Jeremia 15
15
1Zonake Jehova i te ngalo ka mina: Hambu loku Mosi na Samueli va wa ta yima mahlweni ka mina a mbilu ya mina ngha yi nga zi koti ku kongomana ni lava vanhu. Va hlongole mahlweni ka mina, va ti fambela. Ekso. 32:11; Mitse. 14:13
2Loku va ku wutisa, vaku: Xana hi taya kwihi ke? U ta va hlamula, uku: Jehova i ngalo: Lava va yimiselweko kufa, va taya kufeni; lava va yimiselweko supado, va taya supadweni: lava va yimiselweko ndlala, va taya ndlaleni; ni lava va yimiselweko a wukhumbi, va taya wukhumbini.
3Nzi ta va rumela mune wa makhombo, ku wula Jehova: A supado yi ta va hlasela, a timbyana ti ta va tlukula, a tinyanyani ta tilo ni zivanza za khwati zi ta va khadamula zi va lovisa. Levi 26:16; Deut. 28:26
4Nzi ta va maha a xichaviso xikari ka mifumo yontlhe ya misava, hi kota ya Manase, a nʼwana Hezekia hosi ya ka Juda, hi kota ya lezi a nga zi maha lomu Jerusalema. 2 Tih. 21:1-12
5Himani a to ku zwela wusiwana, O Jerusalema?
Himani a to ku xanisekela?
Himani a to ku yela kasi ku wutisa wutomi ga wena ke?
6U nzi tsikile, ku wula Jehova,
U tlhelele nzhako.
Hikwalaho nzi nawulutile a canja ga mina nzi ku lovisa.
Nzi karele hi ku ku tsetselela.
7Nzi va heherile hi foxola le maphangweni ya tiko;
A vapswali nzi va tekele a vana vabye,
Nzi lovisa vanhu va mina.
Hilezi va nga hunzulukangiko tindleleni tabye.
8A tinoni tabye ti enzelekile ku hunza a seke ga bimbi.
Nzi nehile mulovisi loyi a dayako vamamani va majaha ni nhlikanhi.
Hi xitshuketi nzi rumele hehla kakwe a kuxaniseka ni kuchava.
9Loye a psweleko ntlhanu wa vana ni vambiri i hohovele, i file;
A gambo gakwe gi pelile kasi lezo ga hi mumu;
I rwele tingana ni ku jujeka hloko.
Lava va seleko nzi ta va nyikela supadweni mahlweni ka valala vabye, ku wula Jehova.
A xirilo xa Jeremia.
10Yowe mina, mamani wa mina zanga, loyi u nzi psweleko,
Mina munhu wa mazunga ni tiphika ka gontlhe tiko!
A nzi se ku pembisa nchumu hi kota ya bhinzu,
Ni vanhu a va nzi pembangi nchumu;
Hambu zi hi tano, vontlhe va nzi rukatela. Joba 3:1; 10:18
11Jehova i lo hlamula, aku: Kunene nzi ta ku tiyiseta lezaku u humelela. Nzi ta maha nala wa wena a ku kombela xikhatini xa makhombo ni kuxaniseka.
12Xana munhu a nga zi kota ku tshova xiketse xa le Nwalungu ni suku ke?
13Nzi ta nyikela a nhunzu ya wena ni titshomba ta wena zi phangiwa, na zi nga xabyiwangi, hi kota ya zionho zontlhe za wena tikweni ga wena gontlhe.
14Nzi ta ku maha u tirela valala va wena tikweni legi u nga gi tiviko; hakuva a nzilo wa zanga ya mina wu dzivelwe, lowu wu ta nga mu hisa. Deut. 32:22
15O Jehova, wena wa zi tiva,
Nzi alakanye, u nzi enzela;
Nzi photele ka vaxanisi va mina.
Timisela ha mina, u nga nzi susi;
Tiva lezaku nzi rukiwa hi kota ya wena.
16A timhaka ta wena nzi ti kumile,
Ti lo maha kuga ka mina;
Tona ti wa hi litsako ni kunengela ka mbilu ya mina,
Hakuva nzi vitanwa hi vito ga wena.
O Jehova Nungungulu wa tiyimpi.
17A nzi tshamangi tlhanganweni wa vatseketseli, nzi tsaka kona;
Hi kota ya canja ga wena nzi tshamile nzoce,
Hakuva u nzi tatisile hi khulo. Isa. 8:11; Ezek. 3:14
18A kubayiseka ka mina ku simamisa hikuyini,
Ni mbanga ya mina yi nga chumiwi, yi ala ku hola ke?
Xana a ka mina u tava a hlowo yi khohlisako,
Kutani a mati lawa ma pswhako ke?
19Hikwalaho Jehova i ngalo;
Loku u tlhelela ka mina
Nzi ta ku wuyisa lezaku u maha nanza ga mina.
Ni loku u neha leʼza lisima, u tsika leʼzo biha,
Wena u tava kota nomu wa mina.
Vona va ta tlhelela ka wena,
Kanilezi u nga ta tlhelela kabye.
20Nzi ta ku maha uva khurisi ga suku a ka tiko legi;
Va talwa na wena, kanilezi va nga ta ku hlula;
Ihakuva mina nzi zinwe na wena,
Kasi ku ku ponisa, ku wula Jehova.
21Nzi ta ku ponisa canjeni ga vakubiha,
Nzi ku tirula mandleni ya lava va tihanyi.
Currently Selected:
Jeremia 15: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
