Jeremia 10
10
A ku khozela zifananiso.
1Zwanani a mhaka leyi Jehova a yi wulako ka nwina va yindlu ya Israeli.
2Jehova i ngalo:
Mu nga gonzi a mahanyela ya vamatiko,
Mu nga chaviswi hi zikombiso za le tilweni,
Hakuva a vamatiko va chavisiwa ha zona. Levi 18:3; Isa. 47:13
3A vamatiko va kholwa hi vanungungulu va hava.
Hakuva i sinya yi tsemilweko le khwatini,
Yi tiriwa hi zihloka xa muvatli;
4Va yi bombisa hi siliva ni nzalama,
Ni ku yi tiyisa hi tikhokho ni hamela,
Kasi yi nga gutlagutli.
5A zifananiso zi kotisa a mhanze sinwini ga maranga,
Zi yima kona kanilezi a zi wula wuli;
Zona zi lava ku pakatsiwa, hakuva a zi zi koti ku famba.
Mu nga zi chavi, hakuva a zi tivi ku maha kubiha,
Hambu a kuva ni ntamu wo maha zinene.
6A nga kona a fananako na wena, O Jehova;
U wa hombe, a vito ge wena ga hombe hi ntamu.
7O Hosi ya matiko, himani a nga ku chaviko?
U fanele ku chabyiwa,
Hakuva xikari ka tontlhe titlhari ta vamatiko,
Ni ka mifumo yabye yontlhe,
Cima a nga kona loyi; a fananako na wena. Kuv. 15:8
8Vontlhe va hungukile ni kuva zipumbu,
A gonzo ya zifananiso i tsanza ntsena.
9A siliva yi bethilweko yi nehilwe hi le Tarxixi,
Ni nzalama ya le Ufazi;
I ntiro wa nyamandlamitiro ni mufuli wa nzalama.
Zi ambele a wukuxe ni ziwunguwungu,
Zontlhe lezi i ntiro wa vanhu va tlharihileko. 1 Tih. 10:22
10Kanilezi Jehova i Nungungulu wa zinene,
I Nungungulu loyi a hanyako, a Hosi ya pinzukelwa;
A misava yi rurumela zangeni yakwe,
A matiko a ma na ku yima mahlweni ka khulo gakwe.
11Mu ta va byelisa lezi, muku: A vanungungulu lava va nga vangangiko a tilo ni misava va ta nwalala tikweni ni lahasi ka tilo.
12Yena i vangile misava hi ntamu wakwe,
A seketela tiko hi wutivi gakwe,
Hi kupima kakwe i tshambulutile tilo, Gen. 1:1, 6; Isa. 45:12
13Loku a tlakusa a gezu gakwe
A mati ma dzuma le matilweni,
A maha marefu mata hi le magunweni ya misava;
I rumela zingwalangwanza zinwe ni vula,
Ni ku humesa a mheho lomu mabakweni yakwe.
14Loku va zi wona a vanhu va yima vaku kaye, va nga pimi nchumu;
Ni vafuli va nzalama va wisiwa tingana hi zifananiso zabye zi vatlilweko;
Hakuva a zifananiso zabye mawunwa, a zi na muhefemulo.
15Zona a zi nyawuli, mitiro ya wu khohlisi;
A xikhatini xa kutsayiswa zi ta lova.
16Loyi a nga xiavelo xa ka Jakobe a nga fanani na zona;
Hakuva hi yena muvangi wa zilo zontlhe;
Israeli lixaka la tshomba yakwe,
Jehova wa tiyimpi hi vito gakwe. Deut. 4:19; 32:9
A kutsayiswa ni kukombelela.
17Bola a nhunzu ya wena, u yi humesa tikweni,
Wena loyi u akileko mutini wu vimbezelweko.
18Hakuva Jehova i ngalo:
Lexi xikhati nzi ta cukumeta kule a vaaki va tiko,
Nzi ta va xanisa va kala va zizwa, vaku:
19Yowee! nzi tshovekile!
A mbanga ya mina ya panza.
Kanilezi nzi ngalo: Hakunene, hi gona khombo ga mina,
Nzi fanele a ku gi rwala.
20A tenda ga mina gi hahlulwe,
Ni tingoti tontlhe ta mina ti tsemekile.
A vana va mina va nzi pfhukile, a va kona;
A nga kona a nzi gwimbelako a tenda ga mina,
Ni ku haxa a michachalato ya mina.
21Hakuva a varisi va hungukile,
A va hlotangi Jehova;
Hikwalaho a va humelelangi,
Yontlhe a mitlhambi yabye yi hangalakile.
22Hi nga zwani, ku zwala guwa,
A dzolonga ga hombe gi tako hi le Nwalungu,
A ku ta hunzulusa a miti ya ka Juda yiva marumbi,
A wutshamu ga mahlolwa.
23O Jehova, nza zi tiva lezaku a ndlela ya munhu a yi le ntanwini wakwe,
Kambe a munhu a nga zi koti ku lulamisa a mazambo yakwe.
24O Jehova, nzi tsayise,
Kanilezi hi lipimo li nzi ringeneko,
Na ku nga hi zanga ya wena, lezaku u nzi lovisa. Tis. 6:1; 38:2
25Chulula a khulo ga wena hehla ka vamatiko lava va nga ku tiviko,
Ni hehla ka tixaka leti ti nga vitanako a vito ga wena.
Hakuva va khadamule Jakobe, va mu mita, va mu heta,
Ni muti wakwe va wu mahile rumbi.
Currently Selected:
Jeremia 10: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
