
Ni kubuwelela ka vahombe va ntlhambi!
Hakuva Jehova wa onha a wuriselo gabye,
37Ni magelo ya kurula ma lobyisiwa
Hi kota ya kuhisa ka zanga ya Jehova.
38Yena i humele kota nghala yi humako nghuleni ya yona.
A tiko gabye gi mahile marumbi,
Hi kota ya kutshisa ka supado ya Jehova,
Ni kota ya kuhisa ka zanga yakwe.
Currently Selected:
Jeremia 25: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
