Jeremia 22
22
A ziprofeto hi tihosi ta ka Juda.
1Jehova i te ngalo: Relela ndlwini ya hosi ya ka Juda, u ya wula kona mhaka leyi:
2Zwana a mhaka ya Jehova, wena hosi ya ka Juda, u tshamileko a xitshanwini xa wuhosi xa Davida, wena ni malanza ya wena, ni vanhu va wena lava va enghenako hi tinyangwa leti.
3Jehova i ngalo: Lamulani hi fanelo ni kululama, mu ponisa loyi a phangiwako a mandleni ya loyi a mu tsimbeketako; mu nga xanisi a muluveli, ni xisiwana, ni noni, mu nga va tsimbeketi, hambu ku halata nkhata wa lava va nga hiko na nanzu wutshanwini legi.
4Hakuva loku mu ingisa mhaka leyi, zonake ku ta engheniwa hi tinyangwa ta yindlu leyi a tihosi ti tshamileko a xitshanwini xa wuhosi xa Davida, na ti khilele a tikareta ni mahaxi, zinwe ni malanza ya tona ni vanhu va tona.
5Kanilezi loku mu nga ingisi leti timhaka, nza hlambanya hi wutsumbu ganga, ku wula Jehova, lezaku a yindlu leyi yi tava rumbi.
6Hakuva Jehova i wula xungetano hi leyi yindlu ya hosi ya ka Juda, aku:
A ka mina u kotisa Gileadi ni hloko ya Lebanoni,
Kanilezi nzi ta ku hunzula uva xiwula,
A miti yi nga hiko na vanhu.
7Nzi ta ku vitanela a valovisi,
A munwe ni munwani i tava ni matlhari yakwe;
Va ta tsema a tisedare ta wena to saseka,
Va ti hoxa nzilweni.
8A matiko yo tala ma ta hunza hi ka muti lowu,
A ginwe gi ta wutisa ka ginwani, giku:
Hikuyini Jehova a mahileko lezo ka muti lowu wa hombe ke? Deut. 29:24; 1 Tih. 9:8
9Zonake va ta hlamula, vaku:
Hakuva va tsikile a xivumelwano xa Jehova Nungungulu wabye,
Va ya khozela vanwani vanungungulu, ni ku va tirela.
10Mu nga rileli loyi a fileko,
Mu ngabi nkosi hi kota ya yena;
Kanilezi rilelani loyi a sukako,
Hakuva a nga ta ha wuya,
A ta wona a tiko legi a belekilweko ka gona.
11Hakuva Jehova i wula lezi xungetano ha Xallumi nʼwana Josia, a hosi ya ka Juda, loyi a nga fumela wutshanwini ga raru wakwe, a sukileko ka legi wutshamu, aku: Yena a nga ta ha wuya kambe laha.
12Kanilezi i ta ya fela a wutshanwini va mu yisileko kona kukhonweni, a nga ta ha wona tiko legi.
13Khombo ka munhu loyi a akako yindlu yakwe hi kungalulami,
Ni tikwaruto ta yona hi kusoholoka,
Loyi a tirisako munhu-kulobye handle ka hakhelo,
A nga mu rihi; Levi 19:13; Deut. 24:14; Jak. 5:4
14Loye a nge ngalo: Nzi ta ti akela yindlu ya hombe,
Ni tikwaruto to anama,
A bhoxa tinjhanela;
A ti nameketa hi tisedare,
Ni ku yi penda hi penda yo pswhuka.
15Xana u ta fuma hilezi u ti tsitsiritako ntirweni wa tisedari ke?
A raru wa wena i gile ni kunwa,
Kanilezi i lo lamula hi nongameto ni fanelo,
I lo humelela hi kota ya lezo. 2 Tih. 22:2
16I lamule a mhaka ya lava va tsimbeketilweko ni ku vumala,
Hi kota ya lezo i wa humelela.
Xana lezo a hi ku nzi tiva ke?
Ku wula Jehova,
17Kanilezi a mahlo ya wena ni mbilu ya wena zi navela bhinzu ntsena,
Ni ku halata nkhata wa loyi a nga hiko na nanzu,
U maha hi ku tsimbetela ni tihanyi.
18Hikwalaho Jehova i wula xungetano ha Jehoiakimu a nʼwana Josia, hosi ya ka Juda, aku:
Va nga ta mu rilela, vaku:
Yowe nakulori! Yowe makweru!
Va nga taba nkosi ha yena, vaku:
Yowe hosi! kutani, Yowe a wudumo gakwe!
19I ta lahliwa ku fanana ni mbongola,
I ta ruruvisiwa, a ya hoxiwa handle ka tinyangwa ta Jerusalema.
20Kanziha Lebanoni, u kanyuluka,
Tlakusa gezu ga wena le Baxani!
Kanyuluka na u hi le Abarime,
Hakuva a varanziwa va wena vontlhe va lobyisilwe.
21Nzi wulawulile ka wena kuvuvumeni ka wena,
Kanilezi uku: Nzi nga ta ingisa.
Hi wona a mahanyela ya wena kusukela wuhlangini,
Yaku, u nga tazwa a gezu ga mina.
22A varisi va wena va ta hahisiwa hi mheho,
Ni varanziwa va wena va ta yiswa wukhumbini;
Zonake u taku koyo tingana,
U xeveka hloko hi kota ya kubiha ka wena.
23Wena loyi u akileko Lebanoni,
U nga ni xisaka xa wena maravini ya tisedare,
Kuxaniseka ka kuyini u tova nako
Loku u humelwa hi makhombo,
A kubayisa kota a wasati a lunwako;
24Khwatsi hi lezi nzi hanyako, ku wula Jehova, loku ku wo khwatsi Koma a nʼwana Jehoiakimu, hosi ya ka Juda, a wa hi phera yi mehelweko canjeni ga mina ga xinene, hambu zi hi tano ngha nzi mu konole kwalaho. Xiz. 8:6; Hag. 2:24
25Nzi ta ku nyikela canjeni ga vona lava va hlotako a wutomi ga wena, ni canjeni ga lavo u rurumelako mahlweni kabye, a nga yena Nebukadrezzare a hosi ya Babuloni ni mandleni ya maKaldea.
26Nzi ta ku hlongola, wena ni mamani wa wena loyi a nga ku beleka, muya ka ginwani tiko, laho mu nga belekiwangiko kona, kwaseyo mu ta ya fela kona. 2 Tih. 24:15
27Kanilezi a tiko legi va xuvako ku tlhelela kona, va nga ta wuya ka gona.
28Xana a munhu loyi Konia, xibya xi fayekileko ni ku nyenyiwa, lexi xi nga vuniko nchumu ke? xana i tsikelwa yini ni vanana vakwe, va ya hoxiwa ka tiko va nga gi tiviko ke?
29O tiko, tiko, tiko! ingisa a mhaka ya Jehova!
30Jehova i ngalo: Tsalani a vito ga munhu loyi lezaku a nga na vana, munhu a to kala ku vuvuma masikwini yakwe. Hakuva ku nga ta humelela ni munwe wa vana vakwe, lezaku a nyikwa ku tshama xitshanwini xa wuhosi xa Davida, a fumela Juda.
Currently Selected:
Jeremia 22: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
