Jeremia 12
12
1A lulamileko hi wena, O Jehova, loku nzi kanetana na wena;
Hambu zi hi tano nzi ta bhula na wena hi malamulela ya wena.
Hikuyini a ndlela ya vakubiha yi vuvuma ke?
Va kateka hikuyini vontlhe lava va nga tsumbekangiko? Joba 21:7; Tis. 73:3; Mat. 3:15
2Wena u va byalile, va zimile mitsu;
Va kula, va phandlula mihanzu.
Wena u kusuhi ni milomu ya bye,
Kanilezi u le kule ni timbilu tabye.
3O Jehova, wena wa nzi tiva.
Wa nzi wona, u hlola mbilu ya mina lezaku yi tshamisa kuyini ka wena.
Simula vona kota tiyivu ti yiswako silahweni,
Va longisele a siku ga kudawa.
4Xana kala rini a tiko na gi keta.
A khubyanyi na gi woma mikoveni.
Hi kota ya kubiha ka lava va akileko lomo ke?
A zihari ni zinyanyani za lova,
Hakuva ve ngalo: A nga ta wona kugumelwa ka hina.
5Loku u palisana ni vanhu hi ku tsutsuma, va ku siya.
Xana u ta palisanisa kuyini ni mahaxi ke?
Loku u nga tshamela lomu tikweni ga kurula,
Xana u ta mahisa kuyini xihlahleni xa Jordani ke?
6Hakuva na vona vanakuloni ni yindlu ya raru wa wena va ku khohlisile;
Va ku kulumela. U nga va kholwi hambu loku vo wulawula a magezu yo saseka.
A kulobyiswa ka tiko.
7Nzi tsikile a yindlu ya mina, nzi siyile a tshomba ya mina;
Nzi hendleletile a xiranzwa xa mina mandleni ya valala vakwe.
8A tshomba ya mina yi nzi vukela ku fanana ni nghala lomu khwatini;
Yi nzi dzumela, hikwalaho nzi yi swirekele.
9Xana a tshomba ya mina yi ka mina kukotisa a makoti ya mivalavala?
Loku zi hi tano a makoti ma ta yi vukela hi matlhelo wontihe.
Yanani, mu ya tsombanyisa zontlhe zihari za khwati, zi ta yi khadamula.
10A varisi vo tala va gohetele a xi vina xa mina,
Va kanzihele a simu ga mina;
A simu ga mina go saseka va gi mahile xiwula.
11Va gi onhile,
Ga rila ka mina hakuva gi mahisilwe rumbi;
A tiko gontlhe gi mahile rumbi,
Hakuva a ku na munhu a gi chelelako kota.
12A vahahluli va tile le zitsungeni zontlhe za xiwula,
Hakuva a supado ya Jehova yi khadamula ku sukela magumo kala magumo manwani ya tiko;
A ku na munhu ni munwe a tova ni kurula.
13Va byalile mavele, va tshovele mizwa;
Va ti karatile mahala.
Mu tava ni tingana hi kota ya kutshovela ka nwina,
Ni kota ya kuhisa ka khulo ga Jehova. Levi 26:16; Deut. 28:38; Hag. 1:6
14Zakunghahi a wulako Jehova hi vaakelwani va mina vo biha lava va vukelako a tshomba leyi nzi hileko a vanhu va mina a vaIsraeli; Nzi ta va tsuwula tikweni gabye, ni yindlu ya ka Juda nzi ta yi tsuwula xikari kabye.
15Kanilezi anzhako ka kuva na nzi va tsuwule, nzi ta tlhela nzi va zwela wusiwana, nzi ta va tlhelisa munwe ni munwani a tshombeni yakwe, munwe ni munwani a tlhelela tikweni gakwe.
16Loku va gonzile a tindlela ta vanhu va mina, lezaku va hlambanya a vitweni ga mina, vaku: Hi Jehova loyi a hanyako; kota lezi va gonzisileko vanhu va mina a ku hlambanya hi Baali, zonake va ta akiwa xikari ka vanhu va mina. Deut. 6:13; Efe. 2:19
17Kanilezi loku va nga ingisi, nzi ta tsuwula a tiko legi gi lova, ku wula Jehova.
Currently Selected:
Jeremia 12: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
